លោក ថេន សេន នឹងក្លាយជានិមិត្តរូបនៃកំណែទម្រង់ បើគាត់ទទួលស្គាល់បរាជ័យ

អន្តរជាតិ

លោក ថេន សេន នឹងក្លាយជានិមិត្តរូបនៃកំណែទម្រង់ បើគាត់ទទួលស្គាល់បរាជ័យ

10, Nov 2015 , 9:39 pm

រូបភាព

ដោយ:

ព្រឹត្តិការណ៍នៃការបោះឆ្នោតលើកដំបូងបែបប្រវត្តិសាស្ត្រមីយ៉ាន់ម៉ាកាលពីថ្ងៃអាទិត្យកន្លងទៅនេះ បានក្លាយជាប្រធានបទ និង វិញ្ញាសារសាកល្បងមួយនៃដំណើរឆ្ពោះទៅកាន់លទ្ធិប្រជាធិបតេយ្យដែលពិភពលោកមិនអាចដាក់ភ្នែកចោលបានឡើយ។ ពិតណាស់លទ្ធផលនៃការបោះឆ្នោត បានបង្ហាញថាបក្សប្រឆាំងរបស់លោកស្រីអ៊ុងសាន ស៊ូជី ទទួលបាន សំឡេងគាំទ្រ ភ្លូកទីកភ្លូកដី តែវានៅតែមានភាពស្រពិចស្រពិលនៅឡើយថាតើលទ្ធិប្រជាធិបតេយ្យមីយ៉ាន់ម៉ាពិតប្រាកដអាចកើតមានឬយ៉ាងណា?

សូមស្ដាប់ព័ត៌មានលម្អិត៖

មកទល់ថ្ងៃអង្គារនេះ ប្រធានាធិបតីមីយ៉ាន់ម៉ា លោក ថេន សេន នៅតែបន្តរក្សាភាពស្ងៀមស្ងាត់ ខណៈ តំណាងបក្សខ្លួន និង តំណាងគណបក្សប្រឆាំងលោកស្រីអ៊ុងសាន ស៊ូជី បានចេញមុខនិងប្រកាសថា បក្សប្រឆាំងបានទទួលជ័យជម្នះភ្លូកទឹកភ្លូកដីលើការបោះឆ្នោតនេះ។ ហើយ វា នឹងក្លាយជារឿងដ៏ល្អមួយប្រសិនភាពស្ងប់ស្ងាត់នេះ បង្ហាញពីការទទួលស្គាល់នៃលទ្ធផលនៃការបោះឆ្នោតវិញនោះ។

១. តើលោកថេន សេន ជានរណា?
លោកប្រធានាធិបតី ថេន សេន គឺជាអតីតយោធាមួយរូប។ លោក បានចាប់ផ្តើមប្រលូកសកម្មក្នុងនយោបាយមីយ៉ាន់មា់ក្នុងឆ្នាំ២០១០ ដោយលោកបានលាលែងតំណែងយោធាដើម្បីដឹកនាំក្នុងបក្ស សហភាពរួបរួម និង ការអភិវឌ្ឍន៍ដែលជាបក្សកាន់អំណាចបច្ចុប្បន្ន ។ លោក ត្រូវបានសភាតែងតាំងជាប្រធានាធិបតីមីយ៉ាន់ម៉ាក្នុងឆ្នាំ២០១១ ដែលពេលនោះគឺជាពេលមួយគេស្គាល់ថាជាចំណុចរបត់នៃការផ្លាស់ប្តូររបបនយោបាយពោលគឺពីរបបសឹកយោធាមកកាន់របបលទ្ធិប្រជាធិតេយ្យ។ ថ្វីដ្បិត លទ្ធិ ប្រជាធិបតេយ្យមីយ៉ាន់ម៉ានៅក្មេងខ្ចី អំណាចយោធានិង បញ្ហាមួយចំនួន នៅតែបន្សល់ទុកក្នុងបរិបទ មីយ៉ាន់ម៉ា គេមិនអាចមិនទទួលស្គាល់សមិទ្ធផលដែលលោក ថេន សេន បានកសាងក្នុងអាណត្តិ ប្រធានាធិបតីរបស់លោកនោះទេ។

ចំណុចគួរកត់សម្គាល់នោះដោយសារតែ មីយ៉ាន់ម៉ា គឺជារដ្ឋដែលចម្រុះទៅដោយជាតិសាសន៍ជាច្រើន ដែលរាប់បញ្ចូលទាំងឧទ្ទាមផងដែរនោះ លោក ថេន សេន បានព្យាយាមចរចា និង ចុះកិច្ចព្រមព្រៀងសន្តិភាពស្តីបទឈប់បាញ់ជាមួយក្រុមឧទ្ទាមដើម្បីផ្សះផ្សារជាតិ កសាងស្ថិរភាព និង សន្តិភាពមីយ៉ាន់ ម៉ាឡើងវិញ។ ជាពិសេសនោះ លោក ក៏បានដោះលែងអ្នកទោសនយោបាយមីយ៉ាន់ម៉ារាប់ពាន់នាក់ ដែលត្រូវបានឃុំខ្លួនតាំងពីយោធាកាន់កាប់។ លោកថេន សេន ត្រូវបានមជ្ឈដ្ឋានអន្តរជាតិចាត់ទុកថា ជាអ្នកកែទម្រង់ មួយក្នុងរបបនយោបាយមីយ៉ាន់ម៉ា។

