សមាសភាពក្រុមប្រឹក្សាជាតិ និងគណៈប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍

ជាតិ

នយោបាយជាតិ

សមាសភាពក្រុមប្រឹក្សាជាតិ និងគណៈប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍

17, Dec 2020 , 7:29 pm

រូបភាព

ដោយ: រួបរួម

កាលពីថ្ងៃទី១៤ ខែធ្នូ សម្តេចនាយករដ្ឋមន្ត្រី ហ៊ុន សែន បានចេញសេចក្តីសម្រេចស្តីពីការតែងតាំងសមាសភាពនៃក្រុមប្រឹក្សាជាតិវិទ្យាសាស្ត្រ បច្ចេកទេស និងនវានុវត្តន៍ ដែលសម្តេចផ្ទាល់ជាប្រធានកិត្តិយស។ ក្រុមប្រឹក្សាជាតិនេះដែរ មានគណៈប្រឹក្សាយោបល់ ដែលមានលោក ឆែម គាតរិទ្ធី ជាប្រធាន។

ក្រុមប្រឹក្សាជាតិវិទ្យាសាស្ត្រ បច្ចេកទេស និងនវានុវត្តន៍ (ក.ជ.វ.ប.ន) ត្រូវបានបង្កើតឡើងដោយព្រះរាជក្រឹត្យចុះកាលពីថ្ងៃទី១០ ខែតុលា ឆ្នាំ២០២០ នៅក្រោយការបង្កើតក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ នាថ្ងៃទី២០ ខែមីនា ឆ្នាំ២០២០។

ក.ជ.វ.ប.ន មានតួនាទីជាសេនាធិការរដ្ឋាភិបាលលើការអភិវឌ្ឍវិទ្យាសាស្ត្រ បច្ចេកទេស និងនវានុវត្តន៍ ដោយមានសិទ្ធិប្រើរូបសញ្ញា និងត្រា ដោយឡែករបស់ខ្លួន ហើយការចំណាយសម្រាប់ដំណើរការរបស់ស្ថាប័ន ត្រូវផ្គត់ផ្គង់ដោយថវិកាជាតិក្នុងគម្រោងថវិការបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

លោក ឆែម គាតរិទ្ធី អនុប្រធានអចិន្ត្រៃយ៍ ក.ជ.វ.ប.ន និងជាប្រធានគណៈប្រឹក្សាយោបល់។ រូបថត វិទ្យាស្ថានការទូត

តាមសេចក្តីសម្រេចរបស់សម្តេច ហ៊ុន សែន កាលពីថ្ងៃទី១៤ ខែធ្នូ ឆ្នាំ២០២០ សម្តេចនាយករដ្ឋមន្ត្រីផ្ទាល់ មានតួនាទីជាប្រធានកិត្តិយស ហើយលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ ជាប្រធាន។

រដ្ឋមន្ត្រី៥រូបទៀតជាអនុប្រធាន ក្នុងនោះមាន លោក ឆាយ ថន លោក ម៉ម ប៊ុនហេង លោក ស៊ុយ សែម លោក វេង សាខុន លោក ហង់ជួន ណារ៉ុន និងលោក ជា វ៉ាន់ដេត។ លោក ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ ទទួលបន្ទុកជាអនុប្រធានអចិន្ត្រៃយ៍។

ក្នុងចំណោមសមាជិក២៩នាក់របស់ ក.ជ.វ.ប.ន មានសមាសភាពជារដ្ឋលេខាធិការ អនុរដ្ឋលេខាធិការ តាមបណ្តាសក្រសួងពាក់ព័ន្ធចំនួន១៦នាក់។ សមាជិកផ្សេងទៀតរួមមាន លោក គិត ម៉េង ប្រធានសភាពាណិជ្ជកម្មកម្ពុជា លោក ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី រួមទាំងថ្នាក់ដឹកនាំគណៈកម្មាធិការ វិទ្យាស្ថាន សាកលវិទ្យាធិការ ព្រឹទ្ធបុរសមហាវិទ្យាល័យដែលពាក់ព័ន្ធ។ លោក ហ៊ុល សៀងហេង អគ្គនាយកនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ ជាសមាជិកអចិន្ត្រៃយ៍។

ជាមួយគ្នានេះ ក.ជ.វ.ប.ន មានគណៈប្រឹក្សាយោបល់ ដែលប្រមូលផ្តុំដោយឥស្សរជន បញ្ញវន្ត និងអ្នកជំនាញគ្រប់មជ្ឈដ្ឋាន ដើម្បីជួយការងារ ឬផ្តល់យោបល់។ កាលពីថ្ងៃទី១ ខែធ្នូ ព្រះករុណា ព្រះមហាក្សត្រ ក៏បានចេញព្រះរាជក្រឹត្យ តែងតាំង និងផ្តល់ឋានៈដែលឥស្សរជន និងបញ្ញវន្តទាំងនោះផងដែរ។

លោក ឆែម គាតរិទ្ធី ជាប្រធានគណៈប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍ ហើយលោក ចែម ផល្លា ជាអនុប្រធាន ឋានៈស្មើរដ្ឋលេខាធិការ បន្ថែមលើមុខងារបច្ចុប្បន្ន។ ក្នុងចំណោមសមាជិក២១នាក់ មាន៥នាក់ឋានៈស្មើរដ្ឋលេខាធិការ ១០នាក់ឋានៈស្មើអនុរដ្ឋលេខាធិការ និង៦នាក់ឋានៈស្មើអគ្គនាយក៕