លោក បែ មករា លោក លី រ៉ាវី និង Paulo Victor រួមទាំងក្លិបបឹងកេត និងភ្នំពេញក្រោន រងពិន័យ

កីឡាជាតិ

ជាតិ

លោក បែ មករា លោក លី រ៉ាវី និង Paulo Victor រួមទាំងក្លិបបឹងកេត និងភ្នំពេញក្រោន រងពិន័យ

12, Nov 2020 , 10:59 pm

រូបភាព

លោក បែ មករា (ឆ្វេង) និងលោក លី រ៉ាវី ត្រូវបានគណៈកម្មការវិន័យពិន័យមិនឲ្យចូលរួមការប្រកួតលីគចំនួន៣ខែនៅរដូវកាលក្រោយ, រូបថតពីក្លិបបឹងកេត

ដោយ:

អគ្គលេខាធិការក្លិបបឹងកេតលោក បែ មករា និងលោក លី រ៉ាវី គ្រូជំនួយរបស់លោក គឺម ភក្តី ត្រូវបានគណៈកម្មការវិន័យនៃសហព័ន្ធកីឡាបាល់ទាត់កម្ពុជា ព្យួរមិនឲ្យចូលរួមការប្រកួតលីគកំពូលរដូវកាលឆ្នាំ២០២១ ចំនួន៣ខែ ក្រោយប្រព្រឹត្តអំពើប្រាសចាកក្រមសីលធម៌។ គណៈកម្មការនេះ ក៏បានពិន័យក្លិបបឹងកេត និងភ្នំពេញក្រោន មិនឲ្យមានទស្សនិកជនចូលរួមទស្សនាផ្ទាល់នៅរដូវកាលក្រោយរៀងៗខ្លួនផងដែរ។

ទោះបីការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគឆ្នាំ២០២០ បានចប់ជាស្ថាពរ ប៉ុន្តែក្នុងជំនួបចុងក្រោយរវាងក្រុមភ្នំពេញក្រោនជាមួយបឹងកេត ដែលបានបញ្ចប់ដោយភាពចម្រូងចម្រាសរហូតមានបង្កជាហិង្សាកាលពីថ្ងៃទី២៥ តុលា បានបន្សល់នូវការពិន័យសាមីក្លិប និងសមាជិក និងកីឡាករមួយចំនួន។

ក្នុងនោះលោក បែ មករា អគ្គលេខាធិការនិងលោក លី រ៉ាវី គ្រូជំនួយរបស់ក្លិបបឹងកេត ត្រូវបានគណៈកម្មការវិន័យរបស់សហព័ន្ធកីឡាបាល់ទាត់កម្ពុជាពិន័យដោយព្យួរមិនចូលរួមប្រកួតលីគកំពូលរដូវកាលឆ្នាំ២០២១ចំនួន៣ខែ និងពិន័យជាប្រាក់ម្នាក់ៗ៥០ម៉ឺនរៀល។ អ្នកទាំងពីរ ត្រូវបានចោទពីចូលរួមវាយតបលើគូប្រកួត ដែលផ្ទុយពីក្រមវិន័យរបស់សហព័ន្ធកីឡាបាល់ទាត់កម្ពុជា។

ចំណែកខ្សែប្រយុទ្ធរបស់ភ្នំពេញក្រោន Paulo Victor ដែលទើបចែកផ្លូវគ្នាកាលពីពេលថ្មីៗ ត្រូវបានពិន័យមិនចូលរួមប្រកួត៥ប្រកួតក្នុងលីគកំពូលឆ្នាំ២០២១ និងថវិកា៦០ម៉ឺនរៀល ក្រោយរូបគេរងការចោទពីបទចូលរួមបង្កជម្លោះវាយតប់ និងប្រឆាំងការសម្រេចរបស់មន្ត្រីការប្រកួត។ នេះបើតាមសេចក្តីប្រកាសព័ត៌មានរបស់គណៈកម្មការវិន័យរបស់សហព័ន្ធកីឡាបាល់ទាត់កម្ពុជានៅថ្ងៃទី១១ វិច្ឆិកា ឆ្នាំ២០២០។

ជាមួយគ្នានេះ គណៈកម្មការវិន័យបានពិន័យក្លិបបឹងកេត ដោយមិនអនុញ្ញាតឲ្យមានអ្នកគាំទ្រចូលទស្សនាផ្ទាល់ក្នុងជំនួបក្នុងដីចំនួន១ និងពិន័យជាប្រាក់ចំនួន១លានរៀល ក្រោមបទចោទមិនអាចគ្រប់គ្រងអ្នកគាំទ្ររបស់ខ្លួន បណ្តាលឲ្យពួកគេរត់ចូលទីលាន ដើម្បីអបអរគ្រាប់បាល់។

ដោយឡែក ក្លិបភ្នំពេញក្រោន ត្រូវបានគណៈកម្មការវិន័យ ពិន័យមិនឲ្យមានអ្នកគាំទ្រចូលរួមទស្សនាផ្ទាល់ក្នុងជំនួបក្នុងដីចំនួនពីរប្រកួតនៅរដូវកាលឆ្នាំ២០២១ និងពិន័យជាប្រាក់២លានរៀល។ ពួកគេត្រូវបានចោទពីបទមិនអាចទទួលខុសត្រូវលើអ្នកគាំទ្ររបស់ខ្លួន បណ្តោយឲ្យពួកគេរត់ចូលទីលាន គប់កាំជ្រួចផ្សែងចូលទីលាន ជេរប្រមាថ និងធាក់ទ្វារបន្ទប់អាជ្ញាកណ្ដាល រួមទាំងស្រែកគំរាមវាយអាជ្ញាកណ្ដាលជាដើម ដែលបង្កឲ្យមានអសន្ដិសុខ។

គណៈកម្មការវិន័យរបស់សហព័ន្ធកីឡាបាល់ទាត់កម្ពុជា ទុកពេលឲ្យសាមីក្លិប និងសមាជិករបស់ក្លិបទាំងពីរចំនួន៥ថ្ងៃ ដើម្បីប្តឹងឧទ្ធរណ៍ ក្នុងករណីមិនពេញចិត្តលើការពិន័យនេះ។ ប៉ុន្តែបើគ្មានការបណ្តឹងឧទ្ធរណ៍ទេ ការពិន័យនឹងចូលជាធរមាន៕