COVID-19
ជាតិ
លទ្ធផលតេស្តលើកទី២ សម្តេច ហ៊ុន សែន និងអ្នកនៅជាប់សម្តេច សុទ្ធតែអវិជ្ជមាន កូវីដ-១៩
× នៅថ្ងៃទី៩ ខែវិច្ឆិកា ២០២០ សម្តេចនាយករដ្ឋមន្ត្រី ហ៊ុន សែន បានបញ្ជាក់ក្នុងហ្វេសប៊ុកផ្ទាល់ខ្លួនថា លទ្ធផលតេស្តសំណាកលើកទី២ របស់សម្តេច និងភរិយា ព្រមទាំងអ្នកនៅជាមួយ និងអ្នកនៅជាប់សម្តេចទាំងអស់សុទ្ធតែអវិជ្ជមាន។ ពេលនេះ សម្តេច និងអ្នកពាក់ព័ន្ធបន្តធ្វើចត្តាឡីស័កហើយរង់ចាំការធ្វើតេស្តជាលើកទី៣នៅថ្ងៃទី១៤ វិច្ឆិកា និងលើកទី៤ នៅថ្ងៃទី១៨វិច្ឆិកា។
«ខ្ញុំកំពុងរង់ចាំលទ្ធផលនៃការធ្វើតេស្តបងប្អូនជិត ៩០០ នាក់ផ្សេងទៀតដែលបានប៉ះពាល់ដោយផ្ទាល់ ឬដោយប្រយោលពីព្រឹត្តិការណ៍ដែលខ្ញុំសូមដាក់ឈ្មោះថា ព្រឹត្តិការណ៍ ៣វិច្ឆិកា»។ នេះជាការបញ្ជាក់របស់ប្រមុខរដ្ឋាភិបាល។
បើតាមសម្តេច ព្រឹត្តិការណ៍៣វិច្ឆិកា នឹងត្រូវបិទបញ្ចប់ ក្រោយពេលដែលមានប្រមាណ៩០០នាក់ ដឹងលទ្ធផលតេស្ត ដែលត្រូវការពេលប្រមាណ៣សប្តាហ៍ទៀត។ ជាមួយគ្នា សម្តេច ហ៊ុន សែន បានលើកឡើងពីការចេញបទបញ្ជាឲ្យក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាល តាមដានអ្នកធ្វើចត្តាឡីស័កឲ្យបានដិតដល់ ដើម្បីទប់ស្កាត់ការប៉ះពាល់មនុស្សកាន់តែច្រើនទៀត។
«សូមកុំឲ្យកម្ទេចភ្លើងក្លាយជាអគ្គីភ័យតាមរយៈការធ្វេសប្រហែសរបស់យើង សូមជួយពន្លត់ភ្លើង និង សុំកុំអង្គុយបក់ផ្សែង។ ព្រឹត្តិការណ៍ ៣វិច្ឆិកានឹងបញ្ចប់ក្នុងខែវិច្ឆិកានេះ ដែលមិនត្រូវពន្យាពេល។ សូមជូនពរបងប្អូនជនរួមជាតិឃ្លាតឆ្ងាយពីកូវីដ-១៩»។ នេះជាការរំពឹងដ៏មុតមាំរបស់សម្តេចនាយករដ្ឋមន្ត្រី៕
© រក្សាសិទ្ធិដោយ thmeythmey.com