បើតាមតួលេខរបស់ក្រសួងសុខាភិបាល ក្នុងចំណោមពលរដ្ឋអាទិភាព ដែលបានចាក់វ៉ាក់សាំងទាំងអស់មានស្ត្រីចំនួន ១, ៩៧៦នាក់។ ចំណែកឯ ខាងកងទ័ពវិញ គឺមានស្ត្រី ចំនួន៣,១៨៣នាក់។

 

កម្ពុជាចាប់ផ្តើមចាក់វ៉ាក់សាំងប្រភេទស៊ីណូហ្វាមរបស់សាធារណៈប្រជានិតចិន តាំងពីថ្ងៃទី១០កុម្ភៈ មក។ វ៉ាក់សាំងកូវីដ-១៩ ប្រភេទនេះ អាចចាក់បានសម្រាប់អ្នកដែលមានអាយុចាប់ពី១៨ឆ្នាំ ដល់ ៥៩ឆ្នាំប៉ុណ្ណោះ ហើយអ្នកដែលស្ថិតនៅក្នុងចន្លោះវ័យនេះ បើមានសុខភាពខ្សោយ ឬមានជំងឺផ្សេងៗ ក៏មិនអាចចាក់បានដែរ។ 

 

វ៉ាក់សាំងកូវីដ-១៩ប្រភេទស៊ីណូហ្វាម ចំនួន៦០ម៉ឺនដូសរបស់ចិន បានដឹកមកដល់កម្ពុជាកាលពីថ្ងៃទី៧កុម្ភៈ ឆ្នាំ២០២១ ដោយក្នុងនោះ មាន៣០ម៉ឺនដូស ប្រគល់ឱ្យក្រសួងសុខាភិបាល និង៣០ម៉ឺនដូស ប្រគល់ឱ្យក្រសួងការពារជាតិ។ 

 

គិតត្រឹមថ្ងៃទី២៤កុម្ភៈ កម្ពុជាមានករណីកូវីដ-១៩ សរុប៦៣៣ករណី ដោយ៤៧៦ករណី បានជាសះស្បើយ។ ចំពោះករណីឆ្លងក្នុងព្រឹត្តិការណ៍សហគមន៍២០កុម្ភៈ បានឡើងដល់១៣៧ករណីហើយ ដោយភាគច្រើនជាជនជាតិចិន៕