ជាតិ
អ្នកស្រុកវើនសៃ រស់នៅតាមបែបអនាម័យ ដោយការប្រើប្រាស់«បង្គន់»ត្រឹមត្រូវ
×![]()
ប្រជាពលរដ្ឋរស់នៅស្រុកវើនសៃ ខេត្តរតនគិរី បានផ្លាស់ប្ដូរទម្លាប់រស់នៅ តាមបែបអនាម័យ ក្រោយពីទទួលបានការអប់រំ ពីសំណាក់អង្គការភ្លែន។ ពលរដ្ឋដែលធ្លាប់តែបន្ទោបង់ពាសវាលពាសកាលនោះ បានចាប់ផ្ដើមរៀបចំ និងប្រើប្រាស់បង្គន់អនាម័យត្រឹមត្រូវ ដើម្បីកាត់បន្ថយផលប៉ះពាល់ដល់បរិស្ថាន និងសុខភាព។
ជាពលរដ្ឋជនជាតិដើមទំពួនរស់នៅឃុំក្រចូន ស្រុកវើនសៃ ខេត្តរតនគិរី អ្នកស្រី ហួត លីហួរ បានប្រើប្រាស់បង្គន់អនាម័យរយៈពេល៧ឆ្នាំហើយ បើគិតចាប់ពីឆ្នាំ២០១៣មក។ គ្រួសារអ្នកស្រី លីហួរ ទទួលបានសុវត្ថិភាពផ្លូវអារម្មណ៍ និងសុខភាព ក្រោយពីការប្រើប្រាស់បង្គន់អនាម័យនេះ។
សូមទស្សនាវីដេអូខាងក្រោម៖
ពលរដ្ឋជនជាតិដើមទំពួនអ្នកស្រី ហួត លីហួរ រស់នៅឃុំក្រចូន ស្រុកវើនសៃ ខេត្តរតនគិរី ៖«ពេលដែលយើងអត់ទាន់មានបង្គន់ យើងពិបាកទៅបត់ជើងតូច ជើងធំ ព្រោះបើខែភ្លៀងពិបាករឿងមូស ភក់ ភ្លៀង ។បើខែប្រាំង មានមនុស្សច្រើនតាមព្រៃ យើងខ្លាចពស់ផង និងមូសផង វាមានបញ្ហាច្រើន។ យើងប្រើបង្គន់អនាម័យមានអត្ថប្រយោជន៍ខ្លាំង ព្រោះអីវាងាយស្រួលជិតផ្ទះ ធានាសុវត្ថិភាពយើងផង ហើយយើងប្រើបង្គន់អនាម័យហ្នឹង វាជាជួយសុខភាពយើងទាំងអស់គ្នា»។
អ្នកស្រី ហួត លីហួរ ពលរដ្ឋជនជាតិដើមទំពួនរស់នៅឃុំក្រចូន ស្រុកវើនសៃ ខេត្តរតនគិរី
មិនមែនតែគ្រួសារធូរធារទេ ដែលមានបង្គន់អនាម័យប្រើប្រាស់នោះ សូម្បីគ្រួសារអ្នកស្រី ស៊ីណាន់ ណែត ដែលមានជីវភាពខ្សត់ខ្សោយ ក៏ឆ្លៀតចំណាយថវិកាដែលបានសន្សំទុក យកទៅរៀបចំបង្គន់ទំហំ៩ម៉ែត្រការ៉េ ដោយមានការជួយវិភាគទានខ្លះពីអង្គការភ្លែនផងដែរ។
អ្នកស្រី ស៊ីណាន់ ណែត ពលរដ្ឋជនជាតិដើមទំពួន រស់នៅឃុំក្រចូន ស្រុកវើនសៃ ខេត្តរតនគិរី
អ្នកស្រី ស៊ីណាន់ ណែត ពលរដ្ឋជនជាតិដើមទំពួន រស់នៅឃុំក្រចូន ស្រុកវើនសៃ ខេត្តរតនគិរី
ពលរដ្ឋជនជាតិដើមទំពួនអ្នកស្រី ស៊ីណាន់ ណែត រស់នៅឃុំក្រចូន ស្រុកវើនសៃ ខេត្តរតនគិរី ៖ «ពីមុនពិបាក តែឥឡូវឃើញថាស្រួល ពេលមានបង្គន់ហើយ អត់មានបញ្ហារាគរូស ក្អួត។ ពីមុនវា(មានជំងឺ)កើតអ៊ីចឹងមែន តែឥឡូវមានបង្គន់ហើយ អត់មានអីទេ វាចៀសផុតពីជំងឺច្រើន»។
