អន្តរជាតិ
ការកើនឡើងកម្តៅផែនដី ធ្វើឲ្យសមុទ្រក្តៅជាងមុននិង ស្រូបឧស្ម័នកាបូនិកតិចជាងមុន រលកសមុទ្រ និងផ្ទាំងទឹកកក។ រូបតំណាង។ រូបភាព៖ Alamy
× ការកើនឡើងកម្តៅផែនដី ធ្វើឲ្យសីតុណ្ហភាពផ្ទៃខាងលើរបស់សមុទ្រកើនឡើង និងនាំឲ្យសមុទ្រកាត់បន្ថយសមត្ថភាពក្នុងការស្រូបយកឧស្ម័នកាបូនិក។ នេះយោងតាមការស្រាវជ្រាវរបស់អ្នកជំនាញបម្រែបម្រួលអាកាសធាតុ ដែលចុះផ្សាយនៅថ្ងៃទី២៨ ខែកញ្ញា។ ការស្រាវជ្រាវនេះ ក៏ព្រមានផងដែរថា ការកើនសីតុណ្ហភាពក្នុងសមុទ្រ នឹងបណ្តាលឲ្យប៉ះពាល់ផងដែរដល់ជីវិតសត្វសមុទ្រ។ នេះយោងតាមទីភ្នាក់ងារព័ត៌មាន AFP។
អត្ថបទស្រាវជ្រាវ ដោយអ្នកជំនាញ ចុះផ្សាយក្នុងព្រឹត្តិបត្រ Nature Climate Change បានបង្ហាញថាបម្រែបម្រួលអាកាសធាតុ នាំឲ្យកម្តៅនៅលើផ្ទៃដីកើនឡើង ដែលធ្វើឲ្យបរិយកាសអស្ថិរភាព ក៏ដូចជាបណ្តាលឲ្យគ្រោះមហន្តរាយដូចជាព្យុះកាន់តែមានលក្ខណៈធ្ងន់ធ្ងរជាងមុន។ ប៉ុន្តែសម្រាប់សមុទ្រ បម្រែបម្រួលអាកាសធាតុ និងការកើនឡើងកម្តៅពន្យឺតការលាយបញ្ចូលគ្នារវាងទឹកក្តៅ និងទឹកត្រជាក់ដែលសម្បូរអុកស៊ីសែន និងសារធាតុចិញ្ចឹមនានា។
ផលប៉ះពាល់ពីបម្រែបម្រួលអាកាសធាតុនេះ ធ្វើឲ្យទឹកត្រជាក់ដែលផ្ទុកអុកស៊ីសែនងើបមកផ្ទៃខាងលើនៃសមុទ្រកាន់តែតិចឡើង ចំណែកឯទឹកក្តៅនៅផ្ទៃខាងលើនៃសមុទ្រវិញស្រូបឧស្ម័នកាបូនិកកាន់តែតិចជាងមុន និងពុំសូវអាចកប់ឧស្ម័នកាបូនិកចោលក្នុងបាតសមុទ្រច្រើនដូចមុនបាន។ស្របពេលជាមួយគ្នានេះ ទឹកសមុទ្រក៏មានជាតិអាស៊ីតច្រើនជាងមុនផងដែរ ដែលធ្វើឲ្យការស្រូបឧស្ម័នកាបូនិកមានការធ្លាក់ចុះ។
លោក Michael Mann សាស្ត្រាចារ្យអាកាសធាតុ នៃសកលវិទ្យាល័យរដ្ឋPennsylvania ដែលជាអ្នកស្រាវជ្រាវមួយរូប បានលើកឡើងថា លទ្ធផលនៃការស្រាវជ្រាវនេះ បង្ហាញពីផលប៉ះពាល់យ៉ាងច្រើន និងគួរឲ្យបារម្ភ។ លោក Mann អះអាងថា នៅពេលដែលផ្ទៃទឹកសមុទ្រក្តៅជាងមុន វាក៏នឹងបណ្តាលឲ្យខ្យល់ព្យុះ មានសភាពសាហាវ និងបំផ្លិចបំផ្លាញកាន់តែខ្លាំងទៅ។ បន្ថែមពីនេះ សមុទ្រដែលក្តៅជាងមុនក៏បណ្តាលឲ្យងាប់ផ្កាថ្ម និងពន្លឿនការរលាយដុំ និងផ្ទាំងទឹកកក ដែលពន្លឿនការកើនឡើងកម្ពស់ទឹកសមុទ្រ។
សាស្ត្រាចារ្យរូបនេះ បន្ថែមថា ការដែលសមុទ្រស្រូបយកឧស្ម័នកាបូនិក កាន់តែតិច មានន័យថាឧស្ម័ននេះទៅផ្តុំកាន់តែច្រើនឡើងនៅក្នុងបរិយាកាស។ លោក Mann ក៏ព្រមានផងដែរថាគំរូនៃការសិក្សាពីអាកាសធាតុ ពុំសូវជារាប់បញ្ចូលកត្តាសមុទ្រ និងផលប៉ះពាល់របស់វា។ការស្រាវជ្រាវចុះផ្សាយកាលពីឆ្នាំមុន ដោយបណ្ឌិតសភាវិទ្យាសាស្ត្រអាមេរិក បានអះអាងថាបម្រែបម្រួលអាកាសធាតុ នឹងធ្វើឲ្យជីវិតសត្វក្នុងសមុទ្រចំនួន២០ភាគរយបាត់បង់ គិតត្រឹមឆ្នាំ២១០០។
គួរបញ្ជាក់ផងដែរថា សមុទ្រដែរតួនាទីយ៉ាងសំខាន់ក្នុងការគ្រប់គ្រងឧស្ម័ន និងសីតុណ្ហភាពរបស់ភពផែនដី យោងតាមក្រុមការងារអន្តររដ្ឋាភិបាលស្តីពីការប្រែប្រួលអាកាសធាតុ (IPCC)សមុទ្រស្រូបយក២៥ភាគរយ នូវឧស្ម័នកាបូនិក ដែលបញ្ចេញដោយមនុស្ស និង៩០ភាគរយនៃកម្តៅដែលបណ្តាលមកពីឧស្ម័នផ្ទះកញ្ចក់៕
© រក្សាសិទ្ធិដោយ thmeythmey.com