COVID-19
ជាតិ
សង្គមជាតិ
ក្រសួងការបរទេស ប្រាប់ឱ្យអ្នកកាសែត ដែលយកព័ត៌មាននាជំនួបប្រមុខការទូតកម្ពុជា-ហុងគ្រី ធ្វើតេស្តរកកូវីដ-១៩
លោក ប្រាក់ សុខុន រដ្ឋមន្ត្រីការបរទេសកម្ពុជា និងលោក Peter Szijjarto រដ្ឋមន្ត្រីការបរទេសហុងគ្រី កាលពីថ្ងៃទី៣ វិច្ឆិកា ២០២០ នាទីស្តីការក្រសួង
×![]()
ភ្នំពេញ៖ នាយប់ថ្ងៃទី៤ វិច្ឆិកា ក្រសួងការបរទេស និងសហប្រតិបត្តិការអន្តរជាតិ បានអំពាវនាវឱ្យអ្នកកាសែត ដែលចុះយកព័ត៌មាននាជំនួបរវាងលោក ប្រាក់ សុខុន រដ្ឋមន្ត្រីការបរទេសកម្ពុជា និងលោក Peter Szijjarto រដ្ឋមន្ត្រីការបរទេសហុងគ្រី កាលពីថ្ងៃទី៣ វិច្ឆិកា ទៅធ្វើតេស្តរកកូវីដ-១៩។ ការអំពាវនាវរបស់ក្រសួងនេះ ធ្វើឡើងក្រោយពីរដ្ឋមន្ត្រីការបរទេសហុងគ្រី លោក Peter Szijjarto ត្រូវបានរាយការណ៍ថា មានផ្ទុកកូវីដ-១៩ នៅពេលទៅដល់ប្រទេសថៃ។
ក្រសួងការបរទេស បានសម្របសម្រួលជាមួយក្រសួងសុខាភិបាល ដោយអនុញ្ញាតឱ្យអ្នកកាសែត ទៅធ្វើតេស្តសុខភាព នៅវិទ្យាស្ថានសុខភាពសាធារណៈ ដោយឥតគិតថ្លៃសេវាឡើយ។ លោក កួយ កុង អ្នកនាំពាក្យក្រសួងការបទេស បានបន្ថែមថា ក្រោយធ្វើតេស្តហើយ អ្នកកាសែតទាំងអស់ ត្រូវអនុវត្តតាមការណែនាំរបស់មន្ត្រីក្រសួងសុខាភិបាល។
ថ្លែងប្រាប់សារព័ត៌មានថ្មីៗ លោក កុយ គួង បានបញ្ជាក់ដូច្នេះថា៖«យើងសម្រួលឱ្យ(អ្នកកាសែត)បានទៅធ្វើតេស្ត ដើម្បីបញ្ជាក់យ៉ាងណានោះ គឺ(ក្រសួងសុខាភិបាល) គេមានគោលការណ៍របស់គេ។ ប៉ុន្តែយើងគ្រាន់តែជួយទាក់ទង(ក្រសួងសុខាភិបាល) ដើម្បីឱ្យពួកគាត់បានពិនិត្យសុខភាព»។
លោក អាត ចន្ធូ អ្នកសារព័ត៌មាននៃអគ្គនាយកដ្ឋានវិទ្យុជាតិកម្ពុជា បានទៅពិនិត្យសុខភាពតាមការអំពាវនាវរបស់ក្រសួងហើយ ប៉ុន្តែមិនទាន់ដឹងលទ្ធផលនោះទេ។ បើតាមលោក ចន្ធូ ខាងមន្ត្រីជំនាញសុខាភិបាល ក៏មិនបានហាម ឬកំណត់ឱ្យលោកធ្វើចត្តាឡីស័កខ្លួនឯងឡើយ ពោលគឺគ្រាន់តែសុំលេខទូរសព្ទ និងអាស័យដ្ឋានស្នាក់នៅរបស់លោក ដើម្បីទុកផ្ដល់ដំណឹងពីលទ្ធផលតេស្តតាមក្រោយប៉ុណ្ណោះ។
«ករណី(ចត្តាឡីស័កខ្លួនឯង)ហ្នឹង យើងក៏អត់ទាន់បានទទួល(ព័ត៌មានពីមន្ត្រីជំនាញសុខាភិបាល) ដូចគ្នា។ ប៉ុន្តែគ្រាន់តែថា បើយើងដឹងព័ត៌មាន(ពីការធ្វើចត្តាឡីស័ក)ហ្នឹង បើតាមខ្ញុំ គិតថាគួរតែបង្ការខ្លួនទៅ បើអាចនៅផ្ទះសិនទៅ ព្រោះធម្មតាយើងអត់ដឹងដូចគ្នា សំខាន់ទាល់តែចេញលទ្ធផលពីខាងពេទ្យសិនថា យើងអាចដើរហើយបានធម្មតាដូចមុន ឬក៏យ៉ាងម៉េច»។ នេះជាការបញ្ជាក់របស់លោក អាត ចន្ធូ អគ្គនាយកដ្ឋានវិទ្យុជាតិកម្ពុជា ។
លោក Peter Szijjarto រដ្ឋមន្ត្រីការបរទេសហុងគ្រី ដែលទើបតែបញ្ចប់ដំណើរទស្សនកិច្ចនៅកម្ពុជានេះ ត្រូវបានរកឃើញថា មានផ្ទុកកូរ៉ូណាវីរុស ក្នុងអំឡុងពេលដាក់ចត្តាឡីស័កពេលទៅដល់ប្រទេសថៃ។ បញ្ហានេះ បានធ្វើឲ្យជំនួបរវាងលោករដ្ឋមន្ត្រីការបរទេសហុងគ្រី និងនាយករដ្ឋមន្ត្រីថៃ លោកប្រយុទ្ធ ចាន់អូចា ត្រូវលុបចោល។
ក្រោយទទួលបានព័ត៌មានថា ប្រមុខការទូតហុងគ្រីនេះ មានកូវីដ-១៩ នោះ រដ្ឋាភិបាលកម្ពុជាបានសម្រេចឲ្យថ្នាក់ដឹកនាំ និងមន្ត្រីទាំងអស់ដែលបានជួបប្រាស្រ័យផ្ទាល់ជាមួយប្រតិភូរដ្ឋមន្ត្រីការបរទេសហុងគ្រី លោក Peter Szijarto ធ្វើចត្តាឡីស័ក តាមការកំណត់របស់ក្រសួងសុខាភិបាល។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ។
អត្ថបទទាក់ទង
មិនត្រឹមតែប៉ុណ្ណោះ សម្តេចនាយករដ្ឋមន្ត្រី ហ៊ុន សែន ក៏ប្រកាសដាក់ខ្លួននៅដាច់ដោយឡែករយៈពេល១៤ថ្ងៃដែរ ក្រោយពីសម្តេច និងសម្តេច ប៊ុន រ៉ានី ដែលជាភរិយា រួមទាំងអង្គរក្ស និងអ្នកបើកបរ សរុប១៨នាក់ តេស្តអវិជ្ជមានកូវីដ-១៩ នាការធ្វើតេស្កលើកដំបូង៕
Tag:
COVID-19
ហុងគ្រី
© រក្សាសិទ្ធិដោយ thmeythmey.com
