Man Utd ខកខានចូល Top 4 ក្រោយ Southampton វាយបកតាមស្មើចុងម៉ោង

កីឡាអន្តរជាតិ

អន្តរជាតិ

Man Utd ខកខានចូល Top 4 ក្រោយ Southampton វាយបកតាមស្មើចុងម៉ោង

14, Jul 2020 , 11:29 am

រូបភាព

ដោយ: ទេព ពិទូរ្យ

Manchester United បានខកខានឱកាសចូលក្នុងតំបន់ Top 4 ក្រោយ Southampton វាយបកតាមស្មើ ២-២ វិញនៅចុងម៉ោង នាការប្រកួត Premier League នៅយប់ថ្ងៃទី១៣ ខែកក្កដា។ ប្រសិនបើ Man Utd អាចរកបាន៣ពិន្ទុពីជំនួបនេះ ពួកគេនឹងដណ្តើមបានចំណាត់ថ្នាក់ទី៣ ពី Chelsea មិនខាន។

អត្ថបទទាក់ទង

បរាជ័យរបស់ Leicester និង Chelsea ផ្ដល់សង្ឃឹមខ្ពស់ឲ្យ ManUtd បានកៅអី Top 4

ក្នុងជំនួបក្របខណ្ឌលីគកំពូលអង់គ្លេសសប្តាហ៍ទី៣៥ នាកីឡដ្ឋាន Old Trafford ក្រុមភ្ញៀវ Southampton អាចរកគ្រាប់បាល់នាំមុខមុនតាំងពីនាទី១២ ដែលសម្រេចបានដោយខ្សែបម្រើ Stuart Armstrong។ ក្រោយនាំមុខរយៈពេល៨នាទី ក្រុមម្ចាស់ផ្ទះ Man Utd បានវាយបកយកស្មើវិញតាមរយៈការស៊ុតបញ្ចូលទីរបស់ខ្សែប្រយុទ្ធ Marcus Rashford មុនពេល Anthony Martial បន្ថែមគ្រាប់បាល់នាំមុខ ២-១ នៅ៣នាទីបន្ទាប់។

ចូលដល់វគ្គទី២ ក្រុមបិសាចក្រហមដែលមានលោក Ole Gunnar Solskjaer ជាអ្នកចាត់ការហើយត្រូវការ៣ពិន្ទុជាចាំបាច់ដើម្បីចូលទៅក្នុងតំបន់ Top 4 បានបើកការវាយសម្រុកយ៉ាងខ្លាំង ប៉ុន្តែពួកគេគេមិនអាចសម្រេចបានគ្រាប់បាល់បន្ថែមឡើយ។

ផ្ទុយទៅវិញមិនត្រឹមតែមិនអាចរកគ្រាប់បាន តែបែជាខកខានឱកាសមាសទៅវិញ បន្ទាប់ពីខ្សែប្រយុទ្ធ Michael Obafemi បានស៊ុត១គ្រាប់នៅចុងម៉ោងនៅនាទីបន្ថែម៩០+ ទៅហើយ ដើម្បីជួយ Southampton តាមស្មើ Man Utd ២-២ វិញ។

ការទទួលបានមួយពិន្ទុបន្ថែមនេះ មានន័យថាក្រុមបិសាចក្រហមនៅតែស្ថិតនៅចំណាត់ថ្នាក់ទី៥ ក្នុងតារាងលីគកំពូលអង់គ្លេសដដែលដោយរកបាន៥៩ពិន្ទុ ស្មើក្រុមលេខ៤ Leicester City ដែលមានប្រៀបដោយសារគ្រាប់បាល់ស៊ុតបញ្ចូលទី។ លទ្ធផលស្មើគ្នានេះដែរ ក៏បានធ្វើឲ្យក្រុមគូប្រជែង Leicester និង Chelsea ដែលឈរនៅចំណាត់ថ្នាក់ទី៣ មាន៦០ពិន្ទុ សប្បាយចិត្តមិនស្ទើឡើយ ព្រោះទាំងពីរក្រុមនេះនៅតែស្ថិតក្នុងតំបន់ Top 4 ដែលជាតំបន់អាចទទួលបានកៅអីលេងក្របខណ្ឌ Champions League រដូវកាលក្រោយ។

ទោះបីយ៉ាងណាក៏ដោយ ទាំង Man Utd, Leicester និង Chelsea ត្រូវបន្តបេសកកម្មដ៏សំខាន់រៀងៗខ្លួនដើម្បីប្រជែងកៅអីក្របខណ្ឌអឺរ៉ុបសម្រាប់ការប្រកួតលីគក្នុងស្រុក ៣ លើកចុងក្រោយ។ Wolves ដែលរកបាន៥៥ពិន្ទុ ក៏មានលទ្ធផលគួសមដើម្បីចូលរួមប្រជែងយកកៅអីកំពូលអឺរ៉ុបនេះផងដែរ

៣ប្រកួតចុងក្រោយរបស់ Man Utd ត្រូវជួប Crystal Palace, West Ham និងចុងក្រោយ Leicester City។

៣ប្រកួតរបស់ Leicester ចុងក្រោយត្រូវប៉ះ Sheffield Utd, Spurs និង Man Utd ហើយ Chelsea ប៉ះ Norwich City, Liverpool និង Wolves ឯ៣លើកចុងក្រោយរបស់ Wolves ជួប Burnley Crystal Palace និង Chelsea៕