ចំពោះអាទិភាពការងារ ដែលកម្ពុជាត្រូវអនុវត្តក្នុងនាមជាម្ចាស់ផ្ទះអាស៊ាន នៅឆ្នាំ ២០២២វិញ រួមមានទី១ សសរស្តមនយោបាយ និងសន្តិសុខ ដោយកម្ពុជា នឹងយកចិត្តទុកដាក់ពង្រឹងមជ្ឈភាព និងឯកភាពអាស៊ាន ទាំងក្នុងយន្តការតំបន់ និងកិច្ចសហប្រត្តិបត្តិការជាមួយដៃគូខាងក្រៅ ដោយឈរលើមាគ៌ា និងគោលការណ៍ ដែលមានចែងក្នុងធម្មនុញ្ញអាស៊ាន។ មិនតែប៉ុណ្ណោះកម្ពុជា ក៏អនុវត្តតាមសន្ធិសញ្ញាមិត្តភាព និងសហប្រតិបត្តការនៅអាស៊ីអាគ្នេយ៍ និងទស្សនវិស័យអាស៊ាន ស្តីពីឥណ្ឌូប៉ាស៊ីហ្វិក។ នេះបើតាមសម្ដេច ហ៊ុន សែន។
 

នាយករដ្ឋមន្រ្តីកម្ពុជា បានសង្កត់ធ្ងន់ដូច្នេះថា៖«អាស៊ាន ក៏ត្រូវមានភាពធន់ និងរឺងមាំ ទប់ទល់បានពីសម្ពាធ និងឥទ្ធិពលនៃការប្រកួតប្រជែងភូមិសាស្រ្តនយោបាយ ដែលកំពុងតែកើតឡើង បញ្ហាឧក្រិដ្ឋកម្មឆ្លងដែន ភេរវកម្ម ការប្រែប្រួលអាកាសធាតុ ជំងឺរាតត្បាត។ល។ ដើម្បីធានាដំណើរទៅមុខក្នុងសន្តិភាព សន្តិសុខ និងវិបុលភាព»។
 

ចំណុចទី២ ទាក់ទងនឹងសសរស្ដម្ភសេដ្ឋកិច្ចវិញ សម្ដេច ហ៊ុន សែន ប្ដេជ្ញាជំរុញការអនុវត្តឱ្យមានប្រសិទ្ធភាពខ្ពស់ នូវរាល់គំនិតផ្ដួចផ្ដើម និងវិធានការ ដែលបានឯកភាពគ្នា និងទាញយកផលប្រយោជន៍ ជាអតិបរមាពីកិច្ចព្រមព្រៀងពាណិជ្ជកម្មសេរីនានា ដើម្បីស្ដារកំណើនសេដ្ឋកិច្ចឱ្យបានឆាប់រហ័ស ស្របពេលដែលត្រូវរស់នៅជាមួយកូវីដ-១៩ នៃប្រក្រតីភាពថ្មី និងធានាឱ្យអាស៊ាននៅតែជាមជ្ឈមណ្ឌលពាណិជ្ជកម្ម និងការវិនិយោគប្រកបដោយភាពទាក់ទាញ។ ជាពិសេសជំរុញការតភ្ជាប់រូបវ័ន្ត និងឌីជីថល ការលើកកម្ពស់សមត្ថភាពរបស់សហគ្រាសខ្នាតតូច និងមធ្យម SMEs រួមទាំងលើកកម្ពស់សហគ្រិនភាពរបស់ស្ត្រី និងយុវជន និងអទិភាពផ្សេងទៀត ដើម្បីកាត់បន្ថយគម្លាតអភិវឌ្ឍ និងពង្រឹងសមាហរណកម្មតំបន់។