ជាតិ
×![]()
ដោយ: ម៉ៅ សុផា
ដើម្បីរម្លឹកស្នាដៃប្រវត្តិសាស្ត្ររបស់បុព្វបុរសខ្មែរ រាជរដ្ឋាភិបាល សម្រេចសាងសង់វិមានអនុស្សាវរីយនយោបាយឈ្នះ-ឈ្នះ កាលពីពេលកន្លងទៅ។ រហូតមកដល់ពេលនេះ វិមានអនុស្សាវរិយនយោបាយឈ្នះ-ឈ្នះ ត្រូវបានគូរប្លង់ព្រមទាំងចាក់គ្រឹះរួចរាល់ហើយ និងកំពុងតែបន្តសាងសង់ជាប្រចាំថ្ងៃ។
លោកឧត្តមសេនីយ៍ឯក ចៅ ភិរុណ អគ្គនាយកនៃអគ្គនាយកដ្ឋានសម្ភារបច្ចេកទេសនៃក្រសួងការពារជាតិ បានអះអាងថា ក្រោយពីប្រកាសគម្រោង រហូតមកដល់បច្ចុប្បន្ន ជាងសាងសង់ បានចាក់គ្រឹះចប់សព្វគ្រប់ហើយ និងកំពុងតែបន្តការសាងសង់ជាធម្មតា។ ការលើកឡើងរបស់លោក ចៅ ភិរុណ ធ្វើឡើងក្នុងវេទិកាសាធារណៈក្រោមប្រធានបទ «បញ្ហាទូទាំងសាកលលោក ពាក់ព័ន្ធនឹងសំណល់គ្រាប់បែកនិងអនុសញ្ញាស្តីពីគ្រាប់បែកចង្កោម» ដែលប្រារព្ធនៅសណ្ឋាគារ រ៉ាហ្វល ឡឺរ៉ូយ៉ាល់ កាលពី ថ្ងៃទី១២ ឧសភានេះ។
លោក ចៅ ភិរុណ បានបញ្ជាក់ថា វិមានប្រវត្តិសាស្ត្រនេះ នឹងត្រូវលេចចេញជារូបរាងឡើង នៅមុនឆ្នាំ២០២៣ នាឱកាសដែលកម្ពុជាធ្វើជាម្ចាស់ផ្ទះក្នុងការរៀបចំការប្រកួនកីឡាអាស៊ី (SEA Game)។ លោកបន្ថែមទៀតថា ដំណើរការនៃការសាងសង់ គឺពឹងផ្អែកលើកញ្ចប់ថវិកា ជាកត្តាដ៏សំខាន។
លោកឧត្តមសេនីយ៍ឯករូបនេះបានសង្កត់ធ្ងន់ថា៖«វិមានឈ្នះ-ឈ្នះ នេះ យើងបានបុកគ្រឹស្តរួចហើយ ហើយប្លង់រួមរបស់វិមានឈ្នះ-ឈ្នះ ក៏ត្រូវបានធ្វើរួចហើយដែរ។ ខ្ញុំគិតថា ដំណើរការនៃការនៃការសាងសង់វិមានឈ្នះ-ឈ្នះ គឺអាស្រ័យលើមូលនិធិ ឬក៏អាចនិយាយបានថា ថវិកា។ ប៉ុន្តែ ទោះជាយ៉ាងណាក៏ដោយ គឺថា អាចនឹងត្រូវបញ្ចប់ មុនពេលដែលកម្ពុជា ទទួលការប្រកួនស៊ីហ្គេម ឆ្នាំ២០២៣»។
សូមរំឭកថា កាលពីថ្ងៃទី២៥ ខែកុម្ភៈ ឆ្នាំ២០១៦ កន្លងទៅ រាជរដ្ឋាភិបាលបានប្រារព្ធពិធីបើកការដ្ឋានសាងសាង់ «វិមានអនុស្សាវរីយ៍នយោបាយឈ្នះ-ឈ្នះ និងបញ្ចប់សង្គ្រាមស៊ីវិលនៅកម្ពុជា» ដែលប្រព្រឹត្តទៅក្រោមវត្តមានរបស់លោក ទៀ បាញ់ រដ្ឋមន្ត្រីក្រសួងការពារជាតិ។ វិមាននេះ ស្ថិតក្នុងតំបន់អភិវឌ្ឍន៍របស់លោក លី យ៉ុងផាត់ នៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។
ការសាងសង់វិមាននេះ គឺដើម្បី រម្លឹកដល់គុណូបការៈរបស់បុព្វបុរសខ្មែរគ្រប់សម័យកាល ដែលបានលះបង់ជីវិត ក្នុងបុព្វហេតុជាតិមាតុភូមិ។ ម្យ៉ាងទៀត វិមាននេះ ក៏ជានិមិត្តរូបនៃសុខសន្តិភាព ដែលកម្ពុជាទទួលបាន ក្រោយពីបញ្ចប់សង្គ្រាមស៊ីវិលដ៏រ៉ាំរ៉ៃ ជាច្រើនទសវត្សរ៍ កន្លងមក។ ជាងនេះទៀត វិមាននេះ នឹងក្លាយជាកេរមរតក សម្រាប់កូនចៅជំនាន់ក្រោយផងដែរ៕
Tag:
វិមានឈ្នះ-ឈ្នះ
ចៅ ភិរុណ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
