ជាតិ
សង្គមជាតិ
អភិបាលខណ្ឌដង្កោ យកវត្តប្រាសាទនិងវត្តចំបក់មាស ធ្វើជាទីទួលសុវត្ថិភាពសម្រាប់ជម្លៀសពលរដ្ឋ
អាជ្ញាធរខណ្ឌដង្កោជម្លៀសពលរដ្ឋ ទៅទីទួលសុវត្ថិភាព កាលពីយប់ថ្ងៃទី១៣តុលា ឆ្នាំ២០២០។ រូបថត៖សាលាខណ្ឌដង្កោ
×![]()
ភ្នំពេញ៖ ជំនន់ស្ទឹងព្រែកត្នោត និងកម្ពស់ទឹកដែលបន្តហក់ឡើងជាលំដាប់នេះ បានធ្វើឱ្យពលរដ្ឋរស់នៅក្នុងសង្កាត់មួយចំនួននៃខណ្ឌដង្កោ បង្ខំចិត្តចាកចេញពីលំនៅស្ថាន ទៅកាន់ទីទួលសុវត្ថិភាព នៅផ្ទះសាច់ញាតិនានា នៅរាជធានីភ្នំពេញ។ អាជ្ញាធរខណ្ឌដង្កោ ក៏បានជ្រើសរើស យកវត្តអារាមចំនួន២ ធ្វើជាទីទួលសុវត្ថិភាព សម្រាប់ជម្លៀសពលរដ្ឋរងគ្រោះ ដោយសារទឹកជំនន់ ។ 
អត្ថបទទាក់ទង
«បញ្ហាចំពោះមុខនេះ ខ្ញុំបានយកវត្តប្រាសាទ និងវត្តចំបក់មាស ធ្វើជាទីទួលសុវត្ថិភាព សម្រាប់ជម្លៀសពលរដ្ឋយើងដែលរងគ្រោះដោយទឹលជំនន់»។ នេះជាការលើកឡើងរបស់អ្នកស្រី គឹម ញឹប អភិបាលខណ្ឌដង្កោដែលបានប្រាប់សារព័ត៌មានថ្មីៗនាព្រឹកថ្ងៃទី១៤ ខែតុលា។ បើតាមអ្នកស្រីអភិបាលខណ្ឌដង្កោរូបនេះ វត្តប្រាសាទ និងវត្តចបក់មាសនៃភាគខាងត្បូងនៃខណ្ឌដងោ្កនេះ គឺសម្រាប់ដាក់ពលរដ្ឋរស់នៅ សង្កាត់គងនយ សង្កាត់ទៀន និងសង្កាត់ស្ពាន សង្កាត់សាក់សំពៅ ដែលស្ថានភាពទឹកជំនន់ធ្ងន់ធ្ងរជាងគេ។
បច្ចុប្បន្ន ថ្វីដ្បិតទីទួលសុវត្ថិភាពនៃវត្តអារាមទាំង២ខាងលើ បានត្រៀមរៀបចំរួចហើយក៏ពិតមែន ប៉ុន្តែមិនទាន់មានប្រជាពលរដ្ឋរងគ្រោះដោយសារទឹកជំនន់ បានជម្លៀសទៅទីនោះឡើយ។ ពលរដ្ឋរងគ្រោះភាគច្រើន គឺបានជម្លៀសចេញពីទីតាំងជន់លិច ទៅស្នាក់នៅផ្ទះញាត្តិ មិត្តភក្តិនានា នៅរាជធានីភ្នំពេញ។ នេះបើតាមអ្នកស្រី គឹម ញឹប។
គិតត្រឹមម៉ោង១០ព្រឹក នាព្រឹកថ្ងៃ១៤តុលា ឆ្នាំ២០២០ ឥទ្ធិពលទឹកជំនន់ស្ទឹងព្រែកត្នោត បានធ្វើឱ្យប៉ះពាល់ដល់ពលរដ្ឋចំនួន១,២៨១គ្រួសារ ដែលរស់នៅក្នុងសង្កាត់ទាំង១២ នៃខណ្ឌដង្កោ។
សូមជម្រាបថា ទឹកស្ទឹងព្រែកត្នោត ក្នុងខេត្តកណ្តាល និងនៅខាងលិចរាជធានីភ្នំពេញ ត្រូវបានប្រកាសថា បានឡើងដល់កម្រិតប្រកាសអាសន្ន ដោយសារបរិមាណទឹកហូរខ្លាំងមកពីផ្នែកខាងលើចូលក្នុងស្ទឹងបន្ថែម និងភ្លៀងធ្លាក់ខ្លាំងជាបន្តបន្ទាប់។ ដោយសារជំនន់ស្ទឹងព្រែកត្នោត និងកម្ពស់ទឹកមានការកើនឡើង ក្រសួងធនធានទឹក និងឧតុនិយម បានអំពាវនាវឲ្យពលរដ្ឋរស់នៅតាមបណ្តោយសណ្តរទំនប់ និងផ្នែកខាងក្រោម បង្កើនការប្រុងប្រយ័ត្ន និងត្រៀមលក្ខណៈ ដើម្បីបញ្ចៀសគ្រោះថ្នាក់ជាយថាហេតុ ពីជំនន់ទឹកភ្លៀងនេះ៕
Tag:
ជំនន់ទឹកភ្លៀង
ពលរដ្ឋ
ព្យុះ
ខណ្ឌដង្កោ
© រក្សាសិទ្ធិដោយ thmeythmey.com
