ថៃរកឃើញករណីកូវីដ-១៩ ១៤៤ករណីទៀត ឯអភិបាលខេត្តសមុទ្រសាគរក៏ឆ្លងដែរ

អន្តរជាតិ

ថៃរកឃើញករណីកូវីដ-១៩ ១៤៤ករណីទៀត ឯអភិបាលខេត្តសមុទ្រសាគរក៏ឆ្លងដែរ

28, Dec 2020 , 4:56 pm

រូបភាព

ប្រជាជនថៃតម្រង់ជួររង់ចាំធ្វើតេស្តរកកូវីដ-១៩ នៅខេត្តសមុទ្រសាគរ។ រូបភាព Xinhua

ដោយ: ធៀន ភារិន្ទ

រដ្ឋាភិបាលថៃ នៅថ្ងៃទី២៨ ខែធ្នូ បានប្រកាសពីករណីឆ្លងកូវីដ-19ថ្មីចំនួន ១៤៤ករណី ដែលភាគច្រើនគឺជាករណីឆ្លងក្នុងស្រុក។ អភិបាលខេត្តសមុទ្រសាគរ ទីដែលផ្ទុះករណីឆ្លងក្នុងស្រុកនៅរយៈពេលចុងក្រោយ ក៏ត្រូវបានរកឃើញថាមានផ្ទុកកូវីដ-១៩ ដែរ។

ស្ថានការណ៍កូវីដ-១៩ នៅថៃ ហាក់មិនបានថមថយឡើងក្រោយការផ្ទុះខ្លាំងជិតពីរសប្ដាហ៍មក។ នៅថ្ងៃទី២៨ ខែធ្នូ អ្នកនាំពាក្យមជ្ឈមណ្ឌលគ្រប់គ្រងស្ថានការណ៍កូវីដ-១៩ (CCSA) លោក Taweesilp Visanuyothin បានអះអាងថា ថៃមានករណីឆ្លងចំនួន ១៤៤ករណី ដោយក្នុងនោះករណីឆ្លងលើប្រជាជនថៃមានចំនួន ១១៥ករណី, ពលករចំណាកស្រុកមានចំនួន ១៥ករណី និងការឆ្លងមកពីបរទេសមានចំនួន ១៥ករណី។

គិតមកដល់ពេលនេះ ករណីឆ្លងកូវីដ-១៩ នៅថៃកើនដល់ ៤៣ខេត្តហើយ ដោយកើនចំនួន ៥ខេត្ត បើធៀបនឹងថ្ងៃទី២៧ ខែតុលា។ ករណីឆ្លងសរុបកើនដល់ ៦២៨៥ករណី និងអ្នកស្លាប់មានចំនួន ៦០ករណី។ ចំណែកអ្នកជាសះស្បើយមានចំនួន ៤១៨០ករណី។

ស្របពេលករណីឆ្លង កំពុងតែហក់ឡើងបែបនេះ អ្នកនាំពាក្យមជ្ឈមណ្ឌលគ្រប់គ្រងស្ថានការណ៍កូវីដ-១៩ បានព្រមានថា ស្ថានការណ៍កូវីដ-១៩ នៅពេលនេះ គឺអាក្រក់ជាងស្ថានការណ៍កូវីដ-១៩ ដែលផ្ទុះឡើងនៅពេលដំបូងទៅទៀត។ បើតាមមជ្ឈមណ្ឌល CCSA ក្នុងរយៈពេលតែថ្ងៃប៉ុន្មានថ្ងៃប៉ុណ្ណោះ ករណីឆ្លងនៅថៃ បានហក់ឡើងជាង ១ពាន់ករណី ដែលជាការរាតត្បាតដ៏ខ្លាំង។

ដ្បិតមន្ត្រីសុខាភិបាល និងក្រុមគ្រូពេទ្យមានបទពិសោធច្រើនលើការទប់ស្កាត់កូវីដ-១៩ ហើយតម្រូវការម៉ាស ក៏ផ្គត់ផ្គង់បានគ្រប់គ្រាន់ លោក Taweesilp បានទទួលស្គាល់ថា ស្ថានការណ៍សព្វថ្ងៃ ត្រូវមានការសហការពីប្រជាពលរដ្ឋ។ បើសិនបើប្រជាជនសហការបានល្អ រដ្ឋាភិបាលថៃ នឹងមិនចាំបាច់ចាំបង្ខំឲ្យអនុវត្តច្បាប់ បិទតំបន់ ឬប្រទេស ឬដាក់បម្រាមគោចរអ្វីឡើយ។ នេះបើតាមការចុះផ្សាយរបស់កាសែតបាងកកប៉ុស្តិ៍។

ក្នុងថ្ងៃដដែលនេះ លោក Taweesilp ក៏បានបញ្ជាក់ផងដែរថា អភិខេត្តសមុទ្រសាគរ លោក Veerasak Vijitsaengsri បានឆ្លងកូវីដ-១៩ និងត្រូវបានបញ្ជូនយកទៅព្យាបាលជំងឺនៅមន្ទីរពេទ្យ។ ចំណែគឧបនាយករដ្ឋមន្ត្រី និងជារដ្ឋមន្ត្រីសុខាភិបាល លោក Anutin Charnvirakul ក៏ត្រូវដាក់ចត្តាឡីស័ករយៈពេល ១៤ថ្ងៃផងដែរ បន្ទាប់ពីបានចូលរួមកិច្ចប្រជុំជាមួយអភិបាលខេត្ត។

ខណៈករណីឆ្លងនៅខេត្តសមុទ្រសាគរមិនទាន់ធូរស្រាល នៅខេត្តរ៉ាយ៉ងវិញ ក៏ផ្ទុះករណីឆ្លងចេញពីបនល្បែងមួយ។ មេប៉ូលិសខេត្តនេះ លោក Paphatdet Ketphan ត្រូវផ្ទេរតំណែងទៅកាន់ស្នងការប៉ូលិសជាតិថៃ៕