រាជធានីភ្នំពេញ ថ្ងៃទី០៨ ខែមករា ឆ្នាំ២០២១ - ទោះបីមានភាពប្រឈមដែលបង្កឡើងដោយជំងឺឆ្លងរាតត្បាត កូវីដ-១៩ក្ដី ក្រុមហ៊ុន អេសស៊ីជី (SCG) ដែលឈានមុខគេ នៅក្នុងទីផ្សារអាស៊ាន ក្នុងវិស័យឧស្សាហកម្មផលិតស៊ីម៉ងត៍ និងគ្រឿងសំណង់ នៅតែបន្តផ្ដល់អាហារូបករណ៍ដល់សិស្សនិស្សិតកម្ពុជា ជាង ១២០នាក់ នៅឆ្នាំនេះ ។
អាហារូបករណ៍ ដែលបានប្រគល់ជូនសិស្សនិស្សិត កាលពីដើមខែមករានេះ សំដៅជួយដល់សិស្សនិស្សិត ដើម្បីសម្រាលការលំបាក ដែលបង្កដោយជំងឺរាតត្បាតកូវីដ-១៩ និងជួយដល់ពួកគេ បន្តក្ដីសុបិនសម្រាប់ការអប់រំរបស់ខ្លួន។
លោក រ៉ាតឆាយុត កាសេមឆៃសិរិ (Ratchayut Kasemchaisiri) នាយក អេសស៊ីជី ប្រចាំកម្ពុជា បានមានប្រសាសន៍ថា៖ «ទោះបីជួបប្រទះនឹងផលប៉ះពាល់ខ្លះ ពីជំងឺកូវីដ-១៩ក្ដី អេសស៊ីជី នៅតែបន្តសកម្មភាពសង្គមរបស់ខ្លួន ដែលរួមចំណែកដល់សង្គមជាតិកម្ពុជា ជាប្រក្រតីដដែល ហើយការផ្ដល់អាហារូបករណ៍ គឺជាផ្នែកមួយនៃកម្មវិធី “អេសស៊ីជី ចែករំលែកក្ដីសុបិន” ដែលបានចាប់ផ្ដើមនៅកម្ពុជា តាំងពីឆ្នាំ២០១៤មកម្ល៉េះ»។
លោក រ៉ាតឆាយុត មានប្រសាសន៍ដូច្នេះថា៖ «ឆ្នាំនេះ យើងផ្ដល់អាហារូបករណ៍ដល់សិស្សនិស្សិត ១២៨នាក់ ដែលគ្រួសារ និងការសិក្សារបស់ពួកគេ រងផលប៉ះពាល់ដោយសារកូវីដ-១៩ ។ យើងសង្ឃឹមថា អាហារូបករណ៍ទាំងនេះ នឹងជួយសម្រាលការលំបាករបស់ពួកគេបានខ្លះ និងជួយលើកទឹកចិត្តឲ្យពួកគេបន្តក្ដីសុបិនរបស់ខ្លួន ដើម្បីការសិក្សាបន្តទៅថ្នាក់ខ្ពស់» ។
យុវតី សួន ស្រីវរលក្ខណ៍ អាយុ ១៩ឆ្នាំ ជាសិស្សវិទ្យាល័យវត្តកោះ នៅរាជធានីភ្នំពេញ ដែលស្ថិតក្នុងចំណោមសិស្សនិស្សិត ដែលបានទទួលអាហារូបករណ៍ពី អេសស៊ីជី បានឲ្យដឹងថា រូបនាង និងម្ដាយជាស្ត្រីមេម៉ាយ ហើយរស់នៅសព្វថ្ងៃពឹងអាស្រ័យលើប្រាក់ចំណូល ពីបងប្រុសពីរនាក់របស់ខ្លួន។ ប៉ូន្តែក្នុងអំឡុងជំងឺរាតត្បាតកូវីដ-១៩ ចំណូលបងប្រុសទាំងពីរនាក់របស់នាងបានធ្លាក់ចុះយ៉ាងខ្លាំង