ជាតិ
ឆ្លងឆ្នាំសកល៖ ភ្នំពេញទទួលបានទេសចរជាង៥០ម៉ឺននាក់ ព្រះសីហនុជាង៥ម៉ឺននាក់ សៀមរាបជាង២ម៉ឺននាក់ រាត្រីថ្ងៃទី៣១ធ្នូ ឆ្នាំ២០២០ នៅវិមានឈ្នះ-ឈ្នះ។
× ភ្នំពេញ៖ ក្នុងពិធីឆ្លងឆ្នាំសកលចូល២០២១ កម្ពុជាទទួលបានភ្ញៀវទេសចរជាតិនិងភ្ញៀវបរទេសផ្ទៃក្នុង សរុបជិត៧០ម៉ឺននាក់ (៦៩៩,៧២៤នាក់)។ ក្នុងនោះ នៅរាជធានីភ្នំពេញទទួលបានទេសចរជាង៥០ម៉ឺននាក់ ខណៈខេត្តព្រះសីហនុ ទទួលបានទេសចរជាង៥,១ម៉ឺននាក់ ហើយខេត្តសៀមរាប ទទួលទេសចរបានត្រឹមជាង២,៥ម៉ឺននាក់ប៉ុណ្ណោះ។ នេះបើយោងតាមរបាយការណ៍របស់របស់ក្រសួងទេសចរណ៍ នាថ្ងៃទី២មករានេះ។
ក្រសួងទេសចរណ៍បញ្ជាក់ថា គោលដៅដើរកម្សាន្តរបស់ភ្ញៀវទេសចរជាង៥០ម៉ឺននៅរាជធានីភ្នំពេញ នារាត្រីឆ្លងឆ្នាំសកលចូល២០២១ មានតំបន់កោះពេជ្រ មាត់ទន្លេមុខព្រះបរមរាជវាំង, តំបន់កម្សាន្តជ្រោយចង្វារ និង តំបន់វិមានឈ្នះ-ឈ្នះ ជាដើម។
សម្រាប់ឆ្លងឆ្នាំសកល នៅរាជធានីភ្នំពេញ ក៏ដូចបណ្តាខេត្តនានា គឺមិនមានការរៀបចំពិធីទទួលឆ្នាំថ្មី ការប្រគុំតន្ត្រី និង ការជួបជុំណាមួយជាទ្រង់ទ្រាយធំឡើយ ព្រោះតែការប្រឈមនៃជំងឺឆ្លងកូវីដ-១៩។ របាយការណ៍របស់ក្រសួងទេសចរណ៍បានបញ្ជាក់ថា ក្នុងចំណោមភ្ញៀវទេសចរជិត៧០ម៉ឺននាក់ខាងលើ ដែលបានទៅកម្សាន្ត នាថ្ងៃឆ្លងឆ្នាំសកល ក្រៅពីភ្នំពេញ ខេត្តព្រះសីហនុ និងខេត្តសៀមរាប គឺ មានខេត្តគោលដៅទេសចរណ៍សំខាន់ៗ ជាច្រើនផងដែរ ដូចជាខេត្តកែប ទទួលបានទេសចរជាង៥,១ម៉ឺននាក់ និងខេត្តកំពតមានជិត១,៩ម៉ឺននាក់។
សម្រាប់ខេត្តកំពង់ស្ពឺ ទទួលភ្ញៀវទេសចរបានជិត ១,២ម៉ឺននាក់ ខេត្តបាត់ដំបងបានជាង ៦,៥ពាន់នាក់ ខេត្តកំពង់ចាម បានជិត ៦,៥ពាន់នាក់ និងខេត្តកោះកុង បានត្រឹមជាង ៣ពាន់នាក់ ។ ក្នុងរាត្រីឆ្លងឆ្នាំសកលនេះ ក៏មាន ប្រជាពលរដ្ឋមួយចំនួនបានរៀបចំពិធីទទួលឆ្នាំ២០២១នៅតាមកគេហដ្ឋានរៀងៗខ្លួន ដោយជំនួសធ្វើឱ្យការធ្វើដំណើរកម្សាន្តតាមបណ្តាខេត្តនានា ដើម្បីការពារការឆ្លងជំងឺកូវីដ-១៩៕
Tag:
ឆ្នាំសកល
ព្រះសីហនុ
សៀរាប
© រក្សាសិទ្ធិដោយ thmeythmey.com