ប្រតិបត្តិការរុករកយន្តហោះអេហ្ស៊ីបកំពុងតែធ្វើ និងសង្ស័យថាជាស្នាដៃភេរវករ

អន្តរជាតិ

ប្រតិបត្តិការរុករកយន្តហោះអេហ្ស៊ីបកំពុងតែធ្វើ និងសង្ស័យថាជាស្នាដៃភេរវករ

20, May 2016 , 8:19 pm

រូបភាព

ដោយ: តន ចាន់រិទ្ធារ៉ា

ប្រតិបត្តិការស្វែងរកយន្តហោះអេហ្ស៊ីប Airbus A320 កំពុងតែធ្វើយ៉ាងញាប់ដៃញាប់ជើង បន្ទាប់ពីយន្តហោះបាត់ទំនាក់ទំនងជាមួយរ៉ាដា ខណៈកំពុងហោះហើរលើសមុទ្រម៉េឌីទែរ៉ានេក្នុងដែនអាកាសរបស់អេហ្ស៊ីប។ កងកម្លាំងមកពីអេហ្ស៊ីបនិងក្រិក បានទៅដល់កន្លែងដែលយន្តហោះបាត់ខ្លួន ស្របពេលដែលមូលហេតុនៃការបាត់នៅមិនទាន់រកឃើញ ប៉ុន្តែប្រធានាធិបតីបារាំងនិយាយថា យន្តហោះនោះបានធ្លាក់។

សូមស្ដាប់ព័ត៌មានលម្អិត៖

កងទ័ពកម្លាំងអាកាសនិងនាវាជើងទឹកមកពីអេហ្ស៊ីបនិងក្រិក កំពុងតែបើកប្រតិបត្តិការដ៏ធំ ដើម្បីរុករកយន្តហោះរបស់អាកាសចរណ៍អេហ្ស៊ីប ដែលបាត់ចេញពីរ៉ាដា នៅថ្ងៃទី១៩ ខែឧសភា។ យន្តហោះដែលបាត់ចេញពីរ៉ាដានេះ ហោះពីទីក្រុងប៉ារីសក្នុងទិសដៅទៅព្រលានយន្តហោះទីក្រុងគែរ ដោយមានអ្នកដំណើរ៥៦នាក់ និងបុគ្គលិកបម្រើការលើយន្តហោះ១០នាក់ផ្សេងទៀត។

គេនៅមិនទាន់ដឹងពីមូលហេតុដែលនាំឲ្យមានហេតុការណ៍នេះនៅឡើយទេ បើទោះជាមានព័ត៌មានថា ជាអំពើភេរវកម្មក៏ដោយ។ រដ្ឋមន្ត្រីអាកាសចរណ៍អេហ្ស៊ីបនិយាយថា ខណៈដែលវាដូចជាលឿនពេកក្នុងការកំណត់មូលហេតុនៅពីក្រោយការបាត់នេះ សេណារីយ៉ូភេរវកម្ម គឺទំនងជាមូលហេតុជាជាងបញ្ហាម៉ាស៊ីន។ ចំណែករដ្ឋមន្ត្រីការពារជាតិក្រិកលោក Panos Kammenos ប្រាប់អ្នករាយការណ៍ព័ត៌មានថា យន្តហោះបានហោះឆែវពីរដងក្នុងដែនអាកាសរបស់អេហ្ស៊ីប មុនពេលទម្លាក់ខ្លួនមករយៈកម្ពស់ជិត៧ពាន់ម៉ែត ហើយក៏បាត់ខ្លួនពីរ៉ាដាតែម្ដង។

ជាមួយនឹងប្រតិបត្តិការរុករកដែលកំពុងធ្វើ ប្រធានាធិបតីអេហ្ស៊ីបលោក Abdel Fattah al-Sisi បានដាក់បញ្ជាឲ្យកងកម្លាំងទាំងអស់ត្រូវស្វែងរកយន្តហោះដែលបាត់។ ស្របគ្នានេះ បើតាមទូរទស្សន៍Channel NewsAsia កងកម្លាំងមកពីអាមេរិកនិងអង់គ្លេសក៏ចូលរួមក្នុងការស្វែងរកនេះដែរ។ អាមេរិកបានបញ្ជូនយន្តហោះស៊ើបការណ៍របស់ខ្លួនមកតំបន់សមុទ្រម៉េឌីទែរ៉ានេ ដើម្បីជួយប្រតិបត្តិការរុករកនេះ។