អង្គការភ្លែន បានចុះផ្សព្វផ្សាយ និងអប់រំពីការប្រើប្រាស់« ទឹកស្អាតនិងអនាម័យ» នៅឃុំចំនួន៦ ក្នុងស្រុកវើនសៃ ខេត្តរតនគិរី។ ចាប់តាំងពីអង្គការភ្លែនចុះអប់រំពលរដ្ឋ ពីវិធានការអនាម័យមក ការរស់នៅរបស់ពួកគេចាប់ផ្ដើមមានភាពប្រសើរឡើង។ បើតាមលោក ហេង សាវឿន អភិបាលស្រុកវើនសៃ ពលរដ្ឋលែងជួបបញ្ហារាគរូស និងក្អួតចង្អោរ ដោយសារបញ្ហាកង្វះអនាម័យទៀតហើយ។
លោក ហេង សាវឿន អភិបាលស្រុកវើនសៃ «កន្លងមកពី ២០១៧ ដល់២០១៩ យើងឃើញថា ជំងឺរាគរូស ឬអាសន្នរោគ គឺមិនមានទៀតទេ។ ហើយសំខាន់ឃុំគោលដៅ ដែលយើងគិតថា មានបង្គន់ប្រើប្រាស់១០០ភាគរយហើយនេះ សឹងតែមិនមាន១ករណី ដែលកើតឡើងដោយសារការរាគរូស ឬប៉ះពាល់ដោយការបន្ទោបង់ពាសវាលពាសកាលទេ។ នេះជាអ្វីដែលខ្ញុំមើលឃើញ»។
លោក ហេង សាវឿន អភិបាលស្រុកវើនសៃ ខេត្តរតនគិរី
រយៈពេល៤ឆ្នាំចុងក្រោយនេះ ពលរដ្ឋមានការយល់ដឹងពីសុខភាពអនាម័យ និងផ្លាស់ប្តូរទម្លាប់រស់នៅ ប្រមាណ៧០ភាគរយហើយ ។ មន្ទីរអភិវឌ្ឍន៍ជនបទ ដែលបានសហការជាមួយអង្គការភ្លែន គ្រោងជំរុញឱ្យពលរដ្ឋអនុវត្តវិធានការអនាម័យឱ្យបាន៩០ភាគរយនៅឆ្នាំ២០២២។ នេះបើតាមលោក ម៉ៅ ដូរ៉ា ប្រធានការិយាល័យថែទាំសុខភាពនៃមន្ទីរអភិវឌ្ឍន៍ជនបទខេត្តរតនគិរី។
លោក ម៉ៅ ដូរ៉ា ប្រធានការិយាល័យថែទាំសុខភាពនៃមន្ទីរអភិវឌ្ឍន៍ជនបទខេត្តរតនគិរី
«យើងធៀបពីមុន មកដល់ពេលនេះ ការយល់ដឹងរបស់ពួកគាត់បានច្រើន ប្រហែលជា៧០ទៅ៨០ភាគរយហើយ រយៈពេលប្រហែលជា៤ឆ្នាំ ដែលគាត់បានវិវដ្ដ ពីការបន្ទោបង់ក្នុងព្រៃ មកប្រើប្រាស់ក្នុងបង្គន់ ហើយប្តូរទម្លាប់ពីការមិនលាងសម្អាតដៃសោះ គាត់បែរមកលាង។ គាត់មានការយល់ដឹងច្រើន។ ខ្ញុំឃើញគាត់ផ្លាស់ប្ដូរបទពិសោធន៍អ៊ីចឹង ខ្ញុំសប្បាយចិត្តជំនួសគាត់»។
គម្រោង«ទឹកស្អាតនិងអនាម័យ» របស់អង្គការភ្លែន ដែលមានកិច្ចសហការជាមួយមន្ទីរអភិវឌ្ឍន៍ជនបទ និងអង្គការ Save Vulnerable Cambodians គឺតែងតែចុះពិនិត្យតាមដាន និងវាយតម្លៃលើសកម្មភាពអនាម័យរបស់ពលរដ្ឋរៀងរាល់៣ខែម្ដង។ តំណាងអង្គការភ្លែនប្រចាំខេត្តរតនគិរី លោក អ៊ឹម ចាន់សុភាព ក៏ជំរុញឱ្យពលរដ្ឋចូលរួមអនុវត្តវិធានការអនាម័យទាំងអស់។
«អ្វីដែលសំខាន់! ខ្ញុំជំរុញលើកទឹកចិត្តឱ្យខាងជនបង្គោលភូមិ និងឃុំ សហការជាមួយអង្គការភ្លែន ឬអង្គការដៃគូរផ្សេងៗ ឬក៏អាជ្ញាធរស្រុក ជួយជំរុញនិងចុះតាមដាន ឬក៏ផ្សព្វផ្សាយពីទឹកស្អាតអនាម័យ នៅក្នុងភូមិ ឃុំរបស់ពួកគាត»៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
17 ម៉ោង
