អន្តរជាតិ
១សប្ដាហ៍ក្រោយរកឃើញករណីកូវីដ-១៩ ដំបូង កោះមីក្រូណេស៊ីមានអ្នកឆ្លងជាង១ពាន់នាក់ ![ទីតាំងធ្វើតេស្តរកជំងឺកូវីដ-១៩ មួយកន្លែងនៅកោះសហព័ន្ធមីក្រូណេស៊ី។](https://image.thmeythmey.com/pictures/2022/07/25/cov.jpg)
ទីតាំងធ្វើតេស្តរកជំងឺកូវីដ-១៩ មួយកន្លែងនៅកោះសហព័ន្ធមីក្រូណេស៊ី។
×![]()
ចំនួនករណីវិជ្ជមានកូវីដ-១៩ សរុបនៅរដ្ឋសហព័ន្ធមីក្រូណេស៊ី ត្រឹមថ្ងៃទី២៥ ខែកក្កដា បានកើនឡើងដល់ជាង១ពាន់ករណី។ នេះជាអត្រាឆ្លងសរុបរយៈមួយសប្ដាហ៍ប៉ុណ្ណោះក្រោយរកឃើញករណីឆ្លងដំបូង។
នៅថ្ងៃទី១៨ ខែកក្កដា ប្រទេសកោះមីក្រូណេស៊ីនៃតំបន់មហាសមុទ្រប៉ាស៊ីហ្វិកបានរកឃើញករណីវិជ្ជមានកូវីដ-១៩ លើកដំបូង ខណៈជំងឺនេះបានផ្ទុះជាសកលជាង២ឆ្នាំមកហើយ។ មកទល់ថ្ងៃទី២៥ ខែកក្កដា មីក្រូណេស៊ីមានករណីវិជ្ជមានកូវីដ-១៩ ស្ទុះឡើងយ៉ាងរហ័សដល់ជាង ១ពាន់ករណីឯណោះ។
ការិយាល័យប្រធានាធិបតីមីក្រូណេស៊ី បានអះអាងថា ក្នុងចំណោមអ្នកឆ្លងជំងឺកូវីដ-១៩ សរុប អ្នកមានអាការៈធ្ងន់ធ្ងរមានតែ ៣នាក់ប៉ុណ្ណោះ ដែលរួមទាំងអនុប្រធានាធិបតីមីក្រូណេស៊ី Yosiwo P. George ផងដែរ។
រដ្ឋ Pohnpie ជាទីតាំងរកឃើញករណីឆ្លងជំងឺកូវីដ-១៩ ដំបូង មានករណីវិជ្ជមានសរុប៦៩៩ករណី ខណៈរដ្ឋ Kosrae មាន ៣១៣ករណី។ ចំណែករដ្ឋ Chuuk មានករណីវិជ្ជមានកូវីដ-១៩ ៧ករណី និង ៣ករណីទៀតនៅរដ្ឋ Yap ដែលទាំង ១០នាក់នេះជាអ្នកឆ្លងមកពីក្រៅប្រទេស។ ករណីស្លាប់នៅមិនទាន់មានឡើយ។ នេះបើតាមសាព័ត៌មាន Pacific Daily News។
មីក្រូណេស៊ី បានចាប់ផ្ដើមយុទ្ធនាការចាក់វ៉ាក់សាំងបង្ការជំងឺកូវីដ-១៩ តាំងពីថ្ងៃទី៣១ ខែធ្នូ ឆ្នាំ២០២០ មក។ ប្រជាជនប្រទេសកោះមួយនេះ ដែលមានអាយុចាប់ពី៥ឆ្នាំឡើងទៅ ៧៤ភាគរយបានចាក់វ៉ាក់សាំងពេញលេញហើយ។ បើតាមក្រសួងសុខាភិបាល និងកិច្ចការសង្គមមីក្រូណេស៊ី ប្រជាជនមានអាយុចាប់ពី៤៥ឆ្នាំឡើងប្រហែល៥៥ភាគរយបានចាក់វ៉ាក់សាំងដូសជំរុញយ៉ាងតិចម្ដង។
តាំងពីមានការរាលដាលជំងឺកូវីដ-១៩ អាជ្ញាធរមីក្រូណេស៊ីបានដាក់វិធានការទប់ស្កាត់ដូចជាចៀសវាងការជួបជុំគ្នា និងត្រូវពាក់ម៉ាស់គ្រប់ពេលវេលា ប៉ុន្តែសេវាសាធារណៈទាំងអស់នៅតែបើកដំណើរការធម្មតា៕
© រក្សាសិទ្ធិដោយ thmeythmey.com