យានអវកាសចិនឆាងអឺ៥ ដឹកសំណាកដីពីឋានព្រះចន្ទមកផែនដីវិញដោយជោគជ័យ

សង្គមអន្តរជាតិ

អន្តរជាតិ

យានអវកាសចិនឆាងអឺ៥ ដឹកសំណាកដីពីឋានព្រះចន្ទមកផែនដីវិញដោយជោគជ័យ

17, Dec 2020 , 9:59 pm

រូបភាព

បំណែកយានឆាងអឺ៥ ចុះនៅតំបន់ស្វយ័តម៉ុងហ្គោលីខាងក្នុងនៅថ្ងៃទី១៧ ខែធ្នូ។ រូបភាព Xinhua

ដោយ:

បេសកម្មរបស់យានអវកាសចិន «ឆាងអឺ ៥» ទទួលជោគជ័យ ក្រោយដឹកយកសំណាករឹងពីឋានព្រះចន្ទត្រលប់មកផែនដីវិញ។ ជោគជ័យនេះ ធ្វើជាចិនក្លាយជាប្រទេសទី៣ហើយលើពិភពលោក ដែលមានសមត្ថភាពប្រមូលថ្មពីឋានព្រះចន្ទមកសិក្សាស្រាវជ្រាវស៊ីជម្រៅ។ នេះក៏ជាសំណាកដីពីឋានព្រះចន្ទថ្មីបំផុតដែរ។

អត្ថបទទាក់ទង

យានអវកាសចិន «ឆាងអឺ ៥» ចតលើឋានព្រះចន្ទដើម្បីប្រមូលសំណាករឹងមកផែនដីវិញ

យានអវកាសចិនដែលដឹកសំណាកពីឋានព្រះចន្ទ បានចុះចតលើទឹកចិនត្រង់តំបន់ស្វយ័តម៉ុងហ្គោលីខាងក្នុង កាលពីម៉ោង ១៖៣០ នាទីព្រឹក (ម៉ោងក្នុងស្រុកចិន) ថ្ងៃទី១៧ ខែធ្នូ ។ នេះបើតាមទីភ្នាក់ងារព័ត៌មានរដ្ឋចិន Xinhua ។ សំណាកនេះ ត្រូវបានប្រមូលចេញពីទីតាំងមួយនៃឋានព្រះចន្ទ ដែលពុំទាន់មានគេទៅដល់ឡើយ ដោយស្គាល់ថា «មហាសមុទ្រព្យុះ (Ocean of Storms)»។

យានអវកាសដែលដាក់ឈ្មោះតាម ឈ្មោះទេពធីតាព្រះចន្ទបុរាណចិន ត្រូវបានបាញ់បង្ហោះកាលពី២៤ ខែវិច្ឆិកា លើក្បាលរ៉ុក្កែត ឈ្មោះថា «Long March-5Y» នៅឯទីលានបាញ់បង្ហោះរ៉ុក្កែត Wenchang នៅខេត្ត Hainan ។ ជាជោគជ័យមួយរបស់ចិននេះ វាក្លាយជាបេសកកម្មទីមួយក្នុងពេល៤៤ឆ្នាំចុងក្រោយ ដែលអ្នកវិទ្យាសាស្ត្របានប្រមូលសំណាករឹងពីភពព្រះចន្ទមកកាន់ភពផែនដី។

សំណាករឹងដែលប្រមូលបានចន្លោះពី២ទៅ៤គីឡូក្រាមនេះ អាចជួយឲ្យអ្នកវិទ្យាសាស្ត្រស្វែងយល់កាន់តែច្បាស់ពីដើមកំណើតរបស់ឋានព្រះចន្ទ ក៏ដូចជាធ្វើជាមូលដ្ឋានគ្រឹះសម្រាប់បេសកកម្មស្រាវជ្រាវអវកាសស្មុគស្មាញក្រោយៗទៀត។ បើតាមទីភ្នាក់ងារព័ត៌មានចិន Xinhua ទីភ្នាក់អវកាសចិន ក៏នឹងចែករំលែកទិន្នន័យសិក្សានិងវិភាគរបស់សំណាករឹងពីឋានព្រះចន្ទទៅអ្នកវិទ្យាសាស្ត្រក្នុងប្រទេសដទៃផងដែរ។

