ជាតិ
ព្រះករុណា ព្រះមហាក្សត្រ៖ ខ្ញុំសង្ឃឹមថា រដ្ឋសភាបន្តដោះស្រាយបញ្ហាប្រឈម...
× ក្នុងឱកាសបើកសម័យប្រជុំរដ្ឋសភាលើកទី៩ នាថ្ងៃទី១២ ខែតុលា នេះ ព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី បានផ្ញើព្រះរាជសារអបអរសាទរថ្នាក់ដឹកនាំ និងសមាជិកសភាទាំងអស់ ដែលសម្រេចបានស្នាដៃធំធេងជូនជាតិ។
តាមរយៈព្រះរាជសារ ព្រះមហាក្សត្រ ទ្រង់បានមានព្រះរាជបន្ទូលថា ការខិតខំប្រឹងប្រែងរបស់សមាជិកសភាគ្រប់រូប ជាសកម្មភាពបម្រើប្រជាពលរដ្ឋ ដោយជួយដោះស្រាយបញ្ហាពលរដ្ឋតាមមូលដ្ឋាន ព្រមទាំងទទួលយកកង្វល់ និងការលំបាកទាំងឡាយរបស់ពលរដ្ឋ ទៅប្រាប់រដ្ឋាភិបាល ដើម្បីរិះរកវិធានការដោះស្រាយរាល់បញ្ហាទាំងនោះ។
«ខ្ញុំសង្ឃឹមថា រដ្ឋសភាដ៏ឧត្តុង្គឧត្តម ជាតំណាងប្រជាពលរដ្ឋខ្មែរទាំងមូល នឹងបន្តខិតខំប្រឹងប្រែងដោះស្រាយបញ្ហាប្រឈមចំពោះមុខបន្តទៀត ដើម្បីសម្រេចឲ្យបាននូវទិសដៅរួមជាជំហានៗ ធានាបាននូវសង្គមកម្ពុជាមួយ ប្រកបដោយភាពសុខដុមរមនា»។ ព្រះប្រមុខរដ្ឋមានព្រះរាជចំណារយ៉ាងដូច្នេះ។
ជាមួយគ្នានេះផងដែរ ព្រះករុណាព្រះមហាក្សត្រ បានកោតសរសើរសម្តេចនាយករដ្ឋមន្ត្រី ហ៊ុន សែន ដែលបានដឹកនាំរដ្ឋាភិបាល ក្នុងដំណើរការប្រកបដោយជោគជ័យនៃការស្តារ និងអភិវឌ្ឍន៍ប្រទេសឡើងវិញ។ ព្រះអង្គ បានបន្ថែមថា កិច្ចខិតខំប្រឹងប្រែងរួមគ្នារវាងសភា និងរដ្ឋាភិបាល គឺជាសកម្មភាពដែលនាំឲ្យប្រទេសជាតិរក្សាបាននូវសន្តិភាព ស្ថិរភាព និងការអភិវឌ្ឍន៍៕
Tag:
រដ្ឋសភា
ព្រះមហាក្សត្រ
© រក្សាសិទ្ធិដោយ thmeythmey.com