COVID-19
អន្តរជាតិ
បុគ្គលិកថៃ បាញ់ទឹកលាងសម្អាតផ្សារលក់គ្រឿងសមុទ្រ ដែលជាកន្លែងផ្ទុះកូវីដ-១៩ ខ្លាំង។ រូបភាព៖ Bangkok Post
×![]()
ដោយ: ធៀន ភារិន្ទ
គ្មានឡើយករណីបិទប្រទេស បើទោះបីជាករណីឆ្លងនៅតែបន្តកើតមានក៏ដោយ។ ដើម្បីងាយស្រួលក្នុងការគ្រប់គ្រងស្ថានការណ៍កូវីដ-១៩ នៅក្នុងប្រទេស ថៃបានបែងចែកតំបន់ចំនួន ៤ ដែលដាក់តំណាងដោយពណ៌៤ ដែរ។ នេះបើតាមការបញ្ជាក់របស់អ្នកនាំពាក្យមជ្ឈមណ្ឌលគ្រប់គ្រងស្ថានការណ៍កូវីដ-១៩ ថៃ (CCSA) លោក Taweesilp Visanuyothin នៅថ្ងៃទី២៤ ខែធ្នូ។ 
មជ្ឈមណ្ឌលគ្រប់គ្រងស្ថានការណ៍កូវីដ-១៩ ថៃ បានអះអាងថា ថៃមានករណីឆ្លងកូវីដ-១៩ ថ្មីចំនួន ៦៧ករណី បន្ថែមទៀត ដោយ ៥៥ ករណីមានទាក់ទិននឹងខេត្តសមុទ្រសាគរ, ១ករណីពាក់ព័ន្ធនឹងខេត្តតាក់ និងពីរករណីទៀត មកពីតំបន់ដែលមានមនុស្សជួបជុំច្រើន។ ចំណែក ៩ករណីទៀត គឺជាករណីឆ្លងមកពីក្រៅប្រទេស។
តាមការចុះផ្សាយរបស់សារព័ត៌មាន The Nation ក្នុងចំណោមករណីថ្មីនេះ ក៏មានស្ត្រីខែ្មរវ័យ ១៩ឆ្នាំ ដែលបានរកឃើញថា ចូលប្រទេសថៃខុសច្បាប់នៅថ្ងៃទី១៧ ខែធ្នូ និងមិនចេញរោគសញ្ញា។
ដើម្បីគ្រប់គ្រងស្ថានការណ៍កូវីដ-១៩ នៅក្នុងប្រទេស CCSA បានដាក់ចេញតំបន់ចំនួន ៤ ដោយផ្អែកទៅតាមស្ថានភាពកូវីដ-១៩ នៅក្នុងតំបន់នីមួយៗ ដោយតំបន់ទាំងនោះមានដូចជា ក្រហម, ទឹកក្រូច, លឿង និងបៃតង។ ចំណាត់ការនេះ ត្រូវដាក់ឲ្យអនុវត្តភ្លាមៗ។
តំបន់ក្រហម ជាតំបន់ដែលមានករណីឆ្លងកូវីដ-១៩ ច្រើន និងមានអត្រាឆ្លងកូវីដ-១៩ ខ្ពស់។ សាមុតសាខន ជាខេត្តមួយប៉ុណ្ណោះក្នុងតំបន់នេះ ជាមួយនឹងការគ្រប់គ្រងស្ថិតក្នុងភាពតឹងរ៉ឹងបំផុត។ អ្នកឆ្លង និងអ្នកដែលអាចផ្ទុកជំងឺ នឹងត្រូវវាយតម្លៃឲ្យបានលឿនបំផុត ដើម្បីដាក់ចត្តាឡីស័ក និងព្យាបាល។ ការដឹកកម្មករចេញពីតំបន់នេះ ត្រូវហាមឃាត់ ស្របពេលការងារ និងការសិក្សា ត្រូវធ្វើមកពីផ្ទះ។ សកម្មភាពនេសាទអាចបន្តបាន ប៉ុន្តែកម្មករនេសាទ ត្រូវធ្វើតេស្តរកកូវីដ-១៩ ឲ្យបានញឹកញាប់។
