អាជ្ញាធរ ប្រាប់ឲ្យពន្យារពេលជាលើកទីពីរ ខណៈសង្គមស៊ីវិល នៅតែចង់ប្រារព្ធទិវាសិទ្ធិមនុស្ស នៅថ្ងៃ២០ធ្នូ

ច្បាប់ / សិទិ្ធមនុស្ស / តុលាការ

ជាតិ

អាជ្ញាធរ ប្រាប់ឲ្យពន្យារពេលជាលើកទីពីរ ខណៈសង្គមស៊ីវិល នៅតែចង់ប្រារព្ធទិវាសិទ្ធិមនុស្ស នៅថ្ងៃ២០ធ្នូ

17, Dec 2020 , 10:29 pm

រូបភាព

យុវជន ចូលរួមប្រាព្ធទិវាសិទ្ធិមនុស្សលើកទី៧០ ក្នុងរាជធានីភ្នំពេញ កាលពីថ្ងៃទី១០ ខែធ្នូ ឆ្នាំ២០២០ (AFP)

ដោយ: សារព័ត៌មានថ្មីៗ

សាលារាជធានីភ្នំពេញ បានចេញសេចក្តីជូនដំណឹងម្តងទៀត ទៅកាន់ក្រុមអង្គការសង្គមស៊ីវិល ដើម្បីប្រាប់ឲ្យពន្យារពេលនៃការជួបជុំគ្នាប្រារព្ធទិវាសិទ្ធិមនុស្សអន្តរជាតិលើកទី៧២ ខណៈក្រុមអង្គការសង្គមស៊ីវិល មានបំណងចង់ជួបជុំគ្នាប្រារព្ធទិវាសិទ្ធិមនុស្សអន្តរជាតិ នៅថ្ងៃទី២០ ខែធ្នូ ឆ្នាំ២០២០ ក្រោយពីគម្រោង ដែលចង់ប្រារព្ធនៅថ្ងៃទី១០ ខែធ្នូ ត្រូវបានហាមឃាត់។ ហេតុផលរបស់អាជ្ញាធរ ដែលប្រាប់ឲ្យក្រុមអង្គការសង្គមស៊ីវិល ពន្យារពេលម្តងហើយម្តងទៀតបែបនេះ គឺដោយសារនៅបារម្ភពីការរាលជំងឺកូវីដ-១៩ ដ្បិតព្រឹត្តិការណ៍សហគមន៍២៨វិច្ឆិកា មិនទាន់បញ្ចប់។

លោក អំ សំអាន នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ ប្រាប់សារព័ត៌មានថ្មីៗ តាមទូរស័ព្ទ នៅរសៀលថ្ងៃទី១៧ ខែធ្នូ ឆ្នាំ២០២០ថា ក្រុមអង្គការសង្គមស៊ីវិល ទើបតែទទួលបានសេចក្តីជូនដំណឹងពីសាលារាជធានីភ្នំពេញ ដូច្នេះ មិនទាន់អាចសម្រេចថា នឹងត្រូវរៀបចំពិធីប្រារព្ធទិវាសិទ្ធិមនុស្ស ដោយរបៀបណាឡើយ។ ប៉ុន្តែ លោក បញ្ជាក់ថា ក្រុមអង្គការសង្គមស៊ីវិលជាង៥០ស្ថាប័ន នៅតែរក្សាជំហរប្រាព្ធទិវាសិទ្ធិមនុស្ស នៅថ្ងៃទី២០ ខែធ្នូ ឆ្នាំ២០២០ ដោយគោរពទៅតាមការណែនាំរបស់ក្រសួងសុខាភិបាល ក្នុងការទប់ស្កាត់ជំងឺកូវីដ-១៩ ដូចជា ការជួបគ្នា ក្នុងលក្ខណៈទ្រង់ទ្រាយតូច ជាដើម។

លោក បន្តថា ក្រុមអង្គការសង្គមស៊ីវិល នឹងជជែកគ្នាពីការរៀបចំពិធីប្រារព្ធទិវាសិទ្ធិមនុស្សនេះ។ លោក មានប្រសាសន៍ថា «រៀបចំនៅកន្លែងណា? អ្នកចូលរួម មានប៉ុន្មាននាក់?» នឹងស្ថិតក្នុងការពិភាក្សាគ្នារបស់ក្រុមអង្គការសង្គមស៊ីវិល។ យ៉ាងណា លោក អះអាងថា ក្រុមអង្គការសង្គមស៊ីវិល នឹងចូលរួមទប់ស្កាត់ជំងឺកូវីដ-១៩ ជាមួយរដ្ឋាភិបាល។

គម្រោងលើកដំបូង គឺអង្គការសង្គមស៊ីវិលជាង៥០ស្ថាប័ន គ្រោងជួបជុំគ្នាប្រមាណ១៥០០នាក់ ដើម្បីប្រារព្ធទិវាសិទ្ធិមនុស្ស នៅថ្ងៃទី១០ ខែធ្នូ ឆ្នាំ២០២០ ដូចរាល់ឆ្នាំ ហើយពួកគេ ថែមទាំងគ្រោងនាំគ្នាដើរពីទីលានប្រជាធិបតេយ្យ ក្នុងខណ្ឌឫស្សកែវ (ខាងជើងស្ពានជ្រោយចង្វារ) ទៅកាន់រដ្ឋសភា ដើម្បីផ្សព្វផ្សាយពីសិទ្ធិមនុស្ស។ ដោយសារមិនត្រូវបានអនុញ្ញាតឲ្យប្រារព្ធទិវាសិទ្ធិមនុស្សទ្រង់ទ្រាយធំ ក្រុមអង្គការសង្គមស៊ីវិល បានងាកមកជួបជុំគ្នាជាលក្ខណៈទ្រង់ទ្រាយតូច នៅថ្ងៃទី១០ ខែធ្នូ ដោយរៀបចំវេទិកា ដែលមានអ្នកចូលរួមតិច ដើម្បីបញ្ចេញមតិយោបល់ និងសួរដេញដោលគ្នាពីបញ្ហាសិទ្ធិមនុស្ស ហើយក្រុមអង្គការសង្គមស៊ីវិលខ្លះទៀត បានប្រារព្ធទិវាសិទ្ធិមនុស្ស តាមអនឡាញ៕