ជាតិ
នយោបាយជាតិ
លោក សុខ ទូច ស្នើឲ្យរដ្ឋាភិបាលកម្ពុជា ពិភាក្សាពីផលប៉ះពាល់ដនសាហុងជាមួយឡាវ
×![]()
ដោយ: ធឿន បញ្ញាឬទិ្ធ
អ្នកសិក្សាស្រាវជ្រាវទំនាក់ទំនងអន្តរជាតិ លោក សុខ ទូច បានបញ្ជាក់ថា រាជបណ្ឌិតសភា នឹងរៀបចំលិខិតតាមរយៈប្រធានរាជបណ្ឌិតសភាកម្ពុជា បញ្ជូនទៅកាន់រដ្ឋាភិបាលអំពី បញ្ហាផលប៉ះពាល់នៃទំនប់វារីអគ្គិសនីដនសាហុង ដើម្បីលើកយកមកពិភាក្សាគ្នាជាមួយនឹងប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ។ ជាមួយគ្នានេះលោកក៏គ្រោងនឹងបញ្ជូនលិខិតស្នើទៅកាន់បណ្ដាទូត នៅប្រទេសកម្ពុជា ដើម្បីអញ្ជើញបណ្ឌិតសិក្សាស្រាវជ្រាវក្នុងប្រទេសទាំងនោះ មកជជែកពិភាក្សាគ្នាពីបញ្ហាផលប៉ះពាល់នៃទំនប់វារីអគ្គិសនីដនសាហុងនេះផងដែរ។
បន្ទាប់ពីរាជបណ្ឌិតសភាបានសិក្សាស្រាវជ្រាវ អំពីផលប៉ះពាល់នៃការសាងសង់ទំនប់វារីអគ្គិសនីដនសាហុងកន្លងមក ឃើញថា ទំនប់វារីអគ្គិសនីនេះ អាចធ្វើឲ្យមានផលប៉ះពាល់យ៉ាងខ្លាំងដល់ជីវភាពនៃការរស់នៅរបស់ប្រជាពលរដ្ឋជាង៩ពាន់គ្រួសារ និងជីវចម្រុះនៅក្នុងទឹកទៀតផង។ នេះបើតាមលោក សុខ ទូច អ្នកសិក្សាស្រាវជ្រាវទំនាក់ទំនងអន្តរជាតិនៃរាជបណ្ឌិតសភា។
នៅចំពោះមុខអ្នកកាសែត លោក សុខ ទូច បានបញ្ជាក់ទៀតថា ការសាងសង់ទំនប់វារីអគ្គិសនីដនសាហុងនេះ គឺភាគីកម្ពុជាទទួលរងផលប៉ះពាល់ធ្ងន់ធ្ងរជាងប្រទេសឡាវ។ ដោយសារតែមានផលប៉ះពាល់នេះ លោក សុខ ទូច ក៏នឹងរៀបចំលិខិតតាមរយៈប្រធានរាជបណ្ឌិតសភាកម្ពុជា បញ្ជូនទៅកាន់រដ្ឋាភិបាលអំពី បញ្ហាផលប៉ះពាល់នៃទំនប់វារីអគ្គិសនីដនសាហុង ដើម្បីលើកយកពិភាក្សាគ្នាជាមួយនឹងប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ ដែលគ្រោងនឹងបំពេញទស្សនកិច្ចនៅកម្ពុជានាពេលខាងមុខនេះផងដែរ។
លើសពីនេះលោកក៏នឹងបញ្ជូនលិខិតស្នើទៅកាន់បណ្ដាទូត នៅប្រទេសកម្ពុជា ដូចជាប្រទេសថៃ ឡាវ វៀតណាមជាដើម ដើម្បីអញ្ជើញបណ្ឌិតសិក្សាស្រាវជ្រាវក្នុងប្រទេសទាំងនោះ មកជជែកពិភាក្សាគ្នាពីបញ្ហាផលប៉ះពាល់នៃទំនប់វារីអគ្គិសនីដនសាហុងនេះ ។ បើតាមលោក សុខ ទូច បើឡាវគិតគូរពីចំណងមិត្តភាពនៃប្រទេសទាំងពីរ ភាគីឡាវគួរតែធ្វើទំនប់វារីអគ្គិសនីដនសាហុងនេះ ឲ្យនៅឆ្ងាយពីព្រំដែនប្រទេសទាំងពីរ។ ហើយការសាងសងនេះ គឺជាអធិបតេយ្យភាពរបស់ប្រទេសឡាវ ហើយកម្ពុជាក៏គ្មានសិទ្ធិហាមឃាត់នោះទេ។
