ជាតិ
សង្គមជាតិ
រដ្ឋបាលភ្នំពេញ គ្រោងដាំដើមឈើ៥ម៉ឺន តាមដងផ្លូវ ដើម្បីបង្កើនសោភ័ណភាពនិងកាត់បន្ថយជាតិពុល លោក ឃួង ស្រេង អភិបាលរាជធានីភ្នំពេញ កំពុងតែមានវត្តមានជាមួយនឹងបណ្តាមន្ត្រី ដែលកំពុងតែរៀបចំបង្គោលសម្រាប់ដាំដើមឈើនៅតាមបណ្តោយផ្ឡូវ
× ភ្នំពេញ៖ រដ្ឋបាលរាជធានីភ្នំពេញ នឹងដាំដើមឈើ៥ម៉ឺនដើម នៅតាមមហាវិថីមួយចំនួន ដើម្បីបង្កើនសោភ័ណភាព ឲ្យពោរពេញទៅដោយពណ៌បៃតង និងជួយកាត់បន្ថយជាតិពុល ក្នុងរាជធានីភ្នំពេញ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានបញ្ជាក់ថា ដើមឈើទាំង៥ម៉ឺនដើមនោះ អាជ្ញាធរ នឹងដាំនៅតាមដងមហាវិថីណា ដែលមានដើមឈើពុកផុយ ហើយជំនួសវិញដោយដើមឈើថ្មី។ លោក បន្តថា មហាវិថីណា ដែលពុំសូវមានដើមឈើ អាជ្ញាធរ នឹងដាំដើមឈើមួយចំនួនបន្ថែម។
អ្នកនាំពាក្យរូបនេះ អះអាងថា អាជ្ញាធរ ដើមឈើទាំង៥ម៉ឺនដើមនោះ ជាប្រភេទដើមឈើធ្នង់ ដើមត្រសេក ដើមអង្កាញ់ ដើមក្ងោក ដើមលឿងរាជ ដើមចំប៉ី ដើមក្រញូង ដើមត្របែកព្រៃ ដើមរំដួល ដើមគគីរ ដើមគីនីន ដើមច័ន្ទគីរី ដើមឈើទាល ដើមទុយលីប ដើមរាំង និង ដើមនាងនួន ជាដើម។
លោក មានប្រសាសន៍ដូច្នេះថា៖«យើង ពិនិត្យមើលថា ដាំ វាទើសលូអត់។ យើង រៀបចំផ្លូវ ទំហំប៉ុនណា ព្រោះផ្លូវ យើង អត់មានទំហំដូចគ្នាទេ ចិញ្ចើមផ្លូវនៅមុខផ្ទះក៏ខុសគ្នាដែរ»។
បើតាមអ្នកនាំពាក្យដដែល រដ្ឋបាលរាជធានីភ្នំពេញ ស្នើឲ្យពលរដ្ឋជួយថែទាំដើមឈើ ដែលស្ថិតនៅតាមចិញ្ចើមផ្លូវមុខផ្ទះរបស់ពលរដ្ឋរៀងៗខ្លួន និងស្នើឲ្យពលរដ្ឋចូលរួមរាយការណ៍ទៅអាជ្ញាធរ ក្នុងករណីដើមឈើណាពុកផុយ ឬរលំ។
លោក បន្តថា បើអ្នកណា ចង់តុបតែងដើមឈើ នៅមុខផ្ទះ ឬមុខក្រុមហ៊ុនខ្លួន ជាមួយភ្លើងលម្អសម្រាប់ពេលយប់ ដើម្បីបម្រើឲ្យប្រយោជន៍សង្គម គឺអាជ្ញាធរអនុញ្ញាត៕
Tag:
ដើមឈើ
សោភ័ណភាព
ផ្លូវ
© រក្សាសិទ្ធិដោយ thmeythmey.com