ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី២៦ ខែមេសា បានយល់ព្រមជាគោលការណ៍ ដើម្បីអនុញ្ញាតឱ្យអង្គការសហប្រជាជាតិ (UN) និងគណៈកម្មាធិការកាកបាទក្រហមអន្តរជាតិ (ICRC) ជួយជម្លៀសប្រជាជនអ៊ុយក្រែនពីរោងចក្រដែកក្នុងក្រុង Mariupol ដែលរុស្ស៊ីកំពុងគ្រប់គ្រង។
កាលពីថ្ងៃទី២០ ខែមេសា រុស្ស៊ី បានប្រកាសថា ខ្លួនបានគ្រប់គ្រងទីក្រុង Mariupol ហើយចាត់ទុកជាការរំដោះក្រុងដោយជោគជ័យផងដែរ។ យ៉ាងណាមិញ ទាហានព្រមទាំងជនស៊ីវិលអ៊ុយក្រែនប្រមាណ២ពាន់នាក់បានបន្តលាក់ខ្លួននៅរោងចក្រដែក Azovstal ក្នុងទីក្រុង Mariupol ខណៈបារម្ភពីការវាយប្រហារពីរុស្ស៊ី។ បន្ថែមពីនេះ ប្រជាជនអ៊ុយក្រែនជាង១០ម៉ឺននាក់ក្នុងទីក្រុង Mariupol ក៏កំពុងជួបបញ្ហាមនុស្សធម៌ផងដែរ។
ប្រមុខ UN លោក អាន់តូនីញ៉ូ ហ្គូតេរ៉េស នៅថ្ងៃទី២៦ ខែមេសា ក៏ធ្វើដំណើរទៅក្រុងមូស្គូ ហើយជួបជាមួយមេដឹកនាំរុស្ស៊ី វ៉្លាឌីមៀ ពូទីន ។ អ្នកនាំពាក្យ UN លោក Stephane Dujarric បញ្ជាក់ថា លោក ហ្គូតេរ៉េស និងលោក ពូទីន បានពិភាក្សាពីតម្រូវការផ្ដល់ជំនួយមនុស្សធម៌ និងការជម្លៀសប្រជាជនក្នុងទីក្រុង Mariupol ជាពិសេសជនស៊ីវិល និងទាហានអ៊ុយក្រែនដែលជាប់នៅរោងចក្រដែក Azovstal។
«ប្រធានាធិបតីរុស្ស៊ីបានយល់ព្រមជាគោលការណ៍ដើម្បីអនុញ្ញាតឱ្យ UN និងគណៈកម្មាធិការកាកបាទក្រហមអន្តរជាតិ ជួយជម្លៀសប្រជាជនចេញពីរោងចក្រដែក Azovstal នៅទីក្រុង Mariupol»។ អ្នកនាំពាក្យខាងលើ បញ្ជាក់បែបនេះ រួចបន្តថា ការពិភាក្សាបន្តទៀតនឹងត្រូវធ្វើឡើងរវាងការិយាល័យ UN សម្រាប់ការសម្របសម្រួលកិច្ចការមនុស្សធម៌ និងក្រសួងការពារជាតិរុស្ស៊ី។
ចំពោះមុខប្រមុខ UN លោក ពូទីន បានលើកឡើងថា លោកសង្ឃឹមលើការចរចាដើម្បីបញ្ចប់ជម្លោះតាមផ្លូវការទូត។ លោកកូ៏ប្រកាសថា ក្រុងមូស្គូមិនបដិសេធការចរចាគ្នាជាមួយអ៊ុយក្រែននោះឡើយ។
បើតាមមេដឹកនាំរុស្ស៊ី កិច្ចចរចានៅទីក្រុងអ៊ីស្តង់ប៊ុល ទឹកដីតួកគី កាលពីខែមីនា ទទួលបានជោគជ័យមួយចំនួន។ យ៉ាងណាមិញ លោក ពូទីន ក៏ចោទអ៊ុយក្រែនថា បានដើរបកក្រោយចំពោះកិច្ចព្រមព្រៀងបណ្តោះអាសន្នមួយចំនួនដែលបានសម្រេចទៅវិញ។
អំឡុងជំនួបខាងលើ លោក ហ្គូតេរ៉េស ក៏បានទទូចសារជាថ្មីឱ្យមានបទឈប់បាញ់ដើម្បីការពារប្រជាជន ហើយភាគីជម្លោះគួរតែបែរទៅរកការចរចាគ្នាដើម្បីរកដំណោះស្រាយ។ ទាក់ទងនឹងការវាយប្រហារតំបន់ដុនបាសនៅភាគខាងកើតអ៊ុយក្រែន និងការស្លាប់របស់ប្រជាជនក្នុងជម្លោះនេះ លោក ហ្គូតេរ៉េស សង្កត់ធ្ងន់ថា របាយការណ៍ដដែលៗអំពីការរំលោភបំពានក៏ដូចជាឧក្រិដ្ឋកម្មសង្គ្រាមដែលអាចកើតមាន នឹងតម្រូវឱ្យមានការស៊ើបអង្កេតឯករាជ្យដើម្បីរកការទទួលខុសត្រូវ។
ដោយឡែក ក្នុងសន្និសីទកាសែតជាមួយរដ្ឋមន្ត្រីកាបរទេសរុស្ស៊ី ស៊ែហ្គេយ៍ ឡាវរ៉ូវ ប្រមុខ UN អះអាង ថា លោកបានស្នើឱ្យមានក្រុមទំនាក់ទំនងមនុស្សធម៌រុស្ស៊ី អ៊ុយក្រែន និងមន្ត្រី UN ដែលនឹងធ្វើការរួម គ្នាដើម្បីស្វែងរកឱកាសក្នុងការបើកច្រកសុវត្ថិភាព និងមានប្រសិទ្ធភាពក្នុងការជម្លៀសជនស៊ីវិល និងផ្ដល់ជំនួយមនុស្សធម៌ផងដែរ៕