ភ្នំពេញ៖ តំបន់មួយចំនួននៅខេត្តកំពង់ឆ្នាំង ខេត្តកំពង់ធំ និង ខេត្តសៀមរាប កំពុងប្រឈមនឹងការខ្វះខាតទឹកប្រើប្រាស់ និងធ្វើឲ្យពលរដ្ឋមិនហ៊ានដាំដំណាំឡើយ។ អាជ្ញាធរអះអាងថា នៅតំបន់ទាំងនោះ គឺតែងតែជួបបញ្ហាខ្វះខាតទឹក ប្រមាណជា៤ទៅ៥ឆ្នាំជាប់គ្នាមកហើយ។
អ្នកស្រី វ៉ាត មុំ រស់នៅឃុំច្រណូក ស្រុកកំពង់លែង ខេត្តកំពង់ឆ្នាំង ប្រាប់សារព័ត៌មានថ្មីៗតាមទូរស័ព្ទ នៅថ្ងៃទី១៤ ខែឧសភា ថា នៅតំបន់ដែលអ្នកស្រី រស់នៅ គ្មានទឹកស្អាតឡើយ។ អ្នកស្រី បន្ថែមថា កន្លងមក អាជ្ញាធរក៏បានចុះពិនិត្យនិងជួសជុលអណ្ដូងមួយចំនួនដែលខូចខាត។
អ្នកស្រី ថ្លែងថា៖«ផ្ទះខ្ញុំគ្មានអណ្ដូងទេ ហើយអ្នកនៅតំបន់នេះមួយចំនួនភាគច្រើនគ្មានអណ្ដូងទឹកនិងអណ្ដូងរីង។ ខ្ញុំបានទិញទឹកប្រើប្រាស់ជាប្រចាំ ក្នុងតម្លៃ១ធុង ៣ពាន់រៀល ដែលមានចំណុះ៣០០ លីត្រ ប្រើក្នុងគ្រួសារបានត្រឹម ២ ទៅ ៣ថ្ងៃទេ។ នៅតំបន់នេះ គ្មានទឹកស្អាតប្រើទេ ហើយទឹកទិញគេប្រើរាល់ថ្ងៃនេះ ក៏ទឹកដែលគេយកពីស្រះ អណ្ដូង អូរ និងស្ទឹងពីតំបន់ក្បែរគ្នាដែលមិនទាន់រីងមកលក់ដែរ ទឹកមិនស្អាតនោះទេ ជួនក៏ថ្លាល្អ ជួនទឹកក៏ល្អក់។»
លោក ឈុំ ឈាន មេឃុំច្រណូក ដែលផ្តល់បទសម្ភាសជាមួយសារព័ត៌មានថ្មីៗដែរនោះ លើកឡើងថា នៅក្នុងឃុំច្រណូក មានពលរដ្ឋជាង១ពាន់គ្រួសារ ដោយមានអណ្ដូងទឹកជាង៣០។ លោក អះអាងថា អាជ្ញាធរបានចុះដោះស្រាយពីបញ្ហាទឹកហើយ ពោលគឺជួសជុលអណ្ដូងដែលខូច គ្មានបញ្ហាខ្វះទឹកឡើយ។
ប៉ុន្តែអ្នកស្រី វ៉ាត មុំ សង្កត់ធ្ងន់ថា រាល់ឆ្នាំចន្លោះខែធ្នូដល់ខែឧសភានេះ គឺជួបបញ្ហាខ្វះទឹក ព្រោះជាតំបន់ភ្នំ អណ្តូងក៏មិនចេញទឹកដែរ។ បញ្ហាខ្វះទឹកនេះ កាន់តែធ្ងន់ទៅៗនៅប្រមាណ៥ឆ្នាំចុងក្រោយ ហើយឆ្នាំនេះ មានសភាពរីងស្ងួតខ្លាំងជាងឆ្នាំមុនៗ។ រាល់ថ្ងៃ អ្នកស្រីនៅតែបន្តទិញទឹកប្រើប្រាស់ដដែល ព្រោះគ្មានអណ្ដូង ហើយអ្នករស់នៅក្នុងឃុំ មិនមានអ្នកដាំស្រូវប្រាំងនិងដំណាំដែលមានតម្រូវការទឹកច្រើនឡើយ។
រីឯ ពលរដ្ឋនៅភូមិត្រពាំងថ្ម ស្រុកបន្ទាយស្រី ខេត្តសៀមរាប កំពុងខ្វះខាតទឹកប្រើប្រាស់យ៉ាងធ្ងន់ធ្ងរ សូម្បីតែទឹកស្អាតបរិភោគក៏ពិបាករកដែរ។ នេះបើតាមការរៀបរាប់របស់ លោក ឃឹម ហ្វីណង់ អភិបាលស្រុកបន្ទាយស្រី លើទំព័រហ្វេសប៊ុកកាលពីថ្ងៃទី១៤ ខែឧសភា។
