COVID-19
ជាតិ
COVID-19៖ ៤ករណីទៀតនៅកម្ពុជា មាន៣នាក់តេស្តលើកទី៦ទើបឃើញ និង១នាក់ទៀតតេស្តលើកទី៥ អ្នកស្រី ឱ វណ្ណឌីន អ្នកនាំពាក្យក្រសួងសុខាភិបាល
× ក្រសួងសុខាភិបាល នាព្រឹកថ្ងៃព្រហស្បតិ៍នេះ បានប្រកាសពីករណីវិជ្ជមានកូវីដ-១៩ ៤ករណីទៀតនៅកម្ពុជា។ បុរស៣នាក់ដែលមកពីរុស្ស៊ី កាលពីថ្ងៃទី១៤ ខែកក្កដា ហើយធ្វើចត្តាឡីស័កនៅមណ្ឌលហ្វឹកហ្វឺន និងបញ្ជូនសារក្នុងខេត្តកំពង់ស្ពឺ លទ្ធផលវិជ្ជមានទើបរកឃើញក្រោយតេស្តលើកទី៦ នាថ្ងៃទី១២ ខែសីហា រីឯបុរស១នាក់ទៀត បានមកពីឥណ្ឌូណេស៊ី និងសម្រាកព្យាបាលនៅមន្ទីរពេទ្យព្រះនរោត្តមសីហនុ ត្បូងឃ្មុំ កាលពីថ្ងៃទី២៣ ខែកក្កដា ហើយតេស្តលើកទី៥នៅថ្ងៃទី១២ ខែសីហា ទើបឃើញវិជ្ជមានកូវីដ-១៩។
បើតាមក្រសួងសុខាភិបាល បុរសទាំង៤នាក់នោះ មានអាយុចន្លោះពី២៦ ទៅ៣០ឆ្នាំ ដោយម្នាក់អាយុ២៦ឆ្នាំ មានអាសយដ្ឋាននៅខណ្ឌសែនសុខ រាជធានីភ្នំពេញ,ពីរនាក់មានអាយុ៣០ឆ្នាំ ដោយម្នាក់ស្នាក់នៅក្រុងសៀមរាប ខេត្តសៀមរាប,ម្នាក់ទៀតស្នាក់នៅស្រុកសំពៅលូន ខេត្តបាត់ដំបង និងម្នាក់ទៀតនៅភូមិអំពិល ឃុំប៉ឹស១ ស្រុកក្រូចឆ្មារ ខេត្តត្បូងឃ្មុំ។
ក្រៅពីមានអ្នកជំងឺថ្មី ក៏មានអ្នកជាសះស្បើយចំនួន៣នាក់ នៅថ្ងៃនេះ។ នេះបើតាមក្រសួងសុខាភិបាល។
គិតត្រឹមថ្ងៃទី១៣ សីហា កម្ពុជាមានអ្នកឆ្លងជំងឺកូវីដ-១៩ ចំនួន២៧២ករណីហើយ ក្នុងនោះអ្នកជាសះស្បើយ ២២៣នាក់ ដែលស្មើនឹង៨១.៩៩ភាគរយ។ ចំណែក៤៩នាក់ទៀតកំពុងបន្តការព្យាបាលនៅមន្ទីរពេទ្យមិត្តភាពខ្មែរ-សូវៀត, មណ្ឌលសុខភាពចាក់អង្រែ,មណ្ឌលសុខភាពខេត្តកំពង់ស្ពឺ ,មន្ទីរពេទ្យបង្អែកខេត្តត្បូងឃ្មុំ និងមន្ទីរពេទ្យរ៉ូយ៉ាល់ភ្នំពេញ៕
© រក្សាសិទ្ធិដោយ thmeythmey.com