អ្នកទៅហាត់ប្រាណនៅសួនច្បារវិមានឯករាជ្យ ថយចុះ ក្រោយផ្ទុះព្រឹត្តិការណ៍២៨វិច្ឆិកា

COVID-19

ជាតិ

អ្នកទៅហាត់ប្រាណនៅសួនច្បារវិមានឯករាជ្យ ថយចុះ ក្រោយផ្ទុះព្រឹត្តិការណ៍២៨វិច្ឆិកា

07, Dec 2020 , 9:59 pm

រូបភាព

ដោយ៖ ហុង ស្រីណា

COVID19៖ ក្រោយមានករណីឆ្លងជំងឺកូវីដ-១៩ ចូលសហគមន៍ក្នុងប្រទេសកម្ពុជា ឬហៅថា ព្រឹត្តិការណ៍សហគមន៍២៨វិច្ឆិកា ការហាត់ប្រាណតាមទីសាធារណៈ និងការធ្វើដំណើរតាមដងផ្លូវ មានការថយចុះ។

ពលរដ្ឋមួយចំនួន ដែលតែងទៅហាត់ប្រាណនៅសួនច្បារវិមានឯករាជ្យ ផ្តល់ព័ត៌មានដូចគ្នា ដល់សារព័ត៌មានថ្មីៗ២៥ (Thmeythmey25) ថា ក្រោយផ្ទុះព្រឹត្តិការណ៍សហគមន៍២៨វិច្ឆិកា អ្នកទៅហាត់ប្រាណនៅទីនោះ ហាក់ថយចុះ ហើយបើទោះបីជាអ្នកខ្លះ នៅតែបន្តទៅហាត់ប្រាណក្តី ក៏ពួកគេ ប្រុងប្រយ័ត្នក្នុងការការពារខ្លួនពីជំងឺកូវីដ-១៩ដែរ ដូចជា ហាត់ប្រាណ ដោយនៅឆ្ងាយពីគ្នា និងពាក់ម៉ាស់ ជាដើម។

លោក អ៊ុង សោភ័ណ្ឌ ដែលតែងទៅហាត់ប្រាណជាប្រចាំ នៅសួនច្បារមុខវិមានឯករាជ្យ ប្រាប់សារព័ត៌មាន អ្នកមកហាត់ប្រាណមានការថយចុះជាងមុនប្រមាណ៤០ភាគរយ ក្រោយមានការផ្ទុះឡើងនូវព្រឹត្តិការ២៨វិច្ឆិកា។ លោក និយាយថា៖«ខ្ញុំ ក៏មានការភ័យខ្លាចដែរ ដោយពីមុនខ្ញុំមិនសូវពាក់ម៉ាស់ទេ ប៉ុន្តែឥឡូវ ខ្ញុំពាក់ម៉ាស់ជាប្រចាំ ព្រោះលើកនេះវាធ្ងន់ធ្ងរជាងរាល់ដង»។

លោក បន្ថែមថា៖«ទន្ទឹមនឹងការភ័យខ្លាច ខ្ញុំនៅតែបន្តមកហាត់ប្រាណទីនេះជាធម្មតា ដោយសារវាជាតំបន់វាល ដូច្នេះ មេរោគកូវីដ-១៩ មិនអាចនៅកន្លែងនេះបានយូរទេ ហើយខ្ញុំក៏មានការពាក់ម៉ាស ដើរហាត់ប្រាណរក្សាគម្លាត សម្អាតខ្លួននិងបាញ់អាល់កុលមុនពេលចេញពីផ្ទះ រួមទាំងពេលត្រឡប់ទៅវិញផងដែរ»។

ចំណែក នារីឈោះកញ្ញា សុលីនដា ដែលតែងទៅហាត់ប្រាណជារៀងរាល់ថ្ងៃនៅសួនច្បារវិមានឯករាជ្យដែរនោះ ប្រាប់ថា នៅតែបន្តទៅហាត់ប្រាណ ដោយបានរក្សាអនាម័យ ដូចជា ការពាក់ម៉ាស់ ប្រើស្ព្រាយបាញ់ខ្លួនសម្លាប់មេរោគ និង ដើរហាត់ប្រាណរក្សាគម្លាត ជាដើម។ នារីរូបនេះ និយាយថា៖«ពេលខ្ញុំទៅក្រៅញុំាអី ខ្ញុំតែងតែសម្អាត តុ កៅអី ស្លាបព្រាឲ្យបានស្អាតល្អ និងលាងដៃបានញឹកញាប់»។

នារីខាងលើ សង្កេតឃើញថា ក្រោយផ្ទុះព្រឹត្តិការណ៍សហគមន៍២៨វិច្ឆិកា អ្នកដែល ទៅហាត់ប្រាណ មានប្រុងប្រយ័ត្នរៀងៗខ្លួន ដោយអនុវត្តតាមវិធានការរបស់ក្រសួងសុខាភិបាល ក្នុងការការពារខ្លួនពីជំងឺកូវីដ-១៩ ដូចជា ការរក្សាគម្លាតពីគ្នា ពេលដើរហាត់ប្រាណ ជាដើម។

លោកស្រី ដា ជាអាជីវករមួយរូប ដែលលក់ភេសជ្ជៈ និងពងមាន់ នៅសួនច្បារវិមានឯករាជ្យ មានប្រសាសន៍ថា ការលក់ដូររបស់លោកស្រី បានថយចុះច្រើន។ លោកស្រី ប្រាប់ថា ពីមុន លោកស្រី អាចលក់បាន១០ម៉ឺនរៀលក្នុង១ថ្ងៃ ប៉ុន្តែក្រោយពេលមានព្រឹត្តិការណ៍សហគមន៍២៨វិច្ឆិកា លោកស្រី លក់បានត្រឹមតែ១ម៉ីន ទៅ ២ម៉ឺនរៀលប៉ុណ្ណោះ ក្នុង១ថ្ងៃ។

អាជីវកររូបនេះ និយាយថា៖«អ្នកមកហាត់ប្រាណមានសភាពស្ងប់ស្ងាត់ ដោយសារគេមិនហ៊ានចេញក្រៅ។ ចំណែកអ្នកមកហាត់ប្រាណវិញ ក៏មិនសូវទិញ ពីព្រោះគេមានទឹកសម្រាប់ញុំាផ្ទាល់ខ្លួន។ សម្រាប់ខ្ញុំជាអ្នកលក់ដូរ ខ្ញុំពាក់ម៉ាស់ លាងដៃជាមួយអាល់កុល ពាក់ស្រោមដៃពេលហុចទឹកឲ្យភ្ញៀវ និងមិនឲ្យភ្ញៀវលូកដៃចូលធុងទឹកឡើយ ដើម្បីការពារសុវត្តិភាពទាំងអស់គ្នា»។

គួរបញ្ជាក់ផងដែរថា ក្រសួងអប់រំ យុវជន និង កីឡាបានណែនាំឲ្យពលរដ្ឋ ផ្អាកទៅហាត់ប្រាណ និងលេងកីឡានៅបរិវេណពហុកីឡដ្ឋានជាតិអូឡាំពិក ចាប់ពីថ្ងៃទី៧ ដល់ថ្ងៃទី១២ ខែធ្នូ។ នោះក៏ព្រោះតែក្រសួងសុខាភិបាល បានយកពហុកីឡដ្ឋានជាតិអូឡាំពិក សម្រាប់ធ្វើតេស្តសុខភាពលើអ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា៕