ជាតិ
៩ខែឆ្នាំនេះ កម្ពុជានាំចេញអង្ករជិត៤៩ម៉ឺនតោនដោយកើនជិត២៣ភាគរយ
×
ដោយ៖ TTN25
ភ្នំពេញ៖ កម្ពុជានាំចេញអង្ករបានជិត ៤៩ម៉ឺនតោន ក្នុងរយៈបេល៩ខែឆ្នាំ២០២០ និងមានចំណូលចំនួន ៣២៨លានដុល្លារពីការនាំចេញនេះ។ របាយការណ៍សង្ខេបនៃការនាំចេញអង្ករ របស់សហព័ន្ធស្រូវអង្ករកម្ពុជាបញ្ជាក់ដូច្នេះ រួចបន្តបញ្ជាក់ថា ជាង៧៨ភាគរយ នៃអង្ករដែលបាននាំចេញ ជាប្រភេទអង្ករក្រអូប និងនាំចេញទៅប្រទេសចិនច្រើនជាងគេ បន្ទាប់មកសហភាពអឺរ៉ុប អាស៊ាន និងបណ្តាប្រទេសផ្សេងទៀត។
រយៈពេល៩ខែ ឆ្នាំ២០២០ កម្ពុជានាំចេញអង្ករបានចំនួន ៤៨៨,៧៨៥តោន កើនឡើងជិត២៣ភាគរយ ធៀបនឹងរយៈពេលដូចគ្នាក្នុងឆ្នាំ២០១៩ ដែលមានចំនួន៣៩៨,៥៨៦តោន។ កម្ពុជា ទទួលបានចំណូល ៣២៨លានដុល្លារ ពីការនាំចេញអង្ករនេះ។ នេះបើតាមរបាយការណ៍សង្ខេបនៃការនាំចេញអង្ករ ដែលផ្សាយដោយសហព័ន្ធស្រូវអង្ករកម្ពុជា។
តាមរបាយការណ៍ដដែល ប្រទេសចិន គឺជាទីផ្សារធំជាងគេ ដែលបាននាំចូលអង្ករពីកម្ពុជា ក្នុងចំណែក ៣៥ភាគរយនៃបរិមាណអង្ករសរុប ឬប្រមាណ ១៧១,៨៩៦ តោន។ ទីផ្សារធំទី២ គឺសហភាពអឺរ៉ុប ក្នុងចំណែក ៣៣ភាគរយ ក្នុងបរិមាណ១៦១,៦១៤តោន ដែលមានបារាំងទិញច្រើនជាងគេ ក្នុងចំណែក១៣ភាគរយនៃបរិមាណអង្ករដែលនាំទៅសហភាពអឺរ៉ុបសរុប។ នេះបើតាមរបាយការណ៍សង្ខេបដដែល។
ក្រៅពីនេះ គឺអង្ករកម្ពុជា ត្រូវបាននាំចេញទៅកាន់បណ្តាប្រទេសតំបន់អាស៊ាន និងទីផ្សារបណ្តាប្រទេសផ្សេងៗទៀតចំនួន ១៩គោលដៅ ក្នុងបរិមាណ ៨២,៨៣២តោន។ នេះបើតាមរបាយការណ៍ដដែល ដោយបន្តបញ្ជាក់ថា ជាង៧៨ភាគរយនៃអង្ករដែលបាននាំចេញ ជាប្រភេទអង្ករក្រអូប។
ចំណែកឯការនាំចេញអង្ករនៅក្នុងខែកញ្ញា វិញ សម្រេចបានចំនួន ៤០,៥៧២តោន ក្នុងនោះនាំទៅប្រទេសចិនច្រើនជាងគេ បន្ទាប់មកសហភាពអឺរ៉ុប អាស៊ាន និងបណ្តាប្រទេសផ្សេងទៀត៕
© រក្សាសិទ្ធិដោយ thmeythmey.com