ក្រសួង ដកបណ្ណសមធម៌ពីពលរដ្ឋជាង១ម៉ឺនគ្រួសារ ដោយសារមានជីវភាពប្រសើរឡើងវិញ

ជាតិ

ក្រសួង ដកបណ្ណសមធម៌ពីពលរដ្ឋជាង១ម៉ឺនគ្រួសារ ដោយសារមានជីវភាពប្រសើរឡើងវិញ

25, Sep 2020 , 11:29 pm

រូបភាព

ក្រុមជំនាញចុះជួបពលរដ្ឋនៅខេត្តសៀមរាប កាលពីថ្ងៃទី១០ កញ្ញា ២០២០។ រូបតំណាង ពីក្រសួងសង្គមកិច្ច)

ដោយ: ឡាយ សុភាវតី

ភ្នំពេញ៖ ក្រុមការងារជំនាញរបស់ក្រសួងសង្គមកិច្ច អតីតយុទ្ធជន និង យុវនីតិសម្បទា បានដកហូតបណ្ណសមធម៌ពីពលរដ្ឋជាង១ម៉ឺនគ្រួសារ បន្ទាប់ពីពិនិត្យឃើញថា ពួកគេ មានជីវភាពប្រសើរឡើងវិញ។ នេះបើតាមការបញ្ជាក់របស់លោក តូច ចាន់នី អ្នកនាំពាក្យក្រសួងសង្គមកិច្ច។

លោក តូច ចាន់នី ថ្លែងក្នុងកិច្ចសម្ភាសជាមួយសារព័ត៌មានថ្មីៗ តាមទូរស័ព្ទ នៅថ្ងៃទី២៥កញ្ញានេះ ថា៖«ពលរដ្ឋជាង១ម៉ឺន គ្រួសារមានជីវភាពប្រសើរឡើងវិញ គឺគាត់ផុតពីលក្ខខណ្ឌនៃភាពក្រីក្រ ទើបក្រុមការងារសម្រេចដកបណ្ណសមធម៌វិញ»។ ជាមួយគ្នានេះដែរ លោកបញ្ជាក់ថា ការឧបត្ថម្ភសាច់ប្រាក់ដល់ពលរដ្ឋក្រីក្រនៅអំឡុងពេលវិបត្តិកូវីដ-១៩ រយៈពេល៤ខែ ក្នុងជុំទី១និងជុំទី២ នឹងត្រូវបិទបញ្ចប់នៅខែកញ្ញានេះ ហើយជុំបន្ទាប់ គឺស្ថិតក្នុងការពិចារណា។

លោក មានប្រសាសន៍ថា«ចំពោះការអនុវត្តឧបត្ថម្ភសាច់ប្រាក់ដល់គ្រួសារក្រីក្រនៅជុំបន្ត ក្រុមការងារនឹងវាយតម្លៃ ដើម្បីពិភាក្សាថា គួរធ្វើយ៉ាងណាបន្ត ហើយបន្ទាប់ពីវាយតម្លៃហើយ ទើបរាយការណ៍ទៅប្រាប់ថ្នាក់លើឬសម្ដេច ហ៊ុន សែន ជាអ្នកសម្រេច»។

បើតាមអ្នកនាំពាក្យដដែល ពលរដ្ឋជាង៦២ម៉ឺនគ្រួសារបានទទួលការឧបត្តម្ភសាច់ប្រាក់ពីរដ្ឋាភិបាលតាមរយៈបណ្ណសមធម៌នៅខែសីហា ហើយក្នុងនោះគិតជាទឹកប្រាក់មានជាង២៨លានដុល្លារ។ អ្នកនាំពាក្យ ប្រាប់ថា គិតត្រឹមខែកញ្ញានេះ ពលរដ្ឋ ដែលមានបណ្ណសមធម៌ បានកើនឡើងដល់ប្រមាណ៧០ម៉ឺនគ្រួសារ។

កន្លងមក សម្តេចនាយករដ្ឋមន្ត្រី ហ៊ុន សែន ធ្លាប់បានប្រកាសថា រាជរដ្ឋាភិបាលត្រៀមថវិការហូតដល់១២៥លានដុល្លារ សម្រាប់រយៈពេល៥ខែ ដើម្បីជួយដល់ប្រជាពលរដ្ឋក្រីក្រអំឡុងពេលរងវិបត្តិកូវីដ-១៩។ សម្តេច ថែមទាំងបញ្ជាឲ្យមន្រី្តពាក់ព័ន្ធ ត្រូវយកចិត្តទុកដាក់ដោះស្រាយរាល់បញ្ហារបស់ពលរដ្ឋឲ្យបានទាន់ពេលវេលា៕