ជាមួយគ្នានេះ អ្នកវិទ្យាសាស្ត្រចិន ក៏បានគិតគូរផែនការសម្រាប់អនាគតនៃការសិក្សាស្រាវជ្រាវលើឋានព្រះចន្ទ ជាអាទិ៍ ផែនការសាងសង់ស្ថានីយ៍ស្រាវជ្រាវមួយលើឋានព្រះចន្ទ។ នាយករងនៃរដ្ឋបាលអវកាសជាតិចិន (CNSA) លោក Pei Zhaoyu និយាយដូច្នេះថា៖«យើងសង្ឃឹមសហការជាមួយប្រទេសផ្សេងទៀតដើម្បីកសាងស្ថានីយ៍ស្រាវជ្រាវឋានព្រះចន្ទអន្តរជាតិមួយ ដែលអាចបម្រើជាវេទិកាចែករំលែកសម្រាប់ការរុករកបែបវិទ្យាសាស្ត្រលើឋានព្រះចន្ទ និងការពិសោធបច្ចេកវិទ្យា»។

ជោគជ័យរបស់បេសកកម្មរបស់ យានអវកាស «ឆាងអឺ ៥» នេះ បានប្រែក្លាយចិនជាប្រទេសទី៣លើពិភពលោកដែលអាចមានសមត្ថភាពប្រមូលសំណាករឹងពីឋានព្រះចន្ទមកសិក្សានៅលើផែនដី បន្ទាប់ពីអាមេរិក និងអតីតសហភាពសូវៀត ។

ក្នុងកម្មវិធីអវកាស អាប៉ូឡូ ដែលបានបញ្ជូនមនុស្សទៅជាន់ដីឋានព្រះចន្ទលើកដំបូង អាមេរិក បានបញ្ជូនអ្នកអវកាស១២នាក់ ក្នុងជើងហោះហើរចំនួន៦ ចន្លោះពីឆ្នាំ១៩៦៩ និងឆ្នាំ១៩៧២។ ក្នុងបេសកកម្មនេះ ពួកគេបាននាំយកថ្ម និងដីលើឋានព្រះចន្ទសរុប ៣៨២ គីឡូក្រាមមកផែនដីដើម្បីសិក្សាស្រាវជ្រាវ។ ចំណែក អតីតសហភាពសូវៀត បានបញ្ជូនបេសកកម្មប្រមូលសំណាករឹងពីឋានព្រះចន្ទ៣ជើង ក្នុងទសវត្សរ៍ឆ្នាំ១៩៧០ ហើយប្រមូលបានតែ១៧០ក្រាមប៉ុណ្ណោះ។

ការបង្ហោះយានអវកាសឆាងអឺ ៥ គឺជាការចតលើឋានព្រះចន្ទដោយជោគជ័យលើកទី៣ហើយរបស់ចិន។ យាន ឆាងអឺ ៤ កាលពីឆ្នាំ២០១៩ ក្លាយជាយានបេសកកម្មទីមួយដែលចតលើផ្នែកឆ្ងាយមួយរបស់ព្រះចន្ទ ដែលពុំសូវមានគេទៅស្រាវជ្រាវដល់។ យានឆាងអឺ ៣ ត្រូវបានបាញ់បង្ហោះកាលពីឆ្នាំ២០១៣។ ដោយឡែក ការបង្ហោះចុងក្រោយបង្អស់របស់ គឺរួមសហការជាមួយទីភ្នាក់ងារអវកាសអឺរ៉ុប ដែលកំពុងជួយតាមដានបេសកកម្មនេះ។

ក្នុងឆ្នាំ២០០៣ ចិន បានក្លាយជាប្រទេសទី៣ ដែលបញ្ជូនអ្នកអវកាសទៅកាន់គន្លងតារាវិថីរដោយខ្លួនឯង ក្រោយអតីតសហភាពសូវៀត និងអាមេរិក។ ចិនក៏បានបាញ់បង្ហោះស្ថានីយ៍សម្រាប់អ្នកអវកាសផងដែរ៕