កីឡាជាតិ
ជាតិ
វិសាខា ព្រះខ័នរាជស្វាយរៀង ភ្នំពេញក្រោន បរិច្ចាគប្រាក់រង្វាន់ខ្លួន ជួយជនរងគ្រោះដោយទឹកជំនន់ (រាប់ពីឆ្វេងទៅស្តាំ)លោកស្រី កែ សួនសុភី ប្រធានក្លិបបឹងកេត, លោក ឌី វិជ្ជា ប្រធានក្លិបព្រះខ័នរាជស្វាយរៀង, លោក ឬទ្ធី សំណាង ប្រធានក្លិបភ្នំពេញក្រោន
× ក្លិបបាល់ទាត់ធំៗចំនួនបីបានយកថវិកាលើកទឹកចិត្តបានពីការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគ និងពានរង្វាន់សម្តេច ហ៊ុន សែន បរិច្ចាគជូនកម្មវិធីសប្បុរសធម៌ ដើម្បីជួយជនរងគ្រោះដោយសារទឹកជំនន់នៅតាមបណ្តាខេត្ត ជាពិសេសខេត្តបន្ទាយមានជ័យ។ បន្ថែមលើនេះ ក្លិបភ្នំពេញក្រោនកាលពីថ្ងៃទី៩ ខែវិច្ឆិកា ក៏បានរៀបចំការប្រកួតបាល់ទាត់សប្បុរសធម៌ ដោយប្រមូលថវិកាបានជាង១០ម៉ឺនដុល្លារផងដែរ។
ក្លិបព្រះខ័ខរាជស្វាយរៀង វិសាខា និងភ្នំពេញក្រោន បានប្រកាសថា ខ្លួននឹងយកថវិកាទាំងអស់ ដែលជាប្រាក់រង្វាន់ពីការប្រកួតលីគ និងពានសម្តេច ហ៊ុន សែន ទៅជួយដល់ជនរងគ្រោះដោយសារទឹកជំនន់តាមបណ្តាខេត្ត។ នេះជាទង្វើសប្បុរសធម៌មួយដ៏ល្អ និងគួរឲ្យកោតសរសើរ ដែលក្លិបដទៃអាចយកធ្វើជាគំរូ ក្នុងកាលៈទេសៈប្រទេសកំពុងជួបវិបត្តិដូចបច្ចុប្បន្ន។
ក្នុងនោះថិវការបស់ក្លិបជើងឯករងលីគកំពូលឆ្នាំ២០២០ ព្រះខ័នរាជស្វាយរៀង មានចំនួន៦០លានរៀល, ម្ចាស់ជើងឯកពានសម្តេច ហ៊ុន សែន វិសាខា មានចំនួន១០០លានរៀល និងក្រុមលេខ៣លីគកំពូលភ្នំពេញក្រោនមានចំនួន៥០លានរៀល។ បន្ថែមក្លិបភ្នំពេញក្រោន ក៏បានផ្តល់ថវិកា១២ម៉ឺនដុល្លារ និងអង្ករ២០តោន ដែលបានពីការប្រកួតបាល់ទាត់សប្បុរសធម៌កាលពីថ្ងៃទី៩ វិច្ឆិកា ដើម្បីជួយជនរងគ្រោះទាំងនោះផងដែរ។ ថវិកា និងអង្ករទាំងនេះ បានពីការបរិច្ចាគរបស់សប្បុរសជន។
(រូបទី១)លោកឧកញ៉ា ឬទ្ធី សំណាង ទទួលលិខិតសរសើរពីលោក ហ៊ុន ម៉ាណែត ក្នុងកម្មវិធីប្រកួតបាល់ទាត់សប្បុរសធម៌, រូបភាពពីក្លិបភ្នំពេញក្រោន
ក្លិបព្រះខ័នរាជស្វាយរៀងសរសេររៀបរាប់លើទំព័រហ្វេសប៊ុកផ្លូវការដូច្នេះថា៖«មានជីវិតជាច្រើនទៀត ដែលសំខាន់ជាងបាល់ទាត់ ដូច្នេះហើយយើងសូមប្រកាសថា ក្លិបបាល់ទាត់ព្រះខ័នរាជស្វាយរៀង នឹងប្រើប្រាស់លុយប្រាក់រង្វាន់ ដែលបានមកពីការប្រកួតបាល់ទាត់ខេមបូឌានលីគ ជ័យលាភីលេខ២ យកទៅជួយជនរងគ្រោះដោយសារទឹកជំនន់នៅតាមបណ្តាខេត្ត។ ពួកយើងឆ្ពោះទៅមុខជាមួយគ្នា»។
មួយថ្ងៃក្រោយទទួលបានតំណែងជើងឯកពានសម្តេច ហ៊ុន សែន ពោលគឺនៅថ្ងៃទី៨ វិច្ឆិកា ឆ្នាំ២០២០ ក្លិបវិសាខាបានសរសេរលើហ្វេសប៊ុកផ្លូវការខ្លួនថា៖«ក្លិបកីឡាបាល់ទាត់វិសាខាមានកិត្តិយសសូមជម្រាបថា ពួកយើងនឹងបរិច្ចាគប្រាក់រង្វាន់ ១០០លានរៀល នៃជើងឯកពានរង្វាន់សម្ដេចអគ្គមហាសេនាបតីតេជោ ហ៊ុន សែន ឆ្នាំ២០២០ ដើម្បីជួយដល់បងប្អូនជនរងគ្រោះដោយសារជំនន់ទឹកភ្លៀង នៅខេត្តបន្ទាយមានជ័យ»។
ក្រៅពីក្លិបទាំងបីខាងលើ យើងសង្កេតឃើញក្លិបបាល់ទាត់មួយចំនួន ក៏បានលះបង់ថវិកា និងធនធានផ្ទាល់ខ្លួន ដើម្បីទិញសម្ភារ គ្រឿងឧបភោគ បរិភោគ សម្រាប់ចែកជូនដល់ជនរងគ្រោះដោយសារជំនន់ទឹកភ្លៀង កាលពីពេលកន្លងមកផងដែរ។ ជាក់ស្តែងក្លិបបាល់ទាត់បឹងកេតដែលជាម្ចាស់ជើងឯកលីគកំពូលកម្ពុជា កាលពីថ្ងៃទី១៨ តុលា ឆ្នាំ២០២០ បានសហការជាមួយសហភាពសហព័ន្ធយុវជនកម្ពុជារាជធានីភ្នំពេញ បានចែកអំណោយអ្នករងគ្រោះដោយសារជំនន់ទឹកភ្លៀងចំនួន២៥០គ្រួសារ នៅសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ៕
Tag:
បាល់ទាត់
វិសាខា
Hun Sen Cup 2020
© រក្សាសិទ្ធិដោយ thmeythmey.com