រយៈពេល៣ឆ្នាំចុងក្រោយនេះ គិតចាប់ពីឆ្នាំ២០១៧ ទីភ្នាក់ងារសហប្រតិបត្តិការអន្តរជាតិកូរ៉េ KOIKA ក៏បានអនុវត្តគម្រោងនេះឡើង ក្នុងថវិកាចំនួន៣លានដុល្លារផងដែរ តាមរយៈកិច្ចសហការជាមួយយូអេសស៊ីឌីស៊ី-USCDC និងទីភ្នាក់ងារជំនួយអាមេរិក USAID។ តាមរយៈគម្រោងកន្លងមកនេះ បានបង្កើតវគ្គបណ្ដុះបណ្ដាលស្រាវជ្រាវរកជំងឺឆ្លងដល់បុគ្គលិកសុខាភិបាលសាធារណៈចំនួន៦៩នាក់ ដោយសហការជាមួយនាយកដ្ឋានប្រយុទ្ធនឹងជំងឺឆ្លង និងអង្គការសុខភាពពិភពលោក។ ក្រោយបញ្ចប់វគ្គបណ្ដុះបណ្ដាល សិក្ខាកាមទាំងអស់ក៏ឲ្យធ្វើអនុវត្ត នៅគ្រប់បណ្ដាខេត្តទូទាំងប្រទេសរហូតមកដល់បច្ចុប្បន្ន។ 

 

សម្រាប់គម្រោងថ្មីនេះ ត្រូវបានព្រមព្រៀង និងចុះហត្ថលេខាដោយលោកស្រី ឱ វណ្ណឌីន រដ្ឋលេខាធិការនៃក្រសួងសុខាភិបាល និងលោក នោ ហ្យន់ជូន (RHO Hyunjun) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េប្រចាំប្រទេសកម្ពុជា។ គម្រោងរយៈពេល៦ឆ្នាំនេះ នឹងបន្តលើការបណ្ដុះបណ្ដាលអ្នកជំនាញផ្នែករោគរាតត្បាត តាមបណ្ដាស្រុកនានា ដើម្បីត្រួតពិនិត្យ និងតាមដានលើការផ្ទុះករណីឆ្លងណាមួយក្នុងតំបន់។ 

 

ក្រៅពីនេះ មន្ទីរពិសោធប្រព័ន្ធគ្រប់គ្រងគុណភាព (LQMS) និងមន្ទីរពិសោធប្រព័ន្ធព័ត៌មាន (LIS) នឹងកសាងក្នុងមន្ទីរពិសោធសាធារណៈ ចំនួន៤៩ ដើម្បីពង្រឹងសមត្ថភាពដឹកជញ្ជូនសំណាកវត្ថុវិភាគ។ នេះបើតាមការប្រកាសដដែលរបស់ KOICA ដោយរំពឹងថា មន្ទីរពិសោធសាធារណៈទាំងអស់នឹងមានបំពាក់ឧបករណ៍សម្រាប់ការធ្វើរោគវិនិច្ឆ័យត្រឹមត្រូវ និងអាចទុកចិត្តបាន។

 

បន្ថែមទៀតនោះ មជ្ឈមណ្ឌលប្រតិបត្តិការសង្គ្រោះបន្ទាន់ (EOC) ដែលមានតួនាទីសំខាន់ក្នុងវិបត្តិកូវីដ-១៩ ក៏បានការគាំទ្រផ្នែកហិរញ្ញវត្ថុ និងបច្ចេកទេសពីគម្រោងនេះ ដែលអាចជួយក្នុងដំណើរការពិសោធ និងវាយតម្លៃលើហានិភ័យ រួមទាំងប្រតិបត្តិការសង្គ្រោះបន្ទាន់ផងដែរ៕