ជាតិ
ពលរដ្ឋប្រមាណ៤០០គ្រួសារ នៅ៤សង្កាត់ ក្នុងខណ្ឌដង្កោ ត្រូវបានជម្លៀសមកកាន់ទីសុវត្ថិភាព
ការអន្តរាគមន៍របស់អាជ្ញាធរពាក់ព័ន្ធ នៅក្នុងសង្កាត់គងនយ ក្នុងខណ្ឌដង្កោ រាជធានីភ្នំពេញ នៅយប់ថ្ងៃទី១៣ តុលាឆ្នាំ២០២០។
×![]()
ដោយ: ឡាយ សុភាវតី
ភ្នំពេញ៖ ប្រជាពលរដ្ឋប្រមាណ៤០០គ្រួសារហើយ នៅក្នុងសង្កាត់ចំនួន៤ នៃខណ្ឌដង្កោ រាជធានីភ្នំពេញ ត្រូវបានជម្លៀសចេញទៅកាន់ទីទួលមានសុវត្ថិភាព ដោយសារទឹកជន់លិចខ្លាំង បណ្តាលពីភ្លៀងធ្លាក់ខ្លាំងផង និងជន់ហូរពីស្ទឹងព្រែកត្នោតផង។ លោក ឃួង ស្រេង អភិបាលរាជធានីភ្នំពេញ បានប្រាប់សារព័ត៌មានថ្មីៗ នៅយប់ថ្ងៃទី១៣តុលានេះ។
តាមលោកអភិបាលរាជធានីភ្នំពេញ ខណ្ឌសង្កាត់ទាំង៤នោះមាន សង្កាត់គងនយ, សង្កាត់ទៀន សង្កាត់ស្ពានថ្ម និងមួយផ្នែកនៃសាក់សំពៅ។ លោក ឃួង ស្រេង មានប្រសាសន៍ដូច្នេះថា៖«ឥឡូវនេះ សង្កាត់ចំនួន៣ បានលិចទាំងស្រុង គឺសង្កាត់គងនយ សង្កាត់ទៀន និងសង្កាត់ស្ពានថ្ម។ មួយផ្នែកទៀតនៃសង្កាត់សាក់សំពៅ ក៏មានមួយផ្នែកដែរលិច។ ឥឡូវនេះយើងកំពុងដាក់អូប៊័ររបស់កងកម្លាំងបញ្ជាការដ្ឋានអង្គរក្ស និងបញ្ជាការឯកភាពរាជធានី ដើម្បីត្រួតពិនិត្យតាមខ្នងផ្ទះ ថាតើនៅតាមផ្ទះណាដែលមិនទាន់ជម្លៀស យើងដឹកគាត់ចេញ»។
សូមជម្រាបថា ទឹកស្ទឹងព្រែកត្នោត ក្នុងខេត្តកណ្តាល និងនៅខាងលិចរាជធានីភ្នំពេញ ត្រូវបានប្រកាសថា បានឡើងដល់កម្រិតប្រកាសអាសន្ន ដោយសារបរិមាណទឹកហូរខ្លាំងមកពីផ្នែកខាងលើចូលក្នុងស្ទឹងបន្ថែម និងភ្លៀងធ្លាក់ខ្លាំងជាបន្តបន្ទាប់។ ដោយសារការជន់ជំនន់ស្ទឹងព្រែកត្នោត និងកម្ពស់ទឹកមានការកើនឡើង ក្រសួងធនធានទឹក និងឧតុនិយម បានអំពាវនាវឲ្យពលរដ្ឋរស់នៅតាមបណ្តោយសណ្តរទំនប់ និងផ្នែកខាងក្រោម បង្កើនការប្រុងប្រយ័ត្ន និងត្រៀមលក្ខណៈ ដើម្បីបញ្ជៀសគ្រោះថ្នាក់ជាយថាហេតុ ពីជំនន់ទឹកភ្លៀងនេះ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
