កម្ពុជាស្ថិតក្នុងចំណោម៩២ប្រទេសដែលនឹងទទួលបានថ្នាំបង្ការកូវីដ-១៩ពីយូនីសេហ្វ

COVID-19

ជាតិ

កម្ពុជាស្ថិតក្នុងចំណោម៩២ប្រទេសដែលនឹងទទួលបានថ្នាំបង្ការកូវីដ-១៩ពីយូនីសេហ្វ

23, Dec 2020 , 8:29 pm

រូបភាព

ដោយ: សារព័ត៌មានថ្មីៗ

អង្គការយូនីសេហ្វ ក្រោមសហការជាមួយនសម្ព័ន្ធថ្នាំបង្ការសកល (Gavi) និងអង្គការសុខភាពពិភពលោក (WHO) កំពុងគាំទ្រដល់ប្រទេសមានចំណូលទាប និងចំណូលមធ្យមកម្រិតទាប ដើម្បីត្រៀមទទួលថ្នាំបង្ការជំងឺកូវីដ-១៩ ក្នុងឆ្នាំ២០២១។ កម្ពុជាស្ថិតក្នុងចំណោមប្រទេស៩២ដែលជាគោលដៅត្រូវទទួលបាន។

យូនីសេហ្វ ដាក់ចេញផែនការដឹកជញ្ជូនថ្នាំបង្ការជំងឺកូវីដ-១៩ ឲ្យបានរហូតដល់ ៨៥០ តោនក្នុងមួយខែ នាឆ្នាំ២០២១ តាមរយៈយន្តការ COVAX នៅក្នុងប្រតិបត្តិការភស្តុភារ «ខ្នាតធំជាប្រវត្តិសាស្ត្រ»។ នេះបើសេចក្តីប្រកាសព័ត៌មានពីក្រុងញូវយ៉ក នាថ្ងៃទី២២ ខែធ្នូ ដោយបញ្ជាក់ថា បរិមាណថ្នាំបង្ការដែលត្រូវដឹកជញ្ជូននេះ គឺអាស្រ័យទៅតាមថ្នាំបង្ការដែលផលិតបាន។

តាមការវាយតម្លៃជាសកល កម្ពុជា គឺជាប្រទេសមួយក្នុងចំណោមប្រទេសដែលមានចំណូលទាប និងចំណូលមធ្យមកម្រិតទាបចំនួន៩២ប្រទេសដែលយូនីសេហ្វនឹងដឹកជញ្ជូនថ្នាំបង្ការផ្តល់ជូន ក្រោមកិច្ចដឹកនាំរបស់រាជរដ្ឋាភិបាលកម្ពុជា ដោយសហការយ៉ាងជិតស្និទ្ធជាមួយអង្គការសុខភាពពិភពលោក។

លោកស្រី ហិនរីតា ហ្វរ នាយិកាប្រតិបត្តិយូនីសេហ្វ បានមានប្រសាសន៍ថា៖ «នេះគឺជាប្រតិបត្តិការដ៏ធំសម្បើមជាប្រវត្តិសាស្ត្រ។ នេះគឺជាកិច្ចការដែលមានទំហំធំហើយនឹងផ្ដល់អត្ថប្រយោជន៍យ៉ាងច្រើនដែលមិនធ្លាប់មានពីមុនមក ប៉ុន្តែយើងត្រៀមខ្លួនរួចជាស្រេចដើម្បីបំពេញកិច្ចការនេះ»។

នៅកម្ពុជា យូនីសេហ្វកំពុងធ្វើការជាមួយក្រសួងសុខាភិបាល និងអង្គការសុខភាពពិភពលោក ដើម្បីត្រៀមរៀបចំក្នុងការផ្គត់ផ្គង់ថ្នាំបង្ការនេះ។ នៅថ្នាក់ក្រោមជាតិ យូនីសេហ្វនឹងគាំទ្រដល់រាជរដ្ឋាភិបាលកម្ពុជា តាមរយៈការកៀរគរ និងបំផុសចលនាសហគមន៍ក្នុងការជួយពិនិត្យតាមដានការយុទ្ធនាការចាក់ថ្នាំបង្ការផងដែរ។

ការវាយតម្លៃបានរកឃើញថា ក្រុមហ៊ុនអាកាសចរណ៍ពាណិជ្ជកម្ម នឹងអាចដឹកជញ្ជូនថ្នាំបង្ការទៅកាន់ប្រទេសស្ទើរតែទាំង ៩២ប្រទេស ជាមួយនឹងការប៉ាន់ប្រមាណថវិកាចំណាយរហូតដល់៧០លានដុល្លារអាមេរិក។ ប្រទេសទាំងនេះស្ថិតក្នុងចំណោមប្រទេសចំនួន១៩០ ដែលចូលរួមនៅក្នុងកម្មវិធីCOVAX ។

«សុវត្ថិភាពដឹកទំនិញតាមផ្លូវអាកាសនាពេលបច្ចុប្បន្ន គឺអាចគ្រប់គ្រាន់ក្នុងការដឹកជញ្ជូនថ្នាំបង្ការសម្រាប់ផ្តល់ជូនប្រជាពលរដ្ឋ ២០% ក្នុងប្រទេសភាគច្រើន ក្នុងចំណោមប្រទេសទាំង៩២ នោះ»។ នេះបើតាមសេចក្តីប្រកាសព័ត៌មានរបស់យូនីសេហ្វ ដោយអះអាងពីការប្រឹងប្រែងពង្រឹងកិច្ចសហការជាមួយក្រុមហ៊ុនអាកាសចរណ៍ និងក្រុមហ៊ុនភស្តុភារដើម្បីឲ្យក្រុមហ៊ុនទាំងនោះផ្ដល់អាទិភាពដល់ការដឹកជញ្ជូនថ្នាំបង្ការជំងឺកូវីដ-១៩ ទៅទូទាំងសកលលោក។

បញ្ហាប្រឈមដ៏ធំមួយនៅក្នុងប្រតិបត្តិការដឹកជញ្ជូនថ្នាំបង្ការជំងឺកូវីដ-១៩ គឺសមត្ថភាពនៃប្រព័ន្ធស្តុកដែលអាចរក្សាសីតុណ្ហភាពត្រជាក់បាននៅក្នុងស្រុក សម្រាប់រក្សាថ្នាំបង្ការនៅតាមប្រទេសដែលមានចំណូលទាប និងប្រទេសដែលមានចំណូលមធ្យមកម្រិតទាបមួយចំនួន។

យូនីសេហ្វ អង្គការសុខភាពពិភពលោក និង Gavi ដែលជាសម្ព័ន្ធថ្នាំបង្ការសកលបានរៀបចំសេចក្ដីណែនាំស្ដីពីការផ្គត់ផ្គង់ និងប្រជាមួយនឹងការប៉ាន់ប្រមាណថវិកាចំណាយរហូតដល់៧០លានដុល្លារអាមេរិក។ ដោយសារតែថ្នាំបង្ការជំងឺកូវីដ-១៩ ត្រូវការរក្សាទុកក្នុងសីតុណ្ហភាពដែលបានកំណត់មួយ ប្រទេសនានាចាំបាច់ត្រូវបន្តបណ្ដុះបណ្ដាលដល់អ្នកជំនាញផ្នែកភស្តុភារ និងភ្នាក់ងារសុខាភិបាលអំពីរបៀបរក្សាទុកថ្នាំបង្ការជំងឺកូវីដ-១៩ នៅសីតុណ្ហភាពដែលត្រឹមត្រូវ៕