អន្តរជាតិ
សមាជិកគណៈរដ្ឋមន្ត្រីថៃម្នាក់ទៀតហើយ នឹងលាលែងពីរដ្ឋាភិបាលលោក ប្រាយុទ្ធ
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីថៃ លោក Tewan Liptananlop (រូបពី៖ The Nation ថៃ)
×![]()
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីថៃ និងជាមេដឹកនាំបក្ស Char Pattana លោក Tewan Liptananlop បានប្រកាសលាលែងតំណែងនៅថ្ងៃទី ២០ ខែកក្កដានេះ ។ អ្នកនាំពាក្យបក្សលោកប្រាប់ទីភ្នាក់ងារព័ត៌មាន Reuters បែបនេះ ។ លោក Tewan នឹងក្លាយជាសមាជិកគណៈរដ្ឋមន្ត្រីទី៥ហើយរបស់រដ្ឋាភិបាលនាយករដ្ឋមន្ត្រី ប្រាយុទ្ធ ចន្ទអូចា ដែលសុំឈប់ក្នុងពេលមិនដល់មួយសប្តាហ៍ផងនោះ។
អ្នកនាំពាក្យបក្ស Chart Pattana អ្នកស្រី Yaowapa Boorapolchai បានប្រាប់ Reuters ថា ថ្នាក់ដឹកនាំបក្ស បានសម្រេចចិត្តថា លោក Tewan នឹងចាកចេញពីតំណែងលោក ដើម្បីត្រួសត្រាយផ្លូវសម្រាប់ការរុះរើគណៈរដ្ឋមន្ត្រី។
បក្ស Chart Pattana គឺជាបក្សមួយក្នុងចំណោមសម្ព័ន្ធភាពចំនួន២០របស់រដ្ឋាភិបាលដែលដឹកនាំដោយនាយករដ្ឋមន្ត្រី ប្រាយុទ្ធ ហើយបក្សនេះទទួលបានតែតំណែងក្នុងគណៈរដ្ឋមន្ត្រីតែមួយនេះប៉ុណ្ណោះ។
តាមការចុះផ្សាយរបស់កាសែតបាងកកប៉ុស្តិ៍ លោក Tewan និយាយថា លោកពុំរងសម្ពាធឲ្យលាលែងតំណែងឡើយ ហើយលោកនឹងគោរពតាមសេចក្តីសម្រេចរបស់បក្ស។ លោកសង្កត់ធ្ងន់ដូច្នេះថា៖«នេះគឺជាលះបង់របស់បក្សលោក ដូច្នេះប្រទេសអាចមានវឌ្ឍនភាព និងគ្មានសញ្ញានៃជម្លោះណាមួយ។ ម្យ៉ាងការលាលែងនេះ នឹងមិនប៉ះពាល់ដល់ស្ថិរភាពរដ្ឋាភិបាល ព្រោះថា បក្សលោក នឹងរក្សានៅក្នុងសម្ព័ន្ធភាពដដែល»។
តាមប្រភពដដែល លោក Tewan បានបញ្ជូនលិខិតលាលែងតំណែងទៅកាន់លោក ប្រាយុទ្ធ ហើយការលាលែងនេះ នឹងចូលជាធរមាននៅថ្ងៃទី ២១ ខែកក្កដា ។
លោក Tewan គឺជារដ្ឋមន្ត្រីទី៥ ហើយរបស់រដ្ឋាភិបាលលោក ប្រាយុទ្ធ ដែលចាកចេញពីតំណែងក្នុងពេលតិចជាងមុនសប្តាហ៍។ អ្នកចាកចេញមុនលោក មានលោក Somkid Jatusripital ដែលជាឧបនាយករដ្ឋមន្ត្រី លោក Uttama Savanayana រដ្ឋមន្ត្រីហិរញ្ញវត្ថុ លោក Sontirat Sontijirawon រដ្ឋមន្ត្រីថាមពល និងលោក Suvit Maesincee រដ្ឋមន្ត្រីឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍៕
Tag:
ថៃ
ប្រាយុទ្ធ ចន្ទអូចា
Tewan Liptapanlop
© រក្សាសិទ្ធិដោយ thmeythmey.com
