ពីនេះ ពីនោះ
សុខភាព
×![]()
ដោយ: សារព័ត៌មានថ្មីៗ
ក្រៅពីរបៀបរបបក្នុងការរស់នៅនិងអ្វីដែលអ្នកទទួលទានហើយនោះ ក៏នៅមានមូលហេតុច្រើនផ្សេងទៀតដែលអាចបណ្ដាលឱ្យអញ្ចាញធ្មេញឈឺចាប់។ ថាតើមូលហេតុទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុស្មានមិនដល់នៃបញ្ហាឈឺអញ្ចាញធ្មេញ ៖
១. ការដុសធ្មេញខ្លាំងៗពេក
ជាញឹកញាប់ទម្លាប់នៃការដុសធ្មេញខ្លាំងៗអាចជាមូលហេតុនៃបញ្ហាឈឺអញ្ចាញ។ ការដុសធ្មេញខ្លាំងៗពេកអាចបង្កគ្រោះថ្នាក់លើអញ្ចាញដែលអាចបណ្ដាលឱ្យឈឺចាប់ រលាក និងជួនកាលចេញឈាមទៀតផង។ ដើម្បីជាការប្រសើរក្រៅពីដុសធ្មេញថ្នមៗហើយនោះ អ្នកគួរជ្រើសរើសប្រើប្រាស់ច្រាសដុសធ្មេញដែលមានសសៃទន់ផង។
២. ប្រតិកម្មអាឡែកស៊ី
ពេលខ្លះគ្រឿងផ្សំមួយចំនួនក្នុងថ្នាំដុសធ្មេញអាចបង្កប្រតិកម្មបណ្ដាលឱ្យរលាកអញ្ចាញធ្មេញបង្កការឈឺចាប់។ ចូរសាកល្បងផ្លាស់ប្ដូរថ្នាំដុសធ្មេញថ្មី ប្រសិនបើមាត់របស់អ្នកមិនត្រូវនឹងថ្នាំដុសធ្មេញចាស់។
៣. ជំងឺអញ្ចាញធ្មេញ
អញ្ចាញឡើងក្រហម រលាក ហើយតែងហូរឈាមរាល់ពេលដុសសម្អាតធ្មេញសូម្បីតែដុសថ្នមៗនោះវាអាចជារោគសញ្ញាបញ្ជាក់ថាអ្នកកំពុងជួបប្រទះបញ្ហានៃជំងឺអញ្ចាញធ្មេញមិនខាន។ ក្នុងករណីនេះចូរកុំស្ទាក់ស្ទើនឹងទៅជួបពិនិត្យជាមួយពេទ្យធ្មេញដើម្បីចៀសវាងបញ្ហាកាន់តែធ្ងន់ធ្ងរ។
៤. អតុល្យភាពនៃអ័រម៉ូន
អតុល្យភាពនៃអ័រម៉ូនក៏អាចបង្កឱ្យអញ្ចាញធ្មេញប្រែជាឈឺបានផងដែរ។ ហើយបញ្ហាអតុល្យភាពនៃអ័រម៉ូនតែងកើតមានឡើងអំឡុងពេលមករដូវនិងអស់រដូវ។
៥. អាឡែកស៊ីនឹងចំនីអាហារ
ក្នុងករណីមួយចំនួនអញ្ចាញឈឺ គឺបណ្ដាលមកពីអ្វីដែលអ្នកទទួលទាន។ អ្នកគួរផ្អាកទទួលទានអាហារគួរឱ្យសង្ស័យសម្រាប់រយៈពេលពីរសប្តាហ៍។ ប្រសិនបើអញ្ចាញធ្មេញប្រែជាឈឺចាប់វិញក្រោយពេលទទួលទានវាម្ដងទៀត នោះអាចបញ្ជាក់បានថាការឈឺចាប់ គឺមកពីអាហារ។ ចូរជួបពិគ្រោះជាមួយគ្រូពេទ្យជំនាញប្រសិនបើអ្នកមិនអាចដឹងថាអាហារមួយណាដែលបង្កបញ្ហាឈឺអញ្ចាញ។
៦. មហារីកមាត់
មួយក្នុងចំណោមរោគសញ្ញាទូទៅបំផុតមួយនៃជំងឺមហារីកមាត់ គឺការលេចឡើងនូវដំបៅឈឺចាប់ក្នុងមាត់មិនព្រមជាសះស្បើយនិងអាចកើតមានលើអញ្ចាញដែលបណ្ដាលឱ្យរមាស់និងឈឺចាប់។ ត្រូវប្រាកដថាអ្នកប្រញាប់ទៅជួបពិនិត្យជាមួយពេទ្យធ្មេញប្រសិនបើអាការៈមិនព្រមបាត់ទៅវិញសោះក្រោយរយៈពេល ២ សប្តាហ៍។
ប្រយ័ត្ន! មានមូលហេតុច្រើនផ្សេងៗពីគ្នាដែលបណ្ដាលឱ្យអញ្ចាញប្រែជាឈឺចាប់។ ប្រសិនបើស្ថានភាពនៃបញ្ហាហាក់ដូចជាមិនប្រសើរឡើងសោះ ចូរប្រញាប់ទៅជួបពិនិត្យជាមួយពេទ្យធ្មេញដែលគួរឱ្យទុកចិត្តបានជាបន្ទាន់៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
