អន្តរជាតិ
ជនជាតិចិន ៤ នាក់ស្ថិតក្នុងចំណោមមនុស្ស ១០០ នាក់សម្រាប់គម្រោងទៅរស់នៅភពអង្គារ
×![]()
ដោយ: ថ្មីៗ
ជនជាតិចិនចំនួន ៤ នាក់ នឹងស្ថិតក្នុងចំណោមបេក្ខជន ១០០នាក់សម្រាប់គម្រោងជ្រើសរើសមនុស្ស ឲ្យទៅរស់នៅភពព្រះអង្គារជាលើកទីមួយ ដោយមិនអាចវិលត្រឡប់មកផែនដីវិញនោះទេ។ ក្នុងចំណោមមនុស្សទាំង ១០០ នាក់នោះគេនឹងជ្រើសរើសយកមនុស្ស ២៤ នាក់ ដើម្បីទទួលបានការបណ្តុះបណ្តាពិសេសសម្រាប់ការធ្វើដំណើរទៅកាន់ភពព្រះអង្គារ។នេះបើយោងតាមសេចក្ដីរាយការណ៍របស់ កាសែត china daily ។
ប្រភពដដែលបានបញ្ជាក់ថា បេក្ខជនជាជនជាតិចិនទាំង ៤ នាក់គឺមាន ៣ នាក់ជាស្ត្រី ហើយមាន ២ នាក់រស់នៅក្នុងប្រទេសចិន ១ នាក់មកពីអាមេរិក និងម្នាក់ទៀតរស់នៅប្រទេសអង់គ្លេស។ បេក្ខជនទាំង ៤ នាក់នោះគឺ Li Dapengភេទប្រុស Lin Xiaoxiaភេទស្រី មកពីប្រទេសចិនSue Ann Pienភេទស្រី ជនជាតិចិនមកពីសហរដ្ឋអាមេរិកនិងMaggie Lieuភេទស្រី ជាជនជាតិចិនមកពីប្រទេសអង់គ្លេស។
គម្រោងទៅកាន់ភពព្រះអង្គារជាលើកទីមួយMars One គឺជាគម្រោងរបស់សហគ្រាសមិនរកប្រាក់ចំណេញBas Lansdorpរបស់ប្រទេសហូឡង់ ដែលត្រូវបានគេជាសហការបង្កើតឡើង កាលពីឆ្នាំ ២០១៣ក្នុងគោលបំណងដើម្បីបង្កើតស្ថានីយ៍ ដែលមានមនុស្សធ្វ់ការជាអចិន្ត្រៃយ៍មួយ នៅលើភពព្រះអង្គារ។
សហគ្រាសនេះក៏បានឲ្យដឹងថា មនុស្ស ៤ នាក់នឹងធ្វើដំណើរចាកចេញពីភពផែនដីទៅកាន់ភពព្រះអង្គាររៀងរាល់ពីរឆ្នាំម្ដងដោយចាប់ផ្តើមនៅឆ្នាំ ២០២៤ តទៅហើយពួកគេក៏នឹងត្រូវក្លាយជាផ្នែកមួយនៃកម្មវិធីទូរទស្សន៍ ដែលផ្សាយពីជីវិតពិតនៃការរស់នៅលើភពព្រះអង្គារ ។
មានសេក្ដីរាយការណ៍ថាការចំណាយសម្រាប់ការដឹកជញ្ជូនស្បៀងអាហារសម្រាប់មនុស្ស ៤ នាក់ជាលើកដំបូងនេះ នឹងត្រូវចំណាយប្រាក់អស់ ៤,៥ ពាន់លានដុល្លារ។
ក្នុងចំណោមបេក្ខជនជាជនជាតិចិន ៤ នាក់នោះ នាង Maggie Lieu អាចនិយាយភាសាចិននិងអង់គ្លេសបានយ៉ាងស្ទាត់ជំនាញ បាននិយាយថានាងស្រលាញ់វិទ្យាសាស្ត្រ និងអវកាស ជាខ្លាំង ហើយនាងបានរំពឹងថា តាមរយៈគម្រោងនេះនាងនឹងអាចមានកូននៅលើភពព្រះអង្គារ៕
© រក្សាសិទ្ធិដោយ thmeythmey.com
