ខ្មែរក្រហម
ជាតិ
លោក ហ៊ុន ម៉ានី៖ យើងត្រូវសិក្សាពីរបបខ្មែរក្រហមដើម្បីកុំឲ្យប្រវត្តិសាស្ត្រច្រំដែល លោក ហ៊ុន ម៉ានី លោក សួស យ៉ារ៉ា និងលោក ស សុខា
× លោក ហ៊ុន ម៉ានី (ស្តាំ) លោក ស សុខា (កណ្តាល) និងលោក សួស យ៉ារ៉ា
× តំណាងរាស្ត្រវ័យក្មេងរបស់គណបក្សប្រជាជនកម្ពុជាចំនួន៣រូប គឺលោក ហ៊ុន ម៉ានី លោក ស សុខា និងលោក សួស យ៉ារ៉ា បានចូលរួមស្តាប់ក្នុងសវនាការចុងក្រោយនៃសំណុំរឿង០០២ វគ្គ១ នៅសាលាក្តីខ្មែរក្រហម នាថ្ងៃទី៣១ ខែតុលា ឆ្នាំ២០១៣ នេះ។ គោលបំណងរបស់អ្នកតំណាងរាស្ត្រទាំងនេះ ដែលមានការចូលរួមផងដែរពីសំណាក់ក្រុមយុវជននៃសហភាពសហព័ន្ធយុវជនកម្ពុជា គឺដើម្បីស្វែងយល់ពីសវនាការជាប្រវត្តិសាស្ត្រ ជាពិសេសការឆ្លើយតបរបស់ជនជាប់ចោទ នួន ជា និងខៀវ សំផន។
បន្ទាប់ពីការថ្លែងរបស់ នួន ជា និងមុនឈានចូលដល់ការឆ្លើយតបរបស់ ខៀវ សំផន លោក ហ៊ុន ម៉ានី បាននិយាយប្រាប់អ្នកសារព័ត៌មានថា ការកាត់ទោសអតីតមេដឹកនាំខ្មែរក្រហម គឺពិតជាមានសារ សំខា ន់ ខ្លាំងណាស់ ដោយមិនមែនត្រឹមតែប្រទេសខ្មែរ ប្រជាជនខ្មែរទេដែលត្រូវចងចាំ គឺ ប៉ុន្តែអន្តរជាតិទាំង មូលតែម្តង។
អ្នកតំណាងរាស្ត្រវ័យ៣០ឆ្នាំរូបនេះ បានបន្ថែមថា៖ «របបខ្មែរក្រហមគឺជាប្រវត្តិសាស្ត្រដ៏ជូរចត់មួយ។ វាជាមេរៀនដែលត្រូវសិក្សាធ្វើយ៉ាងម៉េចជៀសវាងឲ្យផុតពីប្រវត្តិសាស្ត្រច្រំដែល»។ លោកបានកោតសរសើរផងដែរចំពោះភាពជោគជ័យនៃដំណើរការរបស់សាលាក្តីខ្មែរក្រហមក្នុងការស្វែងរកយុត្តិធម៌ដែលជនរងគ្រោះ។
ចំពោះការអះអាងរបស់ នួន ជា ដែលថាខ្លួនជាអនុលេខាបក្ស ហើយមិនអាចក្តាប់សភាពការណ៍នានាបាននោះ ត្រូវបានកូនប្រុសពៅរបស់សម្តេចនាយករដ្ឋមន្ត្រី ហ៊ុន សែន លើកឡើងថា វាជាសម្តីដើម្បីការពារខ្លួនក្នុងនាមជាជនជាប់ចោទតែប៉ុណ្ណោះ ប៉ុន្តែកត្តាជាក់ស្តែងគឺមនុស្សប្រមាណជាពីរលាននាក់បានស្លាប់។
លោក ហ៊ុន ម៉ានី បានគូសបញ្ជាក់ផងដែរថា មានសំណួរជាច្រើនដែលគេចង់ដឹងពីររបបខ្មែរក្រហម ប៉ុន្តែជនជាប់ចោទមិនបានឆ្លើយអស់ឡើយ ហើយវាក៏ជារឿងគួរឲ្យសោកស្តាយផងដែរ ប្រសិនបើពួកគេព្យាយាមកប់ទុករហូតដល់អស់ឱកាសបកស្រាយ ដូច្នេះរឿងរ៉ាវប្រវត្តិសាស្ត្រជាច្រើននឹងត្រូវបាត់បង់៕ © រក្សាសិទ្ធិដោយ thmeythmey.com