នៅថ្ងៃសៅរ៍នេះ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជាបាននាំជំនួយសប្បុរសធម៌ទៅប្រគល់ជូនប្រជាពលរដ្ឋរងគ្រោះដោយទឹកជំនន់ទឹកភ្លៀងនៅក្នុងខេត្តបន្ទាយមានជ័យ តាមរយៈរដ្ឋបាលខេត្តនេះ។ ប្រតិភូនៃសហភាពសហព័ន្ធយុវជនកម្ពុជា ត្រូវបានទទួលស្វាគមន៍ដោយលោក អ៊ុំ រាត្រី អភិបាលខេត្តបន្ទាយមានជ័យ។ ក្រោយពីបានជួបពិភាក្សាការងារ និងស្តាប់ពីស្ថានភាពនៃការលិចលង់នៅក្នុងខេត្តនេះ លោក ហ៊ុន ម៉ានី បានធ្វើដំណើរពិនិត្យមើលតំបន់លិចលង់ជាក់ស្តែងមួយចំនួនផងដែរ។
 

លោក សោម រតនា សមាជិកមួយរូបនៅក្នុងប្រតិភូសហភាពសហព័ន្ធយុវជនកម្ពុជា ដែលបានអមដំណើរលោក ហ៊ុន ម៉ានី ទៅខេត្តបន្ទាយមានជ័យ បានបញ្ជាក់ថា នៅក្នុងអំឡុងពេលដែលខេត្តមួយចំនួនបានទទួលរងការជន់លិច ថ្នាក់ដឹកនាំសហភាពសហព័ន្ធយុវជនកម្ពុជាបានបែងចែកគ្នាដើម្បីចូលរួមជាមួយអាជ្ញាធរខេត្តរងគ្រោះទាំងនោះ ក្នុងការជួយសង្គ្រោះពលរដ្ឋ និងផ្តល់ជំនួយសប្បុរសដល់ពួកគេ។
 

លោក សោម រតនា បានមានប្រសាសន៍បន្ថែមថា៖«នៅក្នុងជំនួបជាមួយជាមួយរដ្ឋបាលខេត្តបន្ទាយមានជ័យ ឯកឧត្តមអភិបាលខេត្តបានគូសបញ្ជាក់ថា សមាជិក ស.ស.យ.ក. សឹងតែបានក្លាយជាគ្រួសាររបស់អាជ្ញាធរខេត្តទៅហើយ ព្រោះពួកគេតែងមានវត្តមានចូលរួមជួយប្រជាពលរដ្ឋ រាល់ពេលដែលមានហេតុការណ៍រងគ្រោះម្តងៗ»។

 

 

ប្រធាន និងអនុប្រធាននៃចលនាយុវជនដើម្បីបុព្វហេតុជាតិមាតុភូមិ បាននិងកំពុងដឹកនាំការជួយសង្គ្រោះពលរដ្ឋរងគ្រោះក្នុងខេត្តពោធិ៍សាត់ ខេត្តប៉ៃលិន ខេត្តបាត់ដំបង ខេត្តបន្ទាយមានជ័យ និងតំបន់ផ្សេងទៀត។ នេះបើតាមការអះអាងរបស់លោក សោម រតនា ដដែល។
 

គួររំឭកថា លោក ហ៊ុន ម៉ានី ក្នុងនាមជាអ្នកតំណាងមណ្ឌលកំពង់ស្ពឺផង ក៏បានចុះពិនិត្យស្ថានភាពទឹកជំនន់ និងនាំជំនួយសប្បុរសធម៌ទៅផ្តល់ជូនអាជ្ញាធរខេត្តកំពង់ស្ពឺរួចហើយដែរ កាលពីពេលថ្មីៗនេះ។
 

ទន្ទឹមគ្នានេះ ប្រធានសហភាពសហព័ន្ធយុវជនកម្ពុជាក៏បានអំពាវនាវដល់សមាជិកសមាជិការនៅទូទាំងប្រទេសបន្តចូលរួមជួយអាជ្ញាធរមូលដ្ឋាន ក្នុងការជួយសង្គ្រោះជនរងគ្រោះដោយទឹកជំនន់ទឹកភ្លៀង៕

 
លោក ហ៊ុន ម៉ានី ចុះពិនិត្យមើលស្ថានភាពទឹកជំនន់នៅខេត្តបន្ទាយមានជ័យ៖