កីឡាអន្តរជាតិ
អន្តរជាតិ
Nadal ឈ្នះការប្រកួតវាយកូនបាល់លើកទី១០០០ ក្នុងអាជីព
× Rafael Nadal បានក្លាយជាកំពូលកីឡាករវាយកូនបាល់ទី៤ ដែលឈ្នះក្នុងការប្រកួតក្នុងកម្មវិធី ATP Tour លើកទី ១០០០ បន្ទាប់ពីផ្តួលមិត្តរួមជាតិអេស្ប៉ាញ Feliciano Lopez ក្នុងពានរង្វាន់ Paris Masters ប្រទេសបារាំង។
កីឡាករសញ្ជាតិអាមេរិក Jimmy Connors នាំមុខគេក្នុងចំណោមកីឡាករទាំង៤ដែលឈ្នះជាកំណត់ត្រា ១២៧៤ លើក តាមពីក្រោយដោយកីឡាករស្វ៊ីស Roger Federer ១២៤២លើក និងកីឡាករឆ្នើមរបស់ឆែក Ivan Lendl ១០៦៨ដង។
ការសម្រេចបានជ័យជម្នះជាលើកទី១០០០ក្នុងអាជីពកីឡាវាយកូនបាល់ បន្ទាប់ពី Nadal បានយកឈ្នះ Lopez ក្នុងលទ្ធផល ៤-៦ ៧-៦ និង៦-៤ នាការប្រកួត ATP Tour នៅថ្ងៃទី៤ ខែវិច្ឆកា វគ្គ៣២ក្រុមចុងក្រោយ។ កីឡាករសញ្ជាតិអេស្ប៉ាញបានបង្ហាញមោទកភាពសម្រាប់ខ្លួនឯង ដែលសម្រេចបានសមិទ្ធផលដ៏កម្រនេះក្នុងជីវិត។
«ជារឿងលំបាកបំផុតដើម្បីទទួលបានជ័យជម្នះជាលើកទី ១០០០។ ទម្រាំទទួលបានវា គឺអ្នកចាស់ណាស់ទៅហើយ ដ្បិតដើម្បីឈ្នះការប្រកួតចំនួន ១០០០ដង អ្នកត្រូវមានអាជីពយូរអង្វែង ហើយសម្រាប់ខ្ញុំគឺពិបាក ប៉ុន្តែខ្ញុំពិតជារីករាយខ្លាំងណាស់»។ នេះជាការអះអាងរបស់កំពូលកីឡាករវាយកូនបាល់លំដាប់ទី២ពិភពលោក វ័យ២៤ឆ្នាំ។
Nadal ត្រូវបានប្រគល់ជូននូវពានរង្វាន់កែវមួយដែលមានសរសេរលេខ ១០០០ ដើម្បីបញ្ជាក់ពីចំនួនតួលេខដែលរូបគេឈ្នះក្នុងការប្រកួតជាលើកទី១០០០នេះ។ Nadal ម្ចាស់ពាន Gram Slam ២០សម័យ ត្រូវបន្តទៅវគ្គ១៦ក្រុមដោយត្រូវជួបកីឡាករអូស្ត្រាលី Jordan Thompson៕
Tag:
Rafael Nadal
ATP Tour
© រក្សាសិទ្ធិដោយ thmeythmey.com