ជាតិ
លោក សាយ សំអាល់ រដ្ឋមន្ត្រីក្រសួងបរិស្ថាន(ស្តាំ) និងលោកWang Wentian ឯកអគ្គរដ្ឋទូតចិនប្រចាំកម្ពុជា ជាអធិបតីភាពក្នុងពិធីប្រគល់សម្ភារកាត់បន្ថយការបញ្ចេញកាបូនតាមរយៈក្រុមហ៊ុនSpark Co.
×![]()
ភ្នំពេញ៖ ក្រសួងអេកូឡូស៊ី និងបរិស្ថាន នៃសាធារណរដ្ឋប្រជាមានិតចិន បានផ្តល់នូវសម្ភារកាត់បន្ថយការបញ្ចេញកាបូន តម្លៃប្រមាណ៣លានដុល្លារ ដល់ក្រសួងបរិស្ថាន។ សម្ភារកាត់បន្ថយការបញ្ចេញកាបូន ដែលកម្ពុជាទទួលបានពីចិន នាថ្ងៃទី២១ធ្នូ ឆ្នាំ២០២០ នោះមានអំពូល បំភ្លឺផ្លូវ ២ ៨០០ដើម, សូឡា PV២០០គ្រឿង, ម៉ូតូអាគុយ២០០គ្រឿង និងឧបករណ៍សម្រាប់មន្ទីរពិសោធន៍ត្រួតពិនិត្យគុណភាពខ្យល់ ចំនួន២០គ្រឿងទៀតផងដែរ។ 
ក្រសួងបរិស្ថាន បានស្រង់សម្តីរបស់លោក Wang Wentian ឯកអគ្គរដ្ឋទូតចិនប្រចាំកម្ពុជា ជាអធិបតីភាព ក្នុងពិធីប្រគល់សម្ភារកាត់បន្ថយការបញ្ចេញកាបូន តាមរយៈក្រុមហ៊ុន Spark Co., Ltd នេះថា ជំនួយជាសម្ភារទាំងនេះ គឺជាការរឹតចំណងមិត្តភាពរវាងប្រទេសទាំងពីរ ហើយនឹងជួយកម្ពុជាលើផ្នែកវិស័យបរិស្ថាន។
ជំនួយសម្ភារកាត់បន្ថយការបញ្ចេញកាបូន ដែលកម្ពុជាទទួលបានពីប្រទេសចិននេះ គឺបានតាមរយៈអនុស្សរណៈយោគយល់គ្នា ស្តីពីកិច្ចសហប្រតិបត្តិការគម្រោងសាកល្បង បញ្ចេញកាបូនតិច នៅខេត្តព្រះសីហនុ។ នេះជាការលើកឡើងរបស់លោក សាយ សំអាល់ រដ្ឋមន្ត្រីក្រសួងបរិស្ថាន ជាអធិបតីភាពក្នុងពិធីប្រគល់-ទទួលនូវសម្ភារខាងលើផងដែរនោះ ដោយបញ្ជាក់ថា អនុស្សរណៈយោគយល់គ្នានេះ បានចុះហត្ថលេខាកាលពីឆ្នាំ២០១៩ រវាងក្រសួងបរិស្ថាន និងក្រសួងអេកូឡូស៊ីនិងបរិស្ថាននៃសាធារណរដ្ឋប្រជាមានិតចិន។
រដ្ឋមន្ត្រីបរិស្ថាន បានរៀបរាប់ ប្រាប់ឯកអគ្គរដ្ឋទូតចិនប្រចាំកម្ពុជា ថា សម្ភារកាត់បន្ថយការបញ្ចេញកាបូននេះ ចំពោះអំពូលភ្លើងនឹងដាក់ឱ្យប្រើប្រាស់នៅតាមទីសាធារណៈក្នុងខេត្តព្រះសីហនុ។ ពិសេសគឺបំភ្លឺនៅតាមសាលារៀននានាក្នុងខេត្តព្រះសីហនុ ដើម្បីឱ្យសិស្សានុសិស្សបានសិក្សាពីសម្ភារប្រើប្រាស់ថាមពលព្រះអាទិត្យ។ សម្រាប់ម៉ូតូអាគុយនិងឧបករណ៍សម្រាប់ត្រួតពិនិត្យគុណភាពខ្យល់ ត្រូវបានយកមកប្រើប្រាស់នៅទីស្តីការក្រសួងបរិស្ថាន នៅមន្ទីពិសោធន៍និងតាមទីតាំងត្រួតពិនិត្យតាមដានរបស់ក្រសួងបរិស្ថាន។
ក្រសួងបរិស្ថានសូមលើកទឹកចិត្តដល់តួអង្គពាក់ព័ន្ធទាំងអស់ឱ្យចូលរួមសកម្មភាពលើកកម្ពស់ការយល់ដឹងអំពីបរិស្ថាន ពង្រឹងសមត្ថភាពបង្ការ ទប់ស្កាត់ និងចាត់វិធានការកាត់បន្ថយការប្រែប្រួលអាកាសធាតុនៅប្រទេសកម្ពុជា ដើម្បីនិរន្តរភាពទីក្រុងស្អាត មានមេត្រីភាពបរិស្ថាន ទីក្រុងបៃតង ដើម្បីភាពសុខុដុមរមនាបរិស្ថាន និងការស់នៅដោយចីរភាព។ បើតាមលោក សាយ សំអាល់។
ចាប់តាំងពីឆ្នាំ២០១៥ ដល់ ២០២០ ក្រសួងបរិស្ថាន សម្រេចបានអនុស្សរណៈយោគយល់ និងកិច្ចព្រមព្រៀងជាមួយស្ថាប័នសំខាន់ៗនៃសារធារណៈរដ្ឋប្រជាមានិតចិនចំនួន៨។ ក្នុងនោះមាន កិច្ចសហប្រតិបត្តិការគាំពារបរិស្ថានកម្ពុជា-ចិន, ការបង្កើតការិយាល័យរៀបចំមជ្ឈមណ្ឌលកិច្ចសហប្រតិបត្តិការបរិស្ថានកម្ពុជា-ចិន, ការផ្ដល់ជំនួយឧបករណ៍ប្រព្រឹត្តកម្មទឹកកខ្វក់, កិច្ចសហប្រតិបត្តិការសាកល្បងក្នុងការអភិរក្សជីវៈចម្រុះ និងប្រព័ន្ធអេកូឡូស៊ី, ការរៀបចំមន្ទីរពិសោធន៍សហប្រតិបត្ដិការ កម្ពុជា-ចិន, ការរៀបចំតំបន់បញ្ចេញកាបូនតិច និងការផ្ដល់ជំនួយស្ថានីយតាមដានគុណទឹកស្វ័យប្រវត្តិ ជាដើម៕
Tag:
កាបូន
ព្រះសីហនុ
© រក្សាសិទ្ធិដោយ thmeythmey.com
