រដ្ឋបាលប្រធានាធិបតី ដូណាល់ ត្រាំ នៅថ្ងៃទី២៧ ខែឧសភា បានសម្រេចដកហូតឋានៈពិសេសរបស់ទីក្រុងរដ្ឋបាលពិសេសហុងកុងក្រោមច្បាប់អាមេរិក។ ការសម្រេចនេះ បើកផ្លូវឲ្យក្រុងវ៉ាស៊ីនតោនមានលទ្ធភាពកាត់ផ្ដាច់បុព្វសិទ្ធិពាណិជ្ជកម្មសម្រាប់ទីក្រុងមជ្ឈមណ្ឌលហិរញ្ញវត្ថុនេះ ខណៈសហរដ្ឋអាមេរិកបានចោទក្រុងប៉េកាំងថា ជាន់ឈ្លីស្វយ័តភាពរបស់ទីក្រុងនេះ ក្រោយប៉ងអនុម័តច្បាប់សន្តិសុខជាតិរបស់ហុងកុង។
ប៉ុន្មានម៉ោងប៉ុណ្ណោះក្រោយសភាចិន បានកំណត់រៀបចំការបោះឆ្នោតលើច្បាប់សន្តិសុខហុងកុងថ្មី រដ្ឋមន្ត្រីការបរទេស ម៉ៃ ប៉ុមប៉េអូ បានបញ្ជាក់ប្រាប់សភាអាមេរិកថា ទីក្រុងហុងកុង លែងបន្តទទួលបានប្រព្រឹត្តកម្មពិសេស (Special Treatment) ក្រោមច្បាប់សហរដ្ឋអាមេរិកតទៅទៀតហើយ ។ នេះគឺជាបុព្វសិទ្ធិពិសេសដែលទីក្រុងនេះទទួលបានក្រោយត្រូវប្រគល់ឲ្យចិនវិញពីសំណាក់ចក្រភពអង់គ្លេស ក្នុងឆ្នាំ១៩៩៧។
ក្រោមច្បាប់ថ្មីមួយដែលបានអនុម័តកាលពីឆ្នាំមុនក្នុងគោលដៅគាំទ្របាតុករហុងកុង រដ្ឋបាលអាមេរិក ចាំបាច់ត្រូវផ្ដល់ការបញ្ជាក់ថា ដែនដីហុងកុង ពិតជានៅតែបន្តទទួលបានសិទ្ធិសេរីភាព ដែលក្រុងប៉េកាំងសន្យាផ្ដល់ឲ្យ នៅពេលចរចាជាមួយរដ្ឋាភិបាលចក្រភពអង់គ្លេសប្រគល់ការគ្រប់គ្រងមកវិញ។ ក្នុងសេចក្តីថ្លែងការណ៍ លោករដ្ឋមន្ត្រី ប៉ុមប៉េអូ បញ្ជាក់ដូច្នេះថា៖«បច្ចុប្បន្ន គ្មានមនុស្សមានហេតុផលណាម្នាក់ អាចធានាបានថា ទីក្រុង ហុងកុង រក្សាស្វយ័តភាពកម្រិតខ្ពស់ពីចិន។ នេះគឺផ្អែកលើតថភាពជាក់ស្តែង»។
ការសម្រេចធ្វើនេះ មានន័យថា ទីក្រុងហុងកុង អាចបាត់បង់បុព្វសិទ្ធិពាណិជ្ជកម្មខ្លួន រួមមាន ការជាប់ពន្ធទាបជាងចិនដីគោក ជាមួយសហរដ្ឋអាមេរិកដែលមានសេដ្ឋកិច្ចធំបំផុតលើពិភពលោក។ សភាប្រជាជនចិន នៅថ្ងៃទី២៨ ខែឧសភា រំពឹងនឹងបោះឆ្នោតលើដំណោះស្រាយមួយដែលឈានដល់ការបង្កើតច្បាប់សន្តិសុខជាតិដែលនឹងហាមឃាត់ការផ្ដាច់ខ្លួន ការធ្វើវិទ្ធង្សនា អំពើភេរវកម្ម និងការជ្រៀតជ្រៀកពីសំណាក់បរទេស។ ទង្វើនេះគឺជាអ្វីដែលសកម្មជនហុងកុងអះអាងថា ជាការលុបបំបាត់សិទ្ធិមូលដ្ឋានរបស់ប្រជាជនហុងកុង និងស្វយ័តភាពរបស់ទីក្រុង។
«ខណៈសហរដ្ឋអាមេរិក ធ្លាប់សង្ឃឹមថា ទីក្រុងហុងកុងដែលសេរីនិងរីកចម្រើន នឹងផ្ដល់គំរូមួយសម្រាប់ប្រទេសផ្ដាច់ការចិន តែឥឡូវនេះ វាបញ្ជាក់ច្បាស់ថា ចិន កំពុងផ្ដល់គំរូខ្លួនឯងដល់ហុងកុង» ។ ប្រមុខការទូតអាមេរិក បញ្ជាក់បែបនេះ។
សូមបញ្ជាក់ថា ក្រោមគោលការណ៍ «ប្រទេសមួយ ប្រព័ន្ធពីរ» ដែលត្រូវបានព្រមព្រៀងមុនចក្រភពអង់គ្លេសប្រគល់ហុងកុងឲ្យចិនវិញ ស្វយ័តភាពរបស់ទីក្រុង លើកលែងកិច្ចការការពារជាតិ និងការបរទេស ត្រូវធានាយ៉ាងចាំបាច់ពីសំណាក់រដ្ឋាភិបាលចិន រហូតដល់ឆ្នាំ២០៤៧ មានជាអាទិ៍ប្រព័ន្ធតុលាការឯករាជ្យ និងកិច្ចការសេដ្ឋកិច្ចជាដើម។
ការបាត់បង់បុព្វសិទ្ធិដែលធានាដោយសហរដ្ឋអាមេរិកនេះ អាចប៉ះពាល់ធ្ងន់ធ្ងរលើទីក្រុងហុងកុង ជាពិសេសក្នុងទិដ្ឋភាពសេដ្ឋកិច្ចតែម្ដង។ ការធ្វើពាណិជ្ជកម្មទៅមកប្រមាណ៣៨ពាន់លានដុល្លាររាល់ឆ្នាំ រវាងសហរដ្ឋអាមេរិក និងទីក្រុងហុងកុង អាចជួបបញ្ហា។
ប្រធានសេដ្ឋវិទូប្រចាំតំបន់អាស៊ី នៃក្រុមហ៊ុន Daiwa Capital Markets ប្រាប់កាសែតអាមេរិក Washington Post ថា៖«យូរទៅ អ្នកជំនួញអាចគិតឡើងវិញ នៅពេលពួកគេចង់ធ្វើជំនួញ ក្នុងទីក្រុងហុងកុង»។ លោក Steve Tsang នាយកវិទ្យាស្ថានចិន នៃសកលវិទ្យាល័យក្រុងឡុងដ៍ អះអាងថា វានឹងក្លាយជាជម្រើសដ៏អន្តរាយមួយ ហើយជាចំណុចចាប់ផ្ដើម នៃអវសានរបស់ទីក្រុងហុងកុង៕