ប៉ុន្មានម៉ោងក្រោយការបាត់ខ្លួនយន្តហោះអេហ្ស៊ីបជើងហោះហើរលេខ MS804 គេបានរកឃើញបំណែកមួយអណ្ដែតលើផ្ទៃទឹកនៃសមុទ្រម៉េឌីទែរ៉ានេ។ អាជ្ញាធរអេហ្ស៊ីបនិយាយថា ខ្លួនបានរកឃើញបំណែកមួយនៅក្បែរកោះរបស់ក្រិក។ ប៉ុន្តែក្រោយមក ប្រមុខទីភ្នាក់ងារសុវត្ថិភាពអាកាសចរណ៍ក្រិកប្រកាសថា បំណែកវត្ថុដែលរកឃើញមិនមែនជារបស់យន្តហោះអេហ្ស៊ីបដែលបានបាត់នោះទេ។

១. រុស្សីថា ភេរវកម្មអាចនៅពីក្រោយការបាត់ខ្លួន
លោក Alexander Borntnikov មន្ត្រីជាន់ខ្ពស់របស់រុស្ស៊ីដែលទទួលបន្ទុកកិច្ចការសន្តិសុខសហព័ន្ធបានលើកឡើងថា ចលនាភេរវកម្មអាចជាមូលហេតុនៅពីក្រោយការធ្លាក់នៃយន្តហោះរបស់ក្រុមហ៊ុន អេហ្ស៊ីប MS804 នាថ្ងៃទី១៩ ខែឧសភា។ យន្តហោះមានផ្ទុកមនុស្ស ៦៦នាក់ ហើយវាបានធ្លាក់ពេលហោះហើរពីបារាំងទៅកាន់ប្រទេសអេហ្ស៊ីប។

បើតាមសារព័ត៌មានរដ្ឋរុស្ស៊ី TASS លោក Alexander Borntnikov បានបញ្ជាក់ថា៖« ឧបទ្ទវហេតុធ្លាក់យន្តហោះក្រុមហ៊ុនអាកាសចរណ៍អេហ្ស៊ីបនេះទំនងជាបណ្តាលមកពីការវាយប្រហាររបស់ក្រុមភេរវជន»។ លោកក៏បានអំពាវនាវឲ្យបណ្តាប្រទេសពាក់ព័ន្ធរួមទាំងដៃគូនៅអឺរ៉ុបចូលរួមទាំងអស់គ្នាដើម្បីស៊ើបអង្កេត និងកំណត់អត្តសញ្ញាណជនដែលពាក់ព័ន្ធករណីវាយប្រហារភេរវកម្មនេះ។

២. គ្រួសារជនរងគ្រោះអន្ទះសារចាំដំណឹងពីអាជ្ញាធរ
មិនបានប៉ុន្មានក្រោយទទួលដំណឹងបាត់យន្តហោះ ក្រុមគ្រួសារសាច់ញាតិនៃអ្នកដំណើរនិងបុគ្គលិកលើយន្តហោះ បានទៅដល់ព្រលានយន្តហោះក្រុងគែរ ដើម្បីទទួលព័ត៌មានពីសមាជិកគ្រួសារពួកគេ។ មនុស្សទាំងអស់៦៦នាក់ ក្នុងនោះមានអ្នកដំណើរ៥៦នាក់ កំពុងតែស្ថិតលើយន្តហោះ នៅពេលដែលយន្តហោះបាត់ការទាក់ទងជាមួយរ៉ាដា។

ក្នុងចំណោមអ្នកដំណើរទាំងអស់មានប្រជាជន បារាំង ១០នាក់ អេហ្ស៊ីប ៣០នាក់ និងក្រៅពីនោះមានអង់គ្លេស បែលហ្ស៊ិក គុយវ៉េត អារ៉ាប៊ីសាអូឌីត ឆាត ស៊ូដង់ ព័រទុយហ្កាល់ កាណាដា អ៊ីរ៉ាក់ ជាដើម។ អ្វីដែលសោកស្ដាយនោះ ក៏មានទារកពីរនាក់នៅលើយន្តហោះផងដែរ។