លោកបណ្ឌិតរូបនេះបាននិយាយខ្លាំងៗយ៉ាងដូច្នេះថា៖« ការសម្រេចចិត្តរបស់ឡាវ ក្នុងការសាងសង់ទំនប់វារីអគ្គិសនីដនសាហុង គឺជាសិទ្ធិរបស់ឡាវ ក៏ប៉ុន្តែឡាវត្រូវគិតពីផលប៉ះពាល់ដល់ប្រជាពលរដ្ឋកម្ពុជាផង។ ឡាវចេះគិតពីផលប៉ះពាល់របស់ប្រជាជនឡាវខ្លួនឯងនៅតំបន់នោះ ចុះប្រជាជនខ្មែរដែលរងផលប៉ះពាល់នៅខាងក្រោមនៃការសាងសងនេះ។ ដូចនេះឡាវត្រូវដោះស្រាយពីផលប៉ះពាល់ដល់ប្រជាជនខ្មែរដូចគ្នា។ ឡាវធ្លាប់និយាយថា វាយសត្រូវរួមគ្នា ផឹកទឹកទន្លេមេគង្គរួមគ្នា»។ លោកបន្ដថា ៖«កម្ពុជាក៏គ្មានសិទ្ធិហាមឃាត់ការសាងសង់នេះដែរ។ តែកម្ពុជាទាមទារឲ្យឡាវធ្វើការសិក្សាឲ្យបានគ្រប់ជ្រុងជ្រួយ ដើម្បីបញ្ចៀសនូវផលប៉ះពាល់ក្នុងលក្ខណៈទ្រង់ទ្រាយធំ»។
កិច្ចព្រមព្រៀងមេគង្គឆ្នាំ១៩៩៥ បានចែងថា រាល់សំណើគម្រោងប្រើប្រាស់ទឹកក្នុងទន្លេមេ នៃទន្លេមេគង្គ នៅក្នុងរដូវប្រាំងត្រូវឆ្លងកាត់នីតិវិធីនៃការពិគ្រោះយោបល់ជាមុន ដើម្បីជាមូលដ្ឋានសម្រាប់ឈានដល់ការឯកភាពគ្នា ក្នុងចំណោមគណៈកម្មាធិការរួម នៃគណៈកម្មការទន្លេមេគង្គ។ សេចក្ដីថ្លែងការណ៍រួមហួហ៊ីន ចុះថ្ងៃទី ៥ មេសា ឆ្នាំ២០១០ និងសេចក្ដីថ្លែងការណ៍រួមក្រុងហូជីមិញ ចុះថ្ងៃទី ០៥ មេសាឆ្នាំ២០១៤ នៃកិច្ចប្រជុំកំពូលរបស់គណៈកម្មការទន្លេមេគង្គ បានបង្ហាញគ្រប់ជ្រុងជ្រោយអំពីសន្ដិសុខ ថាមពល និងស្បៀងសម្រាប់ទន្លេមេគង្គ ក្នុងបរិបទបម្រែបម្រួលអាកាសធាតុ។
កាលពីថ្ងៃទី ១៥-១៦ មករា ឆ្នាំ២០១៥ ភាគីវៀតណាមធ្វើជាប្រធានផ្លាស់វេនកិច្ចប្រជុំតំបន់ទន្លេមេគង្គ នៅទីក្រុងហាណូយ ដោយកាលនោះលោក ង្វៀង ម៉ីញក្វាង រដ្ឋមន្ត្រីធនធានធម្មជាតិ និងបរិស្ថានវៀតណាម ស្នើឲ្យភាគីឡាវសិក្សាបន្ថែមលើបញ្ហានេះ ប៉ុន្ដែមិនមែនមានន័យថា ឲ្យភាគីឡាវពន្យាពេលនៃការសាងសង់នេះទេ។ ចំពោះចំណុចនេះលោក សុខ ទូច យល់ឃើញថា វៀតណាមគ្រាន់តែធ្វើហាក់ដូចជាមានការព្រួយបារម្ភប៉ុណ្ណោះ តែការពិតវៀតណាមជាអ្នកបើកភ្លើងខៀវឲ្យភាគីឡាវសាងសង់ទំនប់វារីអគ្គិសនីនេះ។ ចំណែកភាគីថៃក៏មិនបានជួយអន្តរាគមន៍ពីបញ្ហានេះដែរ ព្រោះភាគីថៃបានទទួលផលប្រយោជន៍ច្រើនពីគម្រោងវារីអគ្គិសនីដនសាហុងនេះ។
គួរបញ្ជាក់ថា ទំនប់វារីអគ្គិសនីដន សាហុង មានចំងាយ១៥០០ម៉ែត្រប៉ុណ្ណោះពីព្រំដែនប្រទេសកម្ពុជា។ ហើយការសាងសង់ទំនប់វារីអគ្គិសនីនេះ ត្រូវបានអ្នកសិក្សាស្រាវជ្រាវមើលឃើញថា ប្រទេសកម្ពុជា គឺជាអ្នកទទួលរងផលប៉ះពាល់ធ្ងន់ធ្ងរជាងគេ ជាពិសេសជីវភាពរស់នៅរបស់ប្រជាពលរដ្ឋនៅតំបន់នោះ ការបាត់បង់សត្វផ្សោតដែលជិតផុតពូជ និងជីវចម្រុះក្នុងទឹកផ្សេងៗទៀត៕
© រក្សាសិទ្ធិដោយ thmeythmey.com
