COVID-19
ជាតិ
រដ្ឋាភិបាលហាមឃាត់ការធ្វើដំណើរ និងបិទរមណីយដ្ឋានទេសចរណ៍ទូទាំងប្រទេស១៤ថ្ងៃ
× សម្តេចនាយករដ្ឋមន្ត្រី ហ៊ុន សែន ល្ងាចថ្ងៃអង្គារនេះ បានចេញសេចក្តីសម្រេចស្ដីពី ការហាមឃាត់ ការធ្វើដំណើរ និងការបិទរមណីយដ្ឋានទេសចរណ៍ទូទាំងប្រទេស ជាបណ្ដោះអាសន្នដើម្បីទប់ស្កាត់ ការឆ្លងរាលដាលនៃជំងឺកូវីដ-១៩ រយៈពេល១៤ថ្ងៃ ចាប់ពីថ្ងៃទី៧ ដល់ថ្ងៃទី២០ ខែមេសា ឆ្នាំ២០២១។
ការហាមឃាត់នេះ ធ្វើឡើងចាប់ពីម៉ោងសូន្យ នាថ្ងៃទី៧ ខែមេសា ពីភូមិសាស្ត្រនៃខេត្តមួយទៅខេត្តមួយទៀត។ ប៉ុន្តែភូមិសាស្ត្ររាជធានីភ្នំពេញ និងខេត្តកណ្តាល ត្រូវបានចាត់ទុកជាតំបន់តែមួយ ដោយមិនស្ថិតក្នុងការហាមប្រាមចេញ-ចូលគ្នានោះឡើយ។
ការហាមឃាត់នេះ ត្រូវបានលើកលែងចំពោះ ការដឹកជញ្ជូនទំនិញគ្រប់ប្រភេទ ដំណើរបំពេញភារកិច្ចរបស់មន្ត្រីរាជការសាធារណៈ កងកម្លាំងប្រដាប់អាវុធ រថយន្តសង្គ្រោះបន្ទាន់ រថយន្តពន្លត់អគ្គិភ័យ រថយន្ដដឹកសំរាម-កាកសំណល់ ការដឹកកម្មករទៅកន្លែងការងារ ការធ្វើដំណើររបស់ពលរដ្ឋទៅពេទ្យ និងការធ្វើដំណើរក្រោមមូលហេតុចាំបាច់ផ្សេង ដោយមានលិខិតស្នាម ឬឯកសារបញ្ជាក់។
រមណីយដ្ឋានទេសចរណ៍ទាំងអស់ទូទាំងប្រទេស ត្រូវបានតម្រូវឲ្យបិទរយៈពេល១៤ថ្ងៃ៕
© រក្សាសិទ្ធិដោយ thmeythmey.com