ជាតិ
អ្នកនិពន្ធ ម៉ៅ អាយុទ្ធ បានទទួលមរណភាពដោយសារជំងឺកូវីដ-១៩ លោក ម៉ៅ អាយុទ្ធ រដ្ឋលេខាធិការក្រសួងព័ត៌មាន
× លោក ម៉ៅ អាយុទ្ធ ដែលជារដ្ឋលេខាធិការក្រសួងព័ត៌មានបានទទួលមរណភាពដោយសារជំងឺកូវីដ-១៩ នាថ្ងៃទី១៥មេសាឆ្នាំ២០២១នេះ នៅមន្ទីរពេទ្យមិត្តភាពខ្មែរសូវៀត។ លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន បានងបង្ហាញអារម្មណ៍សោកស្ដាយប្រាប់សារព័ត៌មានថ្មីៗតាមទូរសព្ទនាល្ងាចថ្ងៃព្រហស្បតិ៍នេះ។ មន្ត្រីជាន់ខ្ពស់នៃក្រសួងព័ត៌មានដដែលបានបញ្ជាក់ថា ការបាត់បង់លោក ម៉ៅ អាយុទ្ធ មិនគ្រាន់តែជាការបាត់បង់សម្រាប់ក្រសួងព័ត៌មានប៉ុណ្ណោះទេ តែជាការបាត់បង់របស់ជាតិកម្ពុជាទាំងមូល។
លោក ម៉ៅ អាយុទ្ធ អាយុ ៧៧ឆ្នាំ បានឆ្លងជំងឺកូវីដ-១៩ និងបានចូលសម្រាកក្នុងមន្ទីរពេទ្យនៅថ្ងៃទី៧ខែមេសា។ ជាអ្នកនិពន្ធជើងចាស់ ជាកវី ជាផលិតករភាពយន្ត លោក ម៉ៅ អាយុទ្ធ បានដឹកនាំរឿង នេសាទក្រពើ កាលពី១០ឆ្នាំមុន ធ្វើឱ្យកេរ្តិ៍លោកល្បីរន្ទឺបន្ថែមទៀតក្នុងចំណោមពលរដ្ឋខ្មែរវ័យក្មេង។
អ្នកសារព័ត៌មាន និងអ្នកដឹកនាំភាពយន្ត សិល្បករ បាននាំគ្នាសរសេរសាររំលែកទុក្ខទាំងភ្ញាក់ផ្អើលចំពោះការបាត់បង់លោក ម៉ៅ អាយុទ្ធ។ លោក មុត ថារី អ្នកដឹកនាំភាពយន្តមួយរូបបានសរសេរនៅលើទំព័រហ្វេសប៊ុករបស់លោកថា៖«ពិភពលោកសិល្បៈទី៧ បានបាត់បង់វីរៈអ្នកដឹកនាំរឿង ជាអ្នកនិពន្ធដ៏ល្បីល្បាញមួយរូបទៀតហើយ។ លោកទៅហើយ ទៅដោយមិនបានលាពួកយើងមួយម៉ាត់ជាចុងក្រោយឡើយ។»។
លោករដ្ឋលេខាធិការ កឹម គុណវឌ្ឍន៍ វិញបានសរសេររៀបរាប់វណ្ណកម្មរបស់លោក ម៉ៅ អាយុទ្ធ ជាបន្តបន្ទាប់ដូចជា រឿងទឹករាំ ផ្ការាំ, បិទភ្នែក ហែកទ្រូង, ចិត្តចងចាំ, ឆ្អឹងអណ្ដែត, នេសាទក្រពើ, ហ្លួងព្រះស្តេចកន និងបច្ចុប្បន្នលោកកំពុងដឹកនាំរឿង កូនប្រុស ក្រោមពន្លឺព្រះចន្ទ ទៀតផង។ លោក កឹម គុណវឌ្ឍន៍ បានពិពណ៌នាពីអារម្មណ៍សោកស្ដាយរបស់ លោកយ៉ាងដូច្នេះ៖«គ្មានអ្វីដេលខ្ញុំសញ្ជឹងគិតយ៉ាងឆ្ងាយនៅវេលានេះជាងពេលណាទាំងអស់។ រៀមច្បងដ៏សំខាន់ក្នុងវិស័យទូរទស្សន៍ជាតិ និងភាពយន្តរបស់ខ្មែរ បានបណ្ដុះបណ្ដាលអ្នកបន្តវេនយ៉ាងច្រើនលើសលប់ រួមមានទាំងរូបខ្ញុំ និង លោក លោកស្រីជាតារាភាពយន្តជាច្រើន។»។
© រក្សាសិទ្ធិដោយ thmeythmey.com