មានបាតុកម្មប្រឆាំងមេដឹកនាំបក្សជំទាស់ បើមានបាតុកម្មប្រឆាំងសម្តេចនៅកាលីហ្វ័រញ៉ា

ជាតិ

មានបាតុកម្មប្រឆាំងមេដឹកនាំបក្សជំទាស់ បើមានបាតុកម្មប្រឆាំងសម្តេចនៅកាលីហ្វ័រញ៉ា

25, Jan 2016 , 11:40 am

រូបភាព

ដោយ:

សម្តេចនាយករដ្ឋមន្ត្រី ហ៊ុន សែន បានព្រមានថា បាតុកម្មប្រឆាំងនឹងមេដឹកនាំគណបក្សសង្គ្រោះជាតិ អាចនឹងកើតមានឡើង ប្រសិនបើមានបាតុកម្មប្រឆាំងនឹងរូបលោកនៅរដ្ឋកាលីហ្វ័រញ៉ា (California) ក្នុងអំឡុងពេលដែលលោកទៅទស្សនកិច្ចនៅសហរដ្ឋអាមេរិក នាខែកុម្ភៈខាងមុខ។

ការព្រមានថា នឹងអាចមានបាតុកកម្មប្រឆាំងមេដឹកនាំគណបក្សសង្គ្រោះជាតិនៅក្នុងប្រទេសពីសំណាក់ប្រមុខរដ្ឋាភិបាលកម្ពុជាបែបនេះ ធ្វើឡើងក្រោយពីម្ចាស់គណនីហ្វ៊េសប៊ុកឈ្មោះ Brady Young ចូលComment នៅលើគណនីហ្វេសប៊ុកសម្តេច ហ៊ុន សែន ថា ពលរដ្ឋខ្មែរអាមេរិកកាំងនឹងធ្វើបាតុកម្មប្រឆាំងសម្តេចនាយករដ្ឋមន្ត្រីនៅពេលលលោកធ្វើដំណើរទៅអាមេរិកនៅខែក្រោយ។ ម្ចាស់គណនីហ្វ៊េសប៊ុកឈ្មោះ Brady Young បានសរសេរយ៉ាងនេះថា៖« សួស្តីសម្តេច, ខ្ញុំចង់ជម្រាបសម្តេចថា ពួកយើងជាខ្មែរអាមេរិកកាំង បានរៀបចំបាតុកម្មអហិង្សា សម្រាប់ទទួលស្វាគមន៍វត្តមានសម្តេច»។

ឆ្លើយតបនឹងម្ចាស់គណនីហ្វ៊េសប៊ុកខាងលើ ប្រមុខបក្សកាន់អំណាចរូបនេះ សរសេរបែបចំអកទៅវិញដូច្នេះថា៖«បើក្មួយយល់ថា បាតុកម្មប្រឆាំងពូមានប្រយោជន៍ សុំធ្វើតាមចិត្តចុះ ព្រោះវាជាមុខជំនាញរបស់ពួកក្មួយទៅហើយ។ អ្វីដែលក្មួយត្រូវចាំហើយប្រាប់តគ្នាទៅមេក្មួយទាំងនៅក្នុងប្រទេស និងនៅក្រៅប្រទេសនោះ គឺត្រូវទទួលស្គាល់សិទ្ធិបាតុកម្មរបស់អ្នកគាំទ្រពូប្រឆាំងមេដឹកនាំក្មួយនៅក្នុងប្រទេសវិញដែរ»។ ទន្ទឹមនឹងនេះ សម្តេច ហ៊ុន សែន ក៏ឆ្លៀតរម្លឹកពីបាតុកម្មប្រឆាំងនឹងរូបលោកកាលពីចុងខែកញ្ញា ឆ្នាំ ២០១៥ នៅអាមេរិកកន្លងទៅថា ជាការរៀបចំរបស់គណបក្សសង្គ្រោះជាតិ តែបក្សនេះព្យាយាមបដិសេធ។ «របាយការណ៍ហិរញ្ញវត្ថុនៃបក្សប្រឆាំងនៅរដ្ឋមួយបានបញ្ជាក់ថា បានចំណាយធ្វើបាតុកម្ម ថ្ងៃទី ២៦ កញ្ញា ២០១៥ នៅញូយ៉ក។ លាក់ក្បាលតែចេញកន្ទុយ។ ដូចនេះបាតុកម្មនៅក្នុងស្រុកជាលទ្ធភាពអាចកើតមានដើម្បីប្រឆាំងមេដឹកនាំបក្សប្រឆាំង»។

តាមគម្រោង រដ្ឋាភិបាលវ៉ាស៊ីនតោន បានអញ្ជើញប្រមុខមេដឹកនាំកំពូលនៃប្រទេសសមាគមអាស៊ានទាំង ១០ ក្នុងនោះក៏មានមេដឹកនាំកម្ពុជា សម្តេច ហ៊ុន សែន ទៅចូលរួមកិច្ចប្រជុំកំពួលអាស៊ាន និងអាមេរិក នៅសហរដ្ឋអាមេរិកក្នុងអំឡុងខែកុម្ភៈឆ្នាំ ២០១៦ ខាងមុននេះ។ បើតាមការចុះផ្សាយរបស់ VOA ជាភាសាខ្មែរ កាលពីពេលថ្មីៗ កិច្ចប្រជុំនោះ នឹងធ្វើឡើងនៅឯរមណីយដ្ឋានឯកជន Sunnylands ក្នុងក្រុង Rancho Mirage រដ្ឋកាលីហ្វ័រញ៉ា ជាទីដែល លោកប្រធានាធិបតី បារ៉ាក់ អូបាម៉ា បានជួបប្រជុំក្រៅផ្លូវការជាមួយលោកប្រធានាធិបតីចិន ហ្ស៊ី ជីនពីង (Xi Jinping) កាលពីឆ្នាំ ២០១៣ ៕