រដ្ឋាភិបាលថៃ នៅថ្ងៃទី៣១ ខែធ្នូ បានអះអាងថា ករណីឆ្លងជំងឺកូវីដ-១៩ ថ្មី មានចំនួន ១៩៤ករណី ដែលភាគច្រើនជាករណីឆ្លងនៅក្នុងស្រុក។ ចំនួននេះ មានការធ្លាក់ចុះបើធៀបនឹងថ្ងៃម្សិលមិញ ដែលមានចំនួន ២៥០ករណី។
បើទោះបីជាករណីឆ្លងកូវីដ-១៩ ប្រចាំថ្ងៃនៅថៃ បានធ្លាក់ចុះបន្តិចមែន ប៉ុន្តែអត្រាឆ្លងកូរ៉ូណាវីរុសនៅតែមានកម្រិតខ្ពស់ដដែល។ នៅថ្ងៃទី៣១ ខែធ្នូ ថៃមានករណីឆ្លងកូវីដថ្មីចំនួន១៩៤ករណី ដោយក្នុងនោះ ករណីឆ្លងក្នុងស្រុកមានចំនួន ១៨១ករណី និងករណីនាំចូលចំនួន ១៣ករណី។ កូវីដ-១៩ ដែលផ្ទុះចេញពីខេត្តសមុទ្រសាគរ បានរាតត្បាតដល់ខេត្តចំនួន ៥១ ដោយខេត្តឆ្លងថ្មីមានដូចជា នន្ទបុរី រាជបុរី មហាសារ៉ាខាម នគរស្រីធម្មរាជ និងណងខៃ។
តួលេខកូវីដ-១៩ សរុបរបស់ថៃ មានចំនួន ៦៨៨៤ករណី និងអ្នកស្លាប់មានចំនួន ៦១នាក់។ ចំណែកអ្នកជាសះស្បើយមានចំនួន ៤២៤០នាក់។
តំបន់ពណ៌ក្រហម ដែលជាកន្លែងមានវិធានតឹងរ៉ឹងខ្លាំងជាងគេ និងមានករណីឆ្លងច្រើនជាង ៥០ករណី បានកើនឡើងជាបន្តបន្ទាប់។ គិតត្រឹមថ្ងៃទី៣១ ខែធ្នូ ខេត្តចំនួន ៥ និងក្រុងចំនួន ១ ត្រូវបានដាក់ក្នុងតំបន់ក្រហម ក្នុងនោះមានដូចជា ទីក្រុងបាងកក, សមុទ្រសាគរ, រ៉ាយ៉ង, ជលបុរី, នគរបឋម និងនន្ទបុរី។
ចាប់តាំងពីផ្ទុះកូវីដ-១៩ ចុងក្រោយចេញពីខេត្តសមុទ្រសាគរ ថៃ បានបែងចែកតំបន់ជាបួន ដែលមានដូចជា តំបន់ពណ៌ក្រហម, តំបន់ពណ៌ទឹកក្រូច, តំបន់ពណ៌លឿង និងតំបន់ពណ៌បៃតង។ តំបន់ទាំងនោះ ត្រូវបែងចែក ដោយផ្អែកលើស្ថានការណ៍កូវីដ-១៩ នៅក្នុងខេត្ត និងតំបន់។
ដោយសារតែករណីឆ្លងនៅតំបន់ពណ៌ក្រហម និងតំបន់ពណ៌ទឹកក្រូចមានអត្រាឆ្លងខ្លាំង រដ្ឋាភិបាល បានប្រកាសហាមឃាត់ការជួបជុំទាំងអស់លើការជួបជុំឆ្លងឆ្នាំសកល លើកលែងតែលក្ខណៈគ្រួសារ និងរបស់រដ្ឋាភិបាល។ ចំណែកតំបន់ពណ៌លឿង និងតំបន់ពណ៌បៃតង អាចជួបជុំបាន ក្នុងករណីមានការអនុញ្ញាតពីរដ្ឋាភិបាល។ ក្នុងករណីបំពានបម្រាម អ្នកទាំងនោះ អាចប្រឈមជាប់ពន្ធនាគាររហូតដល់ពីរឆ្នាំ និងពិន័យជាប្រាក់រហូតដល់ ៤ម៉ឺនបាត (១៣៣៤ដុល្លារ) ។ នេះបើតាមការចុះផ្សាយរបស់កាសែតបាងកកប៉ុស្តិ៍។
ជាមួយគ្នានោះមេប៉ូលិសខេត្តមួយហើយត្រូវបានផ្ទេរចេញក្រោយការផ្ទុះករណីឆ្លងពីបនល្បែង។ មេប៉ូលិសខេត្តជលបុរី លោក Prakarn Prachong ត្រូវបានផ្ទេរតំណែងទៅមជ្ឈមណ្ឌលប្រតិបត្តិការ នៃស្នងការប៉ូលិសជាតិ ក្រោយមានរបាយការណ៍រកឃើញអ្នកឆ្លងកូវីដ-១៩ នៅក្នុងបនល្បែងក្នុងខេត្ត។ ករណីផ្ទេរតំណែង ក៏មាននៅខេត្តរ៉ាយ៉ង និងតំណែងអធិការខណ្ឌ និងមន្ត្រីប៉ូលិសជាន់ខ្ពស់ផ្សេងទៀតនៅក្នុងក្រុងបាងកក។ ស្នងការដ្ឋានប៉ូលិសជាតិថៃ ក៏បើកការស៊ើបអង្កេតលើមន្ត្រីប៉ូលិសទាំងនោះ និងអ្នកពាក់ព័ន្ធ ជុំវិញការអនុញ្ញាតឲ្យមានការបើកបនល្បែនខុសច្បាប់នៅក្នុងខេត្ត និងតំបន់របស់ខ្លួន។
ស្របពេលករណីកូវីដ-១៩ កំពុងតែរាតត្បាតខ្លាំងនៅក្នុងប្រទេស នាយករដ្ឋមន្ត្រីថៃ លោកប្រាយុទ្ធ ចន្ទអូចា បានបញ្ជាឲ្យក្រសួងសុខាភិបាល ចរចាជាមួយក្រុមហ៊ុនឱសថជុំវិញការទិញវ៉ាក់សាំងប្រឆាំងកូវីដ-១៩ ។ បើតាមការបញ្ជាក់របស់អ្នកនាំពាក្យរដ្ឋាភិបាលថៃ លោក Anucha Burapachaisri នៅថ្ងៃទី៣១ ខែធ្នូ លោក ប្រាយុទ្ធ ចង់ឲ្យប្រជាជនថៃយ៉ាងហោចណាស់ ៥០ភាគរយ នៃប្រជាជនសរុប ទទួលបានការចាក់វ៉ាក់សាំងប្រឆាំងកូវីដ-១៩។
នៅក្នុងខែវិច្ឆិកា ថៃ បានចុះកិច្ចព្រមព្រៀងទិញវ៉ាក់សាំងពីក្រុមហ៊ុន AstraZeneca ចំនួន ២៦លានដូស ដែលនឹងមកដល់នៅក្នុងឆ្នាំ២០២១ ខាងមុខ៕