ដែលបានធ្វើឲ្យប៉ះពាល់ដល់ជីវភាពរបស់គ្រួសារនាងយ៉ាងខ្លាំង។ យុវតី សួន ស្រីវរលក្ខណ៍ និយាយយ៉ាងដូច្នេះថា៖ «ខ្ញុំសូមអរគុណដល់ អេសស៊ីជី ដែលបានផ្ដល់អាហារូបករណ៍ដល់ខ្ញុំ ដែលបានជួយសម្រាលការលំបាកមួយផ្នែករបស់គ្រួសារខ្ញុំ និងជួយខ្ញុំឲ្យមានកម្លាំងចិត្ត ផងដែរ»។
យុវសិស្ស លាង វ៉ាន់សាក់ អាយុ ១៨ឆ្នាំ ជាសិស្សថ្នាក់ទី១២ នៃវិទ្យាល័យ ជាស៊ីម សាមគ្គី ដែលបានទទួលអាហារូបករណ៍ផងដែរ បាននិយាយថា ជំងឺកូវីដ-១៩ បានជះផលប៉ះពាល់ធ្ងន់ធ្ងរ ដល់ចំណូលគ្រួសាររបស់ខ្លួន» ។ យុវសិស្ស វ៉ាក់សាក់ និយាយយ៉ាងដូច្នេះថា៖ «ប្រាក់អាហារូបករណ៍ពីក្រុមហ៊ុន អេសស៊ីជី បានជួយសម្រាលការលំបាករបស់គ្រួសារខ្ញុំបានមួយចំណែក ។ ខ្ញុំសូមអរគុណដល់ អេសស៊ីជី ។ ខ្ញុំនឹងខិតខំ រៀនសូត្រ ។ ទៅថ្ងៃមុខ ខ្ញុំចង់ក្លាយជាវិស្វករស៊ីវិលមួយរូប»។
ចាប់តាំងពីឆ្នាំ២០១៤ មក ក្រុមហ៊ុន អេសស៊ីជី បានផ្ដល់អាហារូបករណ៍ដល់សិស្សនិស្សិតសរុបជាង ១,៣០០នាក់ នៅក្នុងប្រទេសកម្ពុជា នៅក្រោមកម្មវិធី “អេសស៊ីជី ចែករំលែកក្ដីសុបិន” របស់ខ្លួន ។
នៅឆ្នាំនេះ ទោះបីមានភាពប្រឈមដោយសារកូវីដ-១៩ក្ដី អេសស៊ីជី នៅតែប្ដេជ្ញាចិត្តជាបន្តក្នុងការជួយដល់យុវជនកម្ពុជា ដើម្បីសម្រេចក្ដីសុបិនសម្រាប់អនាគតដែលពួកគេចង់បាន ។
នៅឆ្នាំ២០២០ អេសស៊ីជី ក៏បានផ្ដល់អំណោយសង្គ្រោះ ជាគ្រឿងឧបភោគបរិភោគ ដល់គ្រួសារជាច្រើនពាន់ ដែលរងផលប៉ះពាល់ដោយសារទឹកជំនន់ បានបរិច្ចាគប្រអប់សុវត្ថិភាពវេជ្ជសាស្ត្រ ដល់ក្រសួងសុខាភិបាល សម្រាប់ប្រើប្រាស់ដើម្បីប្រយុទ្ធប្រឆាំងនឹងជំងឺកូវីដ-១៩ ព្រមទាំងបានចែកម៉ាស និងទឹកអាល់កុលលាងសម្អាតដៃ ដល់សាធារណជនផងដែរ។ លើសពីនេះទៀត អេសស៊ីជី ក៏បានបរិច្ចាគស៊ីម៉ងត៍ និងគ្រឿងសំណង់ ដែលមានទឹកប្រាក់ជាច្រើនពាន់ដុល្លារទៅដល់សាលាដូង នៅឧទ្យានជាតិគិរីរម្យ និងវិទ្យាស្ថានបច្ចេកវិទ្យាកំពង់ស្ពឺ ថែមទៀតផង ៕
(អត្ថបទពាណិជ្ជកម្ម)