« លោក ម៉ូឌី ពិតជាយកចិត្តទុកដាក់ចំពោះឥណ្ឌា ពីព្រោះគាត់កំពុងជំរុញឱ្យយើងធ្វើការវិនិយោគសំខាន់ៗទៅឥណ្ឌា ហើយនោះជាអ្វីដែលយើងចង់ធ្វើ។ យើង​គ្រាន់​តែ​ព្យាយាម​រក​ឱ្យ​ឃើញ​ពី​ពេល​វេលា​ដ៏​ត្រឹម​ត្រូវតែប៉ុណ្ណោះ»។  លោក អេឡុន ម៉ាសក៍ បាននិយាយបែបនេះ ដោយមិនបញ្ជាក់ពេលវេលាជាក់លាក់ណាមួយ នាគម្រោងធ្វើទស្សនកិច្ច នៅឥណ្ឌានាឆ្នាំក្រោយ។

 

បំណងរបស់លោក អេឡុន ម៉ាសក៍ ចូលទៅក្នុងទីផ្សារឥណ្ឌា មានជាយូរមកហើយ។ ចាប់តាំងពីឆ្នាំ ២០១៧ នាយកប្រតិបត្តិរូបនេះបានលើកឡើងថា ក្រុមហ៊ុន Tesla គ្រោងនឹងលក់រថយន្តនៅឥណ្ឌាឱ្យបានឆាប់នៅរដូវក្តៅ។ ប៉ុន្តែ​ផែនការ​នោះ ​ត្រូវ​បានពន្យារ​ពេល ​ដោយ​សារ​តែ​កិច្ច​ខិត​ខំ​ប្រឹង​ប្រែង​របស់ Tesla ក្នុង​ការ​ចរចា​តម្លៃ​ពន្ធ​នាំ​ចូល​ទាប ​ជាមួយ​នឹង​រដ្ឋាភិបាល​ក្នុង​តំបន់។ 

 

លោក ម៉ាសក៍ បានសរសេរនៅលើបណ្តាញ Twitter ក្នុងឆ្នាំ២០២១ យ៉ាងដូច្នេះ ៖ « Tesla ចង់ចូលទៅទីផ្សារឥណ្ឌា ប៉ុន្តែពន្ធនាំចូលគឺខ្ពស់បំផុតនៅលើពិភពលោក បើធៀបនឹងប្រទេសធំៗផ្សេងទៀត» ។ 

ក្រុមហ៊ុន Tesla បានព្យាយាមកាត់បន្ថយពន្ធ ប៉ុន្តែរដ្ឋាភិបាលឥណ្ឌាចង់ឱ្យក្រុមហ៊ុននេះផលិតរថយន្តក្នុងស្រុក មុនពេលពិចារណាលើការដកពន្ធណាមួយ។  នេះបើយោងតាមសារព័ត៌មានReuters​។

 

បច្ចុប្បន្ន Tesla មានរោងចក្រយក្សមួយនៅអាស៊ី ដែលមានទីតាំងនៅទីក្រុងសៀងហៃ ។ នេះគឺជារោងចក្រផលិតរថយន្តដ៏ធំបំផុតរបស់ក្រុមហ៊ុន Tesla ក្រៅពីអាម៉េរិក ហើយដែលមានចំនួនច្រើនជាងពាក់កណ្តាល នៃការចែកចាយរបស់ Tesla ទូទាំងពិភពលោកនៅក្នុងឆ្នាំ ២០២២ ។

 

កាលពីខែមុនលោក ម៉ាសក៍ បាននិយាយនៅក្នុងព្រឹត្តិការណ៍មួយថា ក្រុមហ៊ុនទំនងជានឹងជ្រើសរើសទីតាំងសម្រាប់រោងចក្រ Tesla ថ្មីនៅចុងឆ្នាំនេះ  ហើយឥណ្ឌាគឺជាជម្រើសដ៏គួរឱ្យចាប់អារម្មណ៍៕