ខ្មែរក្រហម
ជាតិ
នួន ជា៖ ខ្ញុំគ្មានអំណាចតួនាទីផ្ទាល់អ្វីទាល់តែសោះក្នុងអំណាចនីតិប្រតិបត្តិ
× អង្គជំនុំជម្រះវិសាមញ្ញនៃសាលាក្តីខ្មែរក្រហម កំពុងដំណើរការសវនាការចុងក្រោយ នៃការបិទបញ្ចប់ការពិភាក្សាដេញដោល លើសំណុំរឿង០០២ ដំណាក់កាលទី១ នាថ្ងៃទី៣១ ខែធ្នូ ឆ្នាំ២០១៣នេះ។ ជនជាប់ចោទ នួន ជា បានថ្លែងបដិសេធនៅរាល់ការចោទប្រកាន់ជុំវិញតួនាទីសំខាន់របស់ខ្លួនក្នុងរបបកម្ពុជាប្រជាធិបតេយ្យ។
ជនជាប់ចោទរូបនេះ បានអះអាងថា ក្រោយថ្ងៃ១៧ ខែមេសា ឆ្នាំ១៩៧៥ ខ្លួនត្រូវបានតែងតាំងជាប្រធានសភាតំណាងប្រជាជនកម្ពុជាពិតមែន ប៉ុន្តែនាពេលនោះ ខ្លួនគ្មានអំណាចអ្វីក្នុងការសម្រេចលើអំណាចនីតិបញ្ញត្តិឡើយ។
នួន ជា បានលើកឡើងថា ខណៈដែលប្រទេសជាតិស្ថិតក្នុងកាលៈទេសៈនៃសង្គ្រាម ការអនុម័តច្បាប់នានាមិនត្រូវបានចាត់ទុកជាអាទិភាពឡើយ។ លោកបានបន្ថែមថា បក្សកុំម្មុយនីស្តកម្ពុជាមានគោលការណ៍ដឹកនាំរបស់ខ្លួន រីឯរដ្ឋាភិបាលមានអំណាចគ្រប់គ្រងប្រទេស។ លោកបានបញ្ជាក់ថា ក្នុងរដ្ឋាភិបាល ប៉ុលពតជាអ្នកក្តាប់អំណាចរួមដោយសារតែគាត់មានតួនាទីជាលេខាបក្ស និងជានាយករដ្ឋមន្ត្រី។ នួន ជា អះអាងថា៖ « គ្មានអ្នកណាជំនួសគាត់បានឡើយ។ ខ្ញុំក៏គ្មានអំណាចអ្វីដែរ»។
ក្រៅពីតួនាទីក្នុងស្ថាប័ននីតិបញ្ញត្តិ នួន ជា បានបដិសេធនូវការចោទប្រកាន់ថា ខ្លួនមិនដែលទទួលកាន់កាប់តំណែងជានាយករដ្ឋមន្ត្រីស្តីទីនោះឡើយ ព្រោះប៉ុល ពត មានឧបនាយករដ្ឋមន្ត្រីដែលត្រូវជំនួសរួមមានដូចជា អៀង សារី សុន សេន និង វ៉ន វ៉េត ជាដើម។
ទាក់ទងនឹងការចោទប្រកាន់ថា ខ្លួនធ្លាប់ប្រើអំណាចលើគណៈកម្មការយោធាមជ្ឈឹមលើការសម្លាប់រង្គាលនៅមន្ទីរស២១ ក៏ត្រូវបាន នួន ជា បដិសេធទាំងស្រុងផងដែរ។ នួន ជា បានអះអាង ថា៖ «ធម្មតាសន្តិសុខ ទាហាន មិនដែលស្តាប់អ្នកណាក្រៅពីមេបញ្ជាការរបស់ខ្លួនឡើយ។ និយាយឲ្យត្រង់ ឌុច មិនដែលស្តាប់ខ្ញុំទេ»។
នួន ជា បានលើកឡើងថា ការចោទប្រកាន់របស់ឌុច ថាធ្លាប់ស្ថិតក្រោមបញ្ជារបស់ខ្លួន គឺជាការគេចពីការទទួលខុសត្រូវ និងចង់ឲ្យគាត់ជាប់គុកមួយជីវិតផងដែរ។ លោកបានបន្ថែមថា ស្ថានភាពរបស់ឌុច ដែលស្ថិតក្នុងភាពអស់សង្ឃឹម មិនដែលនិយាយការពិតនោះទេ។
នួន ជា បានអះអាង ម្តងហើយ ម្តងទៀតថា ខ្លួនគ្មានអំណាចតួនាទីអ្វីទាល់តែសោះ។ ជនជាប់ចោទរូបនេះ បានគូសបញ្ជាក់ថា ការមើលព្រឹត្តិការណ៍តែជ្រុងម្ខាង គឺជាយុត្តិធម៌សម្រាប់អ្នកឈ្នះតែប៉ុណ្ណោះ។ «ការភ្ជាប់ស្ថានភាពនៃការធ្វើសង្គ្រាមជាប្រព័ន្ធ ម៉េចក៏មិនចោទប្រកាន់គូបដិបក្ខមួយផ្សេងទៀតទៅ?» នេះជាការលើកឡើងរបស់ នួន ជា ដោយបន្ថែមថា សហរដ្ឋអាមេរិក វៀតណាម និងថ្នាក់ដឹកនាំនៃភាគីផ្សេងទៀត គួរត្រូវរងនូវការចោទប្រកាន់ផងដែរ។
នួន ជា បានធ្វើការកត់សម្គាល់ថា ស្ថានភាពនៅក្នុងប្រទេសកម្ពុជា បើគិតចាប់តាំងពីសម័យអាណាព្យាបាលបារាំងមក សុទ្ធតែមានស្ថានភាពនៃឧក្រិដ្ឋកម្មទាំងអស់ ដោយប្រជាជនសុទ្ធតែទទួលរងទុក្ខ រួមទាំងព្រឹត្តិការណ៍ក្នុងខែកក្កដា ឆ្នាំ១៩៩៧ ផងដែរ៕ © រក្សាសិទ្ធិដោយ thmeythmey.com