២. ការបោះឆ្នោត២០១៥ គឺជាវិញ្ញាសារសាកល្បងកេរ្តិ៍ឈ្មោះលោកថេន សេន និងក្រុមយោធា
ការបោះឆ្នោតសភាមីយ៉ាន់ម៉ាដែលប្រព្រឹត្តឡើងកាលពីថ្ងៃអាទិត្យ បានទទួលការសាទរពីសំណាក់ សហគមន៍អន្តជាតិ។ នោះក៏ព្រោះតែទាំងក្នុងពេលបោះឆ្នោត និង ទាំងក្នុងពេលរាប់សន្លឹកឆ្នោត គឺ មីយ៉ាន់ម៉ាអាចអនុវត្តទៅដោយរលូន សុវត្ថិភាព និង តម្លាភាពទៀត។ ហើយនេះ គឺជាចំណែកមួយដ៏ធំ របស់រដ្ឋាភិបាលមីយ៉ាន់ម៉ាដែលដឹកនាំដោយលោកប្រធានាធិបតីថេន សេន ក្នុងការធានា និង ជួយ សម្រួលឲ្យ ប្រជាពលរដ្ឋប្រមាណ៣០លាននាក់អាចចូលរួមបោះឆ្នោតលើកដំបូងក្នុងប្រវត្តិសាស្ត្រ រយៈពេល២៥ឆ្នាំ ។

គួរកត់សម្គាល់នោះ មកដល់ថ្ងៃទី៣ហើយក្រោយការបោះឆ្នោត គេមិនទាន់ឃើញមានសារនយោបាយ ឬ ប្រតិកម្មណាមួយរបស់លោកប្រធានាធិបតីថេន សេននោះឡើយនោះទេ។ អ្វីដែលគេចងចាំទៅលើ លោក ថេន សេន នោះគឺ នៅមុនមួយថ្ងៃនៃការបោះឆ្នោត លោក បានសន្យាថារដ្ឋាភិបាលនិងយោធា នឹងគោរពតាមលទ្ធផលនៃការបោះឆ្នោតនេះ។

តែវានៅតែជារឿងស្រពិចស្រពិលនៅឡើយនោះទេ សម្រាប់អវត្តមានរបស់លោក ថេន សេន ថាតើ លោកនឹងមានគម្រោងអ្វីបន្ទាប់ ខណៈពេលដែលដៃគូបដិបក្ខរបស់លោក គឺលោកស្រីអ៊ង់សានស៊ូជី កំពុងតែទទួលការគាំទ្រភ្លូកទឹកភ្លូកដីពីប្រជាជន។ ស្រមោលអតីតកាលនៅតែអន្ទោង លទ្ធិប្រជាធិប តេយ្យមីយ៉ាន់ម៉ា ពោលគឺគេខ្លាចក្រែងមានការបះបោរពីយោធាចំពោះលទ្ធផលដែលត្រូវបានគេជឿជាក់ថា នឹងបានទៅបក្សលោកស្រីស៊ូជី។ ជាក់ស្តែង កាលពីឆ្នាំ១៩៩០ ក្រោយពេលបក្សលោកស្រី ស៊ូជី ទទួលជ័យជម្នះ លោកស្រីមិនបានឡើងកាន់តំណែងរដ្ឋាភិបាលនោះទេ។ ផ្ទុយទៅវិញលោកស្រី ត្រូវបានឃុំខ្លួនអស់រយៈពេលជាង១ទសវត្សរ៍។ នេះហើយជាក្តីបារម្ភរបស់ប្រជាជនមីយ៉ាន់ម៉ា និងសហគមន៍អន្តរជាតិចំពោះរដ្ឋដែលធ្លាប់ចាក់ឬសដោយរបបយោធាជាច្រើនទសវត្សរ៍។

យ៉ាងណាក៏ដោយ បើយើងគិតក្នុងចំណុចវិជ្ជមានវិញ ពោលគឺបើទាំងរដ្ឋាភិបាលលោកថេន សេន និងទាំងយោធា នឹងទទួលស្គាល់លទ្ធផលនៃការបោះឆ្នោតដូចទៅនឹងការសន្យារបស់ខ្លួន នោះមីយ៉ាន់ម៉ា នឹងទទួលបានកេរ្តិ៍ឈ្មោះ និង ផលប្រយោជន៍ទៅលើសហគមន៍អន្តរជាតិ។ ជាពិសេសនោះ លោក ថេន សេន នឹងក្លាយជាជនគំរូនៃការកែទម្រង់លទ្ធិប្រជាធិបតេយ្យពិតប្រាកដក្នុងប្រវត្តិសាស្ត្រនយោនបាយមីយ៉ាន់ម៉ា និង ពិភពលោកទៀតផង។ ហើយទណ្ឌកម្មដែលរដ្ឋមួយចំនួន បានដាក់លើមីយ៉ាន់ម៉ា ដូចជាអាមេរិក អាចនឹងត្រូវបន្ធូរបន្ថយទៀត បើសិនមីយ៉ាន់ម៉ា ពិតជាអាចអនុវត្តលទ្ធិប្រជាធិបតេយ្យបានមែននោះ៕