តំបន់បន្ទាប់ តំណាងដោយពណ៌ទឹកក្រូច ជាក្រុមខេត្តដែលមានករណីឆ្លងច្រើនជាង១០ និងកំពុងតែកើនឡើង។ ការដឹកជញ្ជូនកម្មករចេញពីតំបន់នេះ ត្រូវបានហាមឃាត់ដែរ។ ក្នុងតំបន់ទឹកក្រូចនេះ ការអបអរចូលឆ្នាំថ្មី ត្រូវបានឃាមឃាត់ លើកលែងតាមប្រព័ន្ធអនឡាញ។ ពិធីជប់លៀង អាចធ្វើបាន តែត្រូវកម្រិតចំនួនមនុស្ស។ តំបន់នេះ មានខេត្តក្រុងនៅជាប់ និងជុំវិញខេត្តសាមុតសាខន ដូចជាទីក្រុងបាងកក, សមុទ្រសង្គ្រាម, រាជបុរី និងនគរបឋមជាដើម។
ដោយឡែកតំបន់ពណ៌លឿងវិញ ជាតំបន់ស្ថិតក្រោមការត្រួតពិនិត្យកម្រិតខ្ពស់ ដោយតំបន់នេះមានករណីឆ្លងកូវីដ-១៩ មិនច្រើនជាង ១០ករណី និងករណីឆ្លងស្ថិតក្រោមការគ្រប់គ្រង។ ខេត្តក្នុងតំបន់ពណ៌លឿងនេះ មានចំនួន២៥ខេត្ត។
តំបន់ចុងក្រោយ គឺតំបន់បៃតង ដែលគ្មានករណីឆ្លង និងជាតំបន់អាចមានករណីឆ្លង។ តាមការបញ្ជាក់របស់អ្នកនាំពាក្យ CCSA ការអបអរឆ្នាំថ្មី អាចធ្វើឡើងក្នុងតំបន់ ពណ៌លឿង និងពណ៌បៃតង ប៉ុន្តែការជួបជុំ ត្រូវមានចំនួនមនុស្សតិច។ យ៉ាងណាក៏ដោយ តំបន់ខាងលើនេះ អាចនឹងមានការប្រែប្រួល អាស្រ័យលើការស្ថានការណ៍កូវីដ-១៩ នៅក្នុងប្រទេស។
នៅថ្ងៃទី២៣ ខែធ្នូ ឡាវ បានផ្អាកការនាំចូលគ្រឿងសមុទ្រមកពីថៃបណ្តោះអាសន្នសិន ដោយសារតែករណីឆ្លងកូវីដ-១៩ ផ្ទុះឡើងនៅក្នុងផ្សារលក់គ្រឿងសមុទ្រមួយ ក្នុងខេត្តសមុទ្រសាគរ។ ឡាវនឹងប្រកាសនាំចូលគ្រឿងសមុទ្រមកពីថៃវិញ រហូតដល់ស្ថានការណ៍កូវីដ-១៩ ស្ងប់ស្ងាត់។
សូមបញ្ជាក់ថា គិតត្រឹមថ្ងៃទី២៤ ខែធ្នូ ថៃមានករណីឆ្លងកូវីដ-១៩ សរុបចំនួន ៥៨២៩ករណី និងអ្នកស្លាប់មានចំនួន ៦០នាក់។ ចំណែកអ្នកជាសះស្បើយមានចំនួន ៤១១៦នាក់៕
Tag:
ថៃ
កូវីដ-១៩
© រក្សាសិទ្ធិដោយ thmeythmey.com
«គូលី»មានន័យច្បាស់លាស់ដូចម្តេច?
1 សប្តាហ៍