លោក ឃឹម ហ្វីណង់ សរសេរថា៖ «អណ្តូងធម្មតាមិនអាចជីករឺបុកយកទឹកទៅប្រើប្រាស់បាននោះទេ ហើយប្រជាជននៅទីនេះមួយចំនួន គឺត្រូវពឹងផ្អែកទៅលើស្រះទឹក និងអណ្តូងស្នប់ ដែលបានផ្តល់ជូនដោយសប្បុរសជន ដើម្បីយកទឹកដែលល្អក់ទាំងនោះ ទៅច្រោះបន្តឬកូរសាជូរដើម្បីហូបនិងប្រើប្រាស់ ចំណែកប្រជាពលរដ្ឋមួយចំនួនទៀតគ្មានជម្រើសអ្វីក្រៅពីការទិញទឹក ពីអ្នកដឹកយកមកលក់ពីតំបន់ផ្សេងឡើយ»។
អភិបាលស្រុករូបនេះ បន្ថែមថា រដូវប្រាំងឆ្នាំខ្លះ ធ្លាប់ធ្ងន់ធ្ងរខ្លាំងរហូតដល់អាជ្ញាធរត្រូវដឹកជញ្ជូនទឹកជូនតាមផ្ទះទៀតផង។ នៅក្នុងរង្វង់១៥គីឡូម៉ែត្រ ពលរដ្ឋមិនអាចរកប្រភពទឹកណាបានទេ ក្រៅពីទឹកភ្លៀងនិងទឹកស្រះ ដែលនៅសេសសល់តិចតួចពីរដូវវស្សា។ លោក បន្តថា កុំថាឡើយទឹកងូត ប្រើប្រាស់ ឬស្រោចដំណាំ សូម្បីតែទឹកស្អាតសម្រាប់បរិភោគក៏ពិបាករកបានដែរ។
ក្រោយចុះពិនិត្យជាក់ស្ដែងហើយ លោកសង្កត់ធ្ងន់ថា នឹងព្យាយាមកៀងគរស្វែងរកដំណោះស្រាយយូរអង្វែង ដល់ប្រជាពលរដ្ឋនៅតំបន់នេះ ដើម្បីទទួលបានការអភិវឌ្ឍដូចតំបន់ដទៃ។
ចំណែកខេត្តកំពង់ធំវិញ ពលរដ្ឋរស់នៅតាមបណ្ដោយដងស្ទឹងសែន ពិសេសនៅតំបន់ស្រុកកំពង់ស្វាយ កំពុងព្រួយបារម្ភ ពីបញ្ហាប្រឈមការខ្វះខាតទឹក ដោយសារមើលឃើញស្ថានភាពទឹកស្ទឹងសែនមានការថយចុះខ្លាំង ហើយកន្លែងខ្លះរីងស្ងួតទៀតផង។ នេះជាការរៀបរាប់របស់លោក សុខ លូ អភិបាលខេត្តកំពង់ធំ ដោយបន្ថែមថា ការរីងស្ងួតទឹកនៅស្ទឹងសែននេះ ដោយកម្ពុជាជួបបាតុភូតអែលនីណូ។ លោក សុខ លូ អះអាងថា បញ្ហាប្រឈមនៃការខ្វះទឹកនេះ គឺអាចថមថយវិញ ព្រោះកាលពីយប់ថ្ងៃទី១៣ ខែឧសភា មានភ្លៀងធា្លក់ ហើយរដូវវស្សាក៏ឈានមកដល់ដែរ។
ក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ លោក សុខ លូ មានប្រសាសន៍ថា បើគ្មានភ្លៀងធ្លាក់ និងអាកាសធាតុនៅតែបន្តក្ដៅហួតហែងក្នុងខេត្តកំពង់ធំទៀត ជំហានដំបូង នឹងរកប្រភពទឹកពីតំបន់ផ្សេងជួយដល់ដំណាំស្រូវរបស់ពលរដ្ឋ។ លោក ថ្លែងថា លើសពីនេះ សម្រាប់ដំណោះស្រាយរយៈពេលវែង នឹងអាចសាងសង់ទំបន់ស្ទាក់ទឹក ប៉ុន្តែគម្រោងត្រូវការអនុម័តដោយរដ្ឋាភិបាលនិងស្ថាប័នពាក់ព័ន្ធជាច្រើនទៀត៕