ជាតិ
សង្គមជាតិ
សហការីអាឡិច នៅតែបន្តបេសកកម្មប្រឆាំងគម្រោងវារីអគ្គិសនីអារ៉ែង
×
ទោះបីជាអនុប្រធានអង្គការចលនាមាតាធម្មជាតិ លោក Alejandro Gonzalez Davidson ដែលគេស្គាល់ថា ជាលោក អាឡិច ត្រូវបានចាប់បញ្ជូនចេញពីប្រទេសកម្ពុជាហើយក៏ដោយ សកម្មជនការពារតំបន់ព្រៃអារ៉ែងរបស់អង្គការមាតាធម្មជាតិបានបេ្តជ្ញាបន្តរារាំងការកសាងទំនប់វារីអគ្គិសនី អារ៉ែងដដែល។ នេះជាការអះអាងរបស់លោក សាន់ ម៉ាឡា ដែលសហការីរបស់លោក អាឡិច និងជាស្ថាបនិកមួយរូបរបស់អង្គការមាតាធម្មជាតិ។
លោក អាឡិច បានចេញផុតពីទឹកដីកម្ពុជាហើយ ប៉ុន្តែបេសកកម្មប្រឆាំងគម្រោងសាងសង់វារីអគ្គិសនីក្នុងតំបន់អារ៉ែងនៅតែបន្ត។ សហការីរបស់អាឡិចប្រមាណ៥០នាក់ទៀតដែលរួមមានជនជាតិខ្មែរ និងជនជាតិភាគតិចក្នុងតំបន់អារ៉ែង បានប្តេជ្ញាបន្តប្រឆាំងគម្រោងសាងសង់វារីអគ្គិសនី ដែលពួកគេអះអាង វានឹងបំផ្លាញព្រៃឈើ និងជីវៈចម្រុះយ៉ាងធំធេងនោះ។
លោក សាន់ ម៉ាឡា ស្ថាបនិកជនជាតិខ្មែរម្នាក់នៃអង្គការចលនាមាតាធម្មជាតិបានថ្លែងប្រាប់សារព័ត៌មានថ្មីៗនៅថ្ងៃអង្គារនេះថា សហការីរបស់លោកនឹងបន្តរួមកម្លាំង និងរួមគំនិតគ្នាទៀត ដើម្បីការពារតំបន់ព្រៃឈើធម្មជាតិរបស់កម្ពុជា។ លោក សាន់ ម៉ាឡា បានរៀបរាប់យ៉ាងដូច្នេះថា៖«យើងនឹងបន្តទាក់ទង និងពិភាក្សាជាមួយអាឡិចតាមរយៈអ៊ីមែល និងហ្វេសប៊ុក»។
បើតាមការបញ្ជាក់របស់លោក ម៉ាឡាដដែល ក្រោយពីអាឡិចចេញប្រទេសកម្ពុជាកាលពីយប់ថ្ងៃចន្ទ អាឡិចបានទាក់ទងពិភាក្សាជាមួយរូបលោក តាមរយៈហ្វេសប៊ុក អំពីផែនការសកម្មភាពប្រឆាំងនឹងគម្រោងវារីអគ្គិសនីខ្លះហើយដែរ។
អង្គការចលនាមាតាធម្មជាតិត្រូវបានបង្កើតឡើងនៅពាក់កណ្តាលឆ្នាំ ២០១៣ ដោយសា្ថបនិក៥នាក់ ដែលក្នុងនោះមានលោក អាឡិច ផងដែរ។ សកម្មភាពរបស់អង្គការនេះ បានពឹងផ្អែកទៅលើក្រុមការងារជាង៤០នាក់ទៀត ដែលជាពលរដ្ឋភាគតិចរស់នៅក្នុងតំបន់អារ៉ែងនោះ។ ភាគច្រើន អង្គការនេះអាចធ្វើសកម្មភាពបាន ដោយសារតែមានជំនួយហិរញ្ញវត្ថុពីអង្គការជាតិ និងអន្តរជាតិ។
លោក ម៉ាឡា បានថ្លែងបន្តទៀតថា៖«យើងមានបណ្តាញក្រុមការងារនៅក្នុងតំបន់នោះ ដែលអាចដឹងអំពីសកម្មភាពរបស់ក្រុមហ៊ុនចិនដែលចង់សាងសង់គម្រោងវារីអគ្គិសនី។ ប្រសិនបើពួកគេ ធ្វើសកម្មភាពដឹកគ្រឿងចក្រចូលក្នុងតំបន់នោះ យើងនឹងបន្តប្រឆាំងដដែល»។
ដោយសារតែអស់សុពលភាពនៃទិដ្ឋាការតាំងពីថ្ងៃទី២០កុម្ភៈ អាឡិចដែលជនជាតិអេស្ប៉ាញ និងជាអនុប្រធានអង្គការចលនាមាតាធម្មជាតិ ត្រូវបានអាជ្ញាធរកម្ពុជាចាប់បញ្ជូនចេញពីប្រទេសកម្ពុជានាយប់ថ្ងៃចន្ទនេះ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ធ្លាប់បានប្រាប់សារព័ត៌មានថ្មីៗថា ការចាប់បញ្ជូនអាឡិចចេញពីកម្ពុជា គឺគ្រាន់តែជាការអនុវត្តច្បាប់របស់កម្ពុជាក្នុងនាមជាប្រទេសដែលមានអធិបតេយ្យមួយតែប៉ុណ្ណោះ។
គួររម្លឹកថា អាឡិចបានចូលមកដល់កម្ពុជានៅក្នុងឆ្នាំ២០០២ ក្នុងនាមជាអ្នកទេសចរ។ បន្ទាប់មក ដោយសារការស្រឡាញ់ប្រទេសកម្ពុជា អាឡិចបានសម្រេចចិត្តរស់នៅកម្ពុជាតែម្តង រហូតដល់លោកបានចូលរួមបង្កើតអង្គការចលនាមាតាធម្មជាតិ ការពារព្រៃឈើអារ៉ែងក្នុងខេត្តកោះកុង ដោយប្រឆាំងនឹងគម្រោងសាងសង់វារីអគ្គិសនីនៅក្នុងតំបន់នោះ របស់រដ្ឋាភិបាលកម្ពុជា៕
© រក្សាសិទ្ធិដោយ thmeythmey.com