អន្តរជាតិ
នយោបាយអន្តរជាតិ
លោក ប៉ុមប៉េអូ ប៉ះទង្គិចសម្ដីជាមួយប្រមុខការទូតតួកគីក្នុងជំនួបណាតូ (ស្ដាំ) រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ចាប់ដៃជាមួយសមភាគីងតួកគី Mevlut Cavusoglu កាលពីដើមឆ្នាំ២០២០ ។ រូបពី AFP
× រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី២ ខែធ្នូ បានរិះគន់ខ្លាំងៗលើតួកគីនៅជំនួបរដ្ឋមន្ត្រីរបស់អង្គការណាតូ។ ការប៉ះទង្គិចសម្ដីគ្នា ត្រូវបានមន្ត្រីជាន់ខ្ពស់ចូលរួមជំនួបនេះចាត់ទុកថា ក្តៅគគុក។
តួកគី បានប្រឈមការរិះគន់ជុំវិញជំហរខ្លួនក្នុងបញ្ហាជម្លោះដែនសមុទ្រប្រទេសក្រិក ដែលជាសមាជិកអង្គការណាតូដែរ ក៏ដូចជាការគាំទ្ររបស់រដ្ឋាភិបាលតួកគី ចំពោះប្រទេសអាស៊ែប៉ែហ្សង់ក្នុងជម្លោះដែនដីកាលពីថ្មីៗនេះជាមួយអាមេនី។ បណ្ដាសមាជិកអង្គការណាតូ និងសហភាពអឺរ៉ុបខ្លះ ដោយលើកលែងតែបារាំងចេញ មានភាពប្រយ័ត្នប្រយែងមុនរិះគន់រដ្ឋាភិបាលប្រធានាធិបតី Recep Tayyip Erdogan ដោយខ្លាចក្រែងថា នឹងបង្កើនភាពតានតឹងកាន់តែធ្ងន់ធ្ងរលើសដើម។
យ៉ាងណាមិញ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ដែលចូលរួមកិច្ចប្រជុំណាតូលើកចុងក្រោយនោះ ខណៈរដ្ឋបាលលោកប្រធានាធិបតី ដូណាល់ ត្រាំ នឹងអស់អាណត្តិនាខែក្រោយ ពុំរអែងក្នុងប៉ះសម្តីគ្នាជាមួយរដ្ឋមន្ត្រីការបរទេសតួកគី Mevlut Cavusoglu នោះឡើយ។
មន្ត្រីជាន់ខ្ពស់ដែលចូលរួមក្នុងជំនួបណាតូដែលធ្វើឡើងតាមប្រព័ន្ធអនឡាញ បានប្រាប់ទីភ្នាក់ងារព័ត៌មាន AFP ថា លោក ប៉ុមប៉េអូ បានចោទតួកគីថា បានរុញច្រានអង្គការណាតូឲ្យធ្លាក់ចូលក្នុងដៃសត្រូវ តាមរយៈទិញប្រព័ន្ធការពារមីស៊ីល S-400 របស់រុស្ស៊ី ហើយលោកក៏បានទទូចឲ្យរដ្ឋាភិបាលក្រុងអង់ការ៉ា រៀបចំខ្លួនឲ្យសមជាសម្ព័ន្ធមិត្តមួយរបស់អង្គការណាតូ ។
«ការធ្វើអន្តរាគមន៍របស់លោក ខ្លី តែខ្លឹម»។ មន្ត្រីជាន់ខ្ពស់ម្នាក់ បានប្រាប់ទីភ្នាក់ងារព័ត៌មាន AFP បែបនេះ ដោយសុំមិនបញ្ចេញឈ្មោះ ដ្បិតកិច្ចប្រជុំណាតូនេះជាកិច្ចប្រជុំការទូតបិទទ្វារ។ ប្រភពមួយទៀតដែលដឹងរឿងនេះ បានចាត់ទុកថាការប៉ះទង្គិចសម្ដីរវាងលោកប៉ុមប៉េអូ និងលោក Cavusoglu ថាជារឿងក្ដៅគគុក។
ទោះបីជាបែបនេះ អ្នកនាំពាក្យក្រសួងបរទេសអាមេរិក ពុំបានបដិសេធ ឬទទួលស្គាល់ការអះអាងរបស់ក្រុមអ្នកចូលរួមក្នុងកិច្ចប្រជុំណាតូទាំងនេះឡើយ។
គួររម្លឹកដែរថា លោក ប៉ុមប៉េអូ ដែលបានធ្វើទស្សនកិច្ចនៅទីក្រុងប៉ារីស កាលពីខែមុន បានប្រាប់កាសែតក្នុងស្រុកបារាំងមួយថា លោកបានជជែកជាមួយប្រធានាធិបតី អេម៉ានុយអែល ម៉ាក្រុង ហើយបានយល់ស្របគ្នាថា សកម្មភាពតួកគីនៅក្នុងជម្លោះអាស៊ែប៉ែហ្សង់-អាមេនី ជាទង្វើដ៏គឃ្លើនបំផុតមួយ ។
កាលពីជំនួបកំពូលណាតូ កាលពីខែធ្នូ ឆ្នាំ២០១៩ ក្នុងទីក្រុងឡុងដ៍ ប្រធានាធិបតីបារាំង ក៏បានប៉ះទង្គិចពាក្យសម្ដីជាមួយលោក Erdogan ផងដែរ ក៏ប៉ុន្តែមេដឹកនាំតួកគីរូបនេះ ត្រូវបានរាយការណ៍ថាត្រូវបានចេញមុខការពារពីសំណាក់លោក ត្រាំ៕
Tag:
អាមេរិក
តួគកី
ណាតូ
© រក្សាសិទ្ធិដោយ thmeythmey.com