ក្រសួងមហាផ្ទៃ អនុញ្ញាតឲ្យស្នងការខេត្តកំពត បង្កើតទីលានហ្វឹកហាត់បាញ់គ្រាប់ពិត

ជាតិ

ក្រសួងមហាផ្ទៃ អនុញ្ញាតឲ្យស្នងការខេត្តកំពត បង្កើតទីលានហ្វឹកហាត់បាញ់គ្រាប់ពិត

10, Nov 2020 , 3:14 pm

រូបភាព

(រូបតំណាង៖ ពីទំព័រហ្វេសប៊ុករបស់កងពលតូចលេខ៧០)

ដោយ: ឡាយ សុភាវតី

ភ្នំពេញ៖ សម្ដេច ស ខេង រដ្ឋមន្រី្តក្រសួងមហាផ្ទៃ បានអនុញ្ញាតឲ្យស្នងការដ្ឋាននគរបាលខេត្តកំពត បង្កើតទីលានហ្វឹកហាត់បាញ់គ្រប់ពិតលើផ្ទៃដី៧ហិកតា ដើម្បីពង្រឹងសមត្ថភាពដល់កងកម្លាំងក្នុងខេត្ត។ នេះបើតាមការអះអាងរបស់លោក ខៀវ សុភ័គ អ្នកនាំពាក្យក្រសួងមហាផ្ទៃ។

លោក ខៀវ សុភ័គ ថ្លែងប្រាប់សារព័ត៌មានថ្មីៗតាមទូរស័ព្ទនៅថ្ងៃនេះថា ទីលានហ្វឹកហាត់បាញ់គ្រាប់ពិតឈ្មោះ ក្លិបបាញ់កាំភ្លើងបូកគោ បានសាងសង់ឡើងនៅជើងភ្នំកកេស ភូមិអូរតូច សង្កាត់អណ្ដូងខ្មែរ ក្រុងកំពត គឺរបស់ស្នងការដ្ឋាននគរបាលខេត្តកំពត។ លោកថា រាល់មួយត្រីមាសម្ដង ស្នងការខេត្តកំពត ត្រូវរាយការណ៍ពីដំណើរការសកម្មភាពនៅទីលានហ្វឹកហ្វឹន ទៅអគ្គស្នងការដ្ឋាននគរបាលជាតិ។

«ការបង្កើតទីលានហ្វឹកហាត់បាញ់គ្រប់ពិតនេះ សម្រាប់ពង្រឹងសមត្ថភាពដល់កងកម្លាំង។ ហើយ៣ខែម្ដង ស្នងការត្រូវរាយការណ៍អគ្គស្នងការដ្ឋាននគរបាលជាតិម្ដង ដើម្បីពិនិត្យរាល់សកម្មភាព»។ នេះបើតាមការលើកឡើងរបស់លោក ខៀវ សុភ័គ។

ទន្ទឹមនឹងនេះ លោក ម៉ៅ ច័ន្ទធុរិទ្ធ ស្នងការខេត្តកំពត ក៏បានបញ្ជាក់ប្រាប់សារព័ត៌មានថ្មីៗដែរថា ទីលានហ្វឹកហ្វឹននេះ សម្រាប់កងកម្លាំងក្នុងខេត្តពង្រឹងសមត្ថភាពនិងជំនាញប្រើប្រាស់អាវុធ។ លោកបន្តថា ទីលានហ្វឹកហ្វឹន គឺបានស្ថាបនា ប្រមាណ៣០ភាគរយហើយ ប៉ុន្តែថវិកាចំណាយលោកមិនអាចប៉ាន់ស្មានបានឡើយ ថានឹងត្រូវចំណាយប៉ុន្មានសម្រាប់បង្កើតទីលាននេះ។

«ការបង្កើតទីលានហ្វឹកហ្វឹននេះ ទីមួយសម្រាប់ហ្វឹកហាត់ ។ទី២សម្រាប់ឲ្យពួកគាត់(កងកម្លាំង)ដឹងពីការប្រើប្រាស់អាវុធ...អាចនិយាយបានថា អាចមានតែក្នុងខេត្តកំពតនេះទេ(ទីលានហ្វឹកហ្វឹនរបស់ស្នងការដ្ឋាននគរបាលប្រចាំខេត្ត) នៅទូទាំងប្រទេស»។ នេះបើតាមការឡើងរបស់លោកស្នងការខេត្តកំពត។

ទីលានហ្វឹកហ្វឹននេះ បង្កើតឡើងតាមការស្នើសុំពីខាងស្នងការដ្ឋាននគរបាលខេត្ត។ នេះបើតាមលោក ម៉ៅ ច័ន្ទធុរិទ្ធ ដោយបញ្ជាក់បន្ថែមថា ទូទាំងខេត្តកំពតមានកងកម្លាំងនគរបាលប្រមាណ១៧០០នាក់ ក្នុងនោះមានកងកម្លាំងអន្តរាគមន៍ពិសេសប្រមាណ១០០